Toqutsisoqarnerani suliami arnaq tigusarineqarpoq — politiit assinik takunnissimasunillu ujartuipput

Angutip 37-nik ukiullip Nanortalimmi toqungasup sapaatip akunnerata siuliani, nassaarineqarneranut atatillugu Kalaallit Nunaanni Politiit arnaq 43-nik ukiulik Kujallermi Eqqartuussivimmi killisiorpaat.

Taama politiit tusagassiutitigut nalunaarummi allapput.

Arnap tigusarineqarnera aallaqqaammut akunnerni 72-sini sivitsorneqarpoq, tigummigallarneqarlunilu maannakkut. Taamaalilluni suliami inuit sisamat tigusarineqarput. Politiillu siusinnerusukkut ilisimatitsissutigaat, taakku sisamat angummut 37-nik ukiulimmut toqutsisimasutut unnerluutigineqartut.

Toqusut timaannik misissuisartut pinerluttulerinermilu atortunik misissueqqissaartartut sapaatip-akunnerata ingerlanerani, Nanortalimmiissasut politiit ilisimatitsipput.

– Toqungasup najugaqarfigisaa suli assersorneqaqqavoq. Aqquserngit assersuineq akornutaasoq ilisimavarput, aqqutissallu assersorneqarnera ataqqineqarmat qujamasuutigaarput, politiit allapput.

Aamma politiit assinik takunnissimasunillu ujaasipput:

– Videolianik assinillu suliamut attuumassuteqartunik peqaruit, imaluunniit suliamut attuumassuteqarsinnaasunik takunnissimaguit tusagaqarsimaguilluunniit, Nanortalimmi politiit imaluunniit pigaartut oqarasuaataat 70 14 48 aqqutigalugu Kalaallit Nunaanni Politiinut attaveqarnissat kaammattuutigaarput.

Nanortalimmi toqutsisoqarnera pissutigalugu Naalakkersuisut kommunalbestyrelsip piumasaqaataa naapertorlugu Kommune Kujallermi tamarmi imigassamik tuniniaaneq inerteqqutigilerpaat.