Trump nunatta assiganik inuulluaqqussutitalimmik siammartereqqittoq
Truth Socialimi Trump assimik nunatsinneersoorpasittumik siammarterivoq.
USA-p Kalaallit Nunaanni immikkut aallartitaata, republikaneri guvernør Jeff Landry, sapaatip akunnerata aallartinnerani Nuummi tikeraarpoq.
Foto: Brendan Smialowski/Scanpix
USA-p præsidentiata Donald Trumpip arfininngornerup unnuaani Kalaallit Nunaannik sammisaqaqqippoq.
Tamanna nammineq tamat attaveqatiigiittarfiutimini, Truth Socialimi, assitalerlugu saqqummiuppaa.
Assimi takuneqarsinnaavoq illoqarfik nunatsinneersoorpasittoq, Trumpilu qaqqarsuarmik tigummilluni illoqarfiup tungaanut isigisoq. Assip qulaani allassimavoq “Haluu Kalaallit Nunaat” (Hello Greenland, red.).
Trump assimik ikkussivoq Kalaallit Nunaannut immikkut aallartitaata, Jeff Landryp, Nuummi tikeraarnerata kingorna.
Taanna Nuummut sapaatiummat maajip 17-ianni tikippoq ataasinngornermilu Naalakkersuisut siuttui ataatsimeeqatigalugit.
Tamatuma kingorna Naalakkersuisut siulittaasuat Jens-Frederik Nielsen (D) nunanullu allanut tunngasunut Naalakkersuisoq Múte B. Egede (IA) nalunaarput USA-mit aallartitaq sivikitsumik ataatsimeeqatigisimallugu.
Jens-Frederik Nielsen tusagassiortunik katersortitsinermi oqarpoq Naalakkersuisut aallaqqaammulli aalajangiusimasaat erseqqissaqqissimallugu.
- Oqarpugut Kalaallit Nunaat inuiaqatigiillu kalaallit ataqqineqassasut, tusagassiortunik katersortitsinermi oqarpoq.
Pingasunngornermi aallartinnani Jeff Landryp uteqqiilluni oqaatigaa USA-p Kalaallit Nunaanni sakkutooqarfigisani allilertariaqarai.
- Uagutsinnut pingaaruteqartoq ataasiinnaavoq. Taannalu aappalaartumik, qaqortumik tungujortumillu qalipaateqarpoq. Eqqaamasariaqarparsi præsidentip Kalaallit Nunaannik pingaartitsinera nunap nunarsuup kitaata tungaaniinneranik pissuteqarmat, Jeff Landry Sermitsiamut oqarpoq.
USA nunatsinni maanna ataasiinnarmik sakkutooqarfeqarpoq, tassa Pituffik Space Basemiittumik.
USA-p Danmarkimi aallartitaa Ken Howery sapaatip akunnerata ingerlanerani nunatsinnut aamma tikeraarpoq, tassanilu marlunngornermi pingasunngornermilu Future Greenlandimi peqataalluni.
USA-p Kalaallit Nunaatalu kiisalu USA-p Danmarkillu akornanni pissutsit ilungersunarput, Trumpimmi arlaleriarluni Kalaallit Nunaata naalagaaffeqatigiinnermut ilaasup tigunissaa eqqaasareerpaa.
/ritzau/
