Timersortartut OL-mut periarfissaq nuannaarutigigaat

Folketingetip Præsidiaat kalaallit Savalimmiullu timersortartuisa OL-mi namminneq erfalasumik ataanni peqataasinnaalernissaannik kaammattuuteqarluni Den Internationale Olympiske Komité-mut (IOC) allagaqarpoq. 

Tamannalu kalaallit timersortartuini nuannaalersitsivoq. 

- Taamaattoqarsinnaalissappat nuannissaqaaq. Tassami, pitsaalluinnartuussaaq, Uiloq Slettemark, Kalaallit Nunaanni sisoraaserluni ooqattaasartartut kattuffiannik pilersitsisoq oqarpoq. 

Kalaallit Nunaanni sisoraaserluni ooqattaasartartut kattuffiat World Cupimi, VM-mi, inuusuttunut VM-mi inuusuttuaqqanullu VM-mi kalaallit erfalasuata ataani peqataasartoq taassuma oqaluttuaraa, tamannalu tulluusimaarutigisupilussuuaat. 

Ukaleq Sondre Slettemarkilu kalaallit timersortartut marluk OL-mut anngunnikuupput, danskilu erfalasuata ataani unammillutik. Taakku tamarmik 2026-mi ukiuunerani OL-ertoqarnerani sisoraaserluni ooqataasarnermi peqataapput. 

TAAK: Pissusissamisoorpoq naapertuullunilu  

Aamma Timersoqatigiiffiit Assammik Arsartartut Kattuffiata (TAAK) periarfissaq tikilluaqquaa. Kalaallit Nunaanni sisoraaserluni ooqattaasartartut kattuffiat assigalugu ukiorpassuarni Erfalasutta ataani nunat tamat akornanni unammisarsimapput.   

Atuaruk aamma

Folketingi Kalaallit Nunaannut Savalimmiunullu namminneq erfalasoqarneri atorlugit OL-imut peqataaniarneranni ikiuerusuppoq

- Timersortartunut, timersornermut nunamullu tamarmut pingaaruteqartupilussuuvoq. Nuannaarnermik, tulluusimaarnermik pilersitsisarpoq, kalaallillu inuiattut nunatullu ataatsimoornitsinni misigissutsimik nukittorsaasarluni, kattuffik Sermitsiamut allakkatigut akussummini allappoq, imalu nangilluni: 

- Tamanna aamma OL-mut atuuttussanngorlugu annertusineqassappat, tamanna pitsaasutut isigissavarput, taava ullut ilaanni anngutissagutta Kalaallit Nunaat nammineq erfalasuni atorlugu sassarsinnaalissaaq. Tamanna pissusissamisoorlunilu naleqquttuusoq isumaqarpugut. 

Savalimmiut aamma anngutissagunik assammik arsarnermi OL-mi nammineq erfalasortik atorlugu peqataanissamut kissaateqarnerat TAAK-p paasilluarpaa tapersersorlugulu.  

Olympisk komité sumik piumasaqarpa? 

Den Olympiske Komitép inassuteqaat akuerissappagu, tamanna kalaallit timersortartut Kalaallit Nunaat sinnerlugu sassarsinnaalernissaannaanik tamanna kinguneqassanngilaq. Kalaallit Nunaat namminerisaminik olympiske komitéqalernissaanik tamanna aamma kinguneqassaaq, tamannalu inatsisitigut, aaqqissuussaanikkut nunallu tamat akornanni tunngavissanik suli naammassineqanngitsunik pisariaqartitsiviussaaq. 

Taama Kalaallit Nunaanni Timersoqatigiit Kattuffiat tusagassiuutinut nalunaarummini allappoq. 

Taakku kattuffittulli allatut nutaarsiassamik nuannaarutiginnipput, Kalaallillu Nunaata timersornikkut ineriartorneranik, timersortartunik amerlasuunik, sungiusaasunik namminerlu piumassusertik atorlugu sulisunik, ukiorpassuarni nunatsinni timersornerup nunat tamat akornannisut pitsaassuseqalernissaanut siunnerfilimmik ineriartortitsillutik suliniuteqartunut pingaarutilimmik akuersinerusoq isumaqarlutik. Taakkuli aamma piumasaqaatinik naammassinninnissamut suut piumasaqaataanerat qissimippaat. 

Taamaammat Kalaallit Nunaanni Timersoqatigiit Kattuffiata nunanik nunallu tamat akornanni suleqatinik attuumassutilinnik alloriarnerit tullii pillugit siunnerfilimik oqaloqataanissaq  qilanaaraat, kalaallinullu timersortartunut nunat tamat akornanni pitsaanerpaamik periarfissanik pilersitsinissaq sulissutigittuarumavaat. 

- Kalaallit Nunaanni Timersoqatigiit Kattuffiata peqatigisaanik sulinerup timersornerup, Naalakkersuisut, Folketingip, Danmarks Idrætsforbundip olympiademilu suliniaqatigiiffiup akornanni siammasissumik suleqatigiinnermik sanarfineqartariaqarnera erseqqissaatigaa.  Aatsaat ataatsimoorluni ungasissumut sammisumik sulinikkut Kalaallit Nunaanni olympisk komitémik nukittuumik toqqammavissiisoqarsinnaavoq.