Toqqit, nerisassat sinngullu puui kommuninut nassiunneqartut

Kalaallit Nunaanni upalungaarsimaneq suli nukittorsarneqassaaq. Upalungaarsimanermut atortut qulit nunami kommuninut nassiunneqarumaartut Naalakkersuisut tusagassiuutinut nalunaarummi ilisimatitsipput.

Atortut Upalungaarsimanermut Aqutsisoqarfimmit pineqarput, taakkualu Kalaallit Nunaanni upalungaarsimasut Naalakkersuisullu peqatigalugit atortunik ikkussuinermi atortitsinermilu ilinniartitsissutigineqarsimapput.

Atortut taakku ilaatigut generatorinik, tupernik, nerisassanik, kiassaatinik, sinngup puuinik, nerrivinnik issiavinnillu, qullernik kiisalu perusuersartarfinnik imaqarput, atortullu siulliit Qeqertalimmut marsip naannginnerani apuunneqassasut naatsorsuutigineqarpoq. Atortut allat aasap tungaanut ingerlaavartumik apuunneqassapput, Naalakkersuisut ilisimatitsipput.

Nukittunerulernissaq pisariaqartoq

Naalakkersuisoq Peter Borg (D) ilisimatitsivoq modulit taakku Inuiaqatigiinni Isumannaallisaanermut Upalungaarsimanermullu Ministereqarfimmik januaarimi isumaqatigiissuteqarfiginninnerup kingunerisarigai:

- Taamatullu isumaqatigiissuteqarnitta kingunerisa ilaat maanna takusinnaalereerpagut upalungaarsimanermut modulinik kommuninut nassiussuisinnaanngornitsigut. Pisariaqarpoq, siunissami innaallagissamik qamittoortoqartillugu suli nukittunerusumik inissisimanissarput eqqarsaatigalugu, imaluunniit pinartumik pisoqartillugu innuttaasunut kallerisaarissagutta, Aalisarnermut, Piniarnermut Nunalerinermullu naalakkersuisoq Peter Borg oqarpoq.

Naalakkersuisut naapertorlugit piffissami sivisuumi innaallagiaaruttoqartillugu upalungaasimanermut atortussat sumiiffimmi aalajangersimasumi naapittarfimmi imaluunniit tuperni atorneqarsinnaapput. Innuttaasut naapittarfinni kissartumik nerisinnaallutillu imersinnaapput, sanilitik oqaloqatigisinnaavaat oqarasuaatitillu angallattakkat batterilersorsinnaavaat.