Trumpip Iran pillugu tusagassiortunik katersortitsinermi nunatsinnik tiguaarusunnini uteqqippaa

USA-p præsidentiata Donald Trumpip ataasinngornermi unnukkut tusagassiortunik katersortitsinermini nunatsinnik tigunissaanik kissaateqarnini uteqqippaa.

Tusagassiortunik katersortitsinermi nalunaaquttap-akunnera ataaseq affarlu sivisussuseqartumi USA-p Israelillu Iranimut sorsunnerat sammineqaraluarpoq.

Oqalugiaatip naalernerani Trumpip Nato isornartorsiorpaa USA-mik ikiuinnginnerarlugu.

Siullermik Nato-p generalsekretæria Mark Rutte „inuttut nuannersutut“ pingasunngorpat Trumpimut tikeraartussatut eqqaavaa.

Natoli „pappialatulli nukittutigisoq“, Trump oqarpoq.

Taama oqareerluni nunarput eqqaavaa.

- Ilumoortumik oqassaguma, tamanna Kalaallit Nunaannut tunngasutigut aallartippoq. Kalaallit Nunaat perusupparput. Tunniukkusunngimmassulli uanga inuulluaqqusivunga (bye-bye-eerpunga), tusagassiortunik katersortitsinini naggaserlugu Trump oqarpoq.

Oqariartuutini taannarpiaq taamaattumik aamma itisilinngilaa.

Ukioq manna februaarip naanerani USA-p Israelillu Iran saassuppaat, tamatumalu kingorna Trumpip USA-p Europami iligisai ikiortissarsiorfigai.

Siornatigut oqareerpoq Europami Nato-mut ilaasortaasut Hormusip kangerluata ammatinneqartuarnissaanut ikiuinngikkunik tamanna NATO-mut ajutoorutaassasoq.

Maannamulli Europamiut taama iliorusunngillat, suliaq tamanna Nato-p aallartitarinngimmagu. Trumpip taassumaluunniit naalakkersuisuisa sorsunnerup suna siunertarineraa erseqqissumik oqaatiginikuunngilaat, NATO-lu pilersaarusiornermut peqataatinnagu.

Trumpip ukiorpassuanngortuni nunatsinnik soqutiginnittarpoq.

2019-imi siullerpaamik Kalaallit Nunaata pisiarinissaanik soqutiginninnini ersersippaa.

Tamatuma kingorna qaqutiguinnaq saqqummertarpoq, ukioq mannali januaarimi USA-p Kalaallit Nunaata Danmarkillu akornanni aaqqiagiinnginneq sakkortusilluinnarpoq.

Tassani Trumpip Kalaallit Nunaat aqussinnaalerusullugu uteqattaarpaa, aallaqqaammullu sakkutuut atorlugit pissaaneqarnissaq mattunnagu.

Januaarimi nunanut allanut ministeri Lars Løkke Rasmussen (M) aamma Kalaallit Nunaata nunanut allanut tunngasunut naalakkersuisua Vivian Motzfeldt Washingtonimi ataatsimeeqataapput.

Tassani nunarput pillugu oqariartuutit USA-p naalakkersuisuinut, ilaatigut vicepræsidentimut J.D. Vancemut, saqqummiunneqarpoq.

/ritzau/