Trumpip uuliamik assartuutit Hormuzip kangerliumarnganit anillakkiartortut nalunaarutigaa

Umiarsuarnik Hormuzip kangerliumarnganit „anillakkiartortoqartalersoq“ USA-p præsidentia Donald Trump Truth Socialimi ataasinngornermi allappoq.

Umiarsuarpassuit uuliamik usilersorneqartut Trump oqarpoq, umiarsuarnillu niueqatigiinnissamut aqqut pingaarutilik tallimanngorpat ammassasoq siusinnerusukkut oqarsimavoq, taamanikkussamullu Iranip USA-llu isumaqatigiissutaat atsiorneqassasoq naatsorsuutigineqarpoq.

Isumaqatigiissuteqartoqarnera sapaammi unnukkut nalunaarutigineqarpoq.

Umiarsuarnik nakkutilliisartut naapertorlugit umiarsuarnik assartuisunik marlunnik kangerliumanermit anillakkiartortoqartoq BBC Verify — tuluit tusagassiuutaasa paasissutissanik misissuisarfiat — ataasinngornermi ualikkut allappoq.

Kangerliumaneq USA-p Iranillu akerleriinnerisa nalaanni matuneqaraluartoq kangerliumanermi angallanneq suli killilerneqarsimaqaaq. Sapaatip akunnerani kingullermi umiarsuarnik ullormut marlunnik tallimanillu angalasoqartarsimavoq, BBC naapertorlugu suliffeqarfik Windward, imarsiornermi paasissutissanik pilersuisoq, nalunaarpoq.

Umiarsuarnik qassinik kangerliumanermit anisoqassanersoq Trumpip ataasinngornermi eqqaanngilaa.

- Umiarsuit, ilarpassui uuliamik usilersorsimasut, Hormuzip kangerliumarnganit anillakkiartulissapput, USA-p præsidentia allappoq.

Umiartortut kattuffiisa umiarsuit mianersoqqullugit kajumissaalugillu aqqutit isumannaatsut pillugit paasissutissanik amigaateqarput, nutaarsiassaqartitsivik AFP allappoq.

Hormuzip kangerliumarnga avannamut Iranip kujammullu Emiratini Peqatigiinni Omanimilu inissisimavoq.

Kangerliumaneq nunarsuarmi uuliamik niuernermut pingaaruteqarluinnarpoq. Nunarsuarmi uuliap nalinginnaasumik atugaanerata tallimararterutaata missaaniittoq kangerluk aqqutigalugu assartorneqartarpoq. Nappartat 20 millioninit amerlanerusut uuliamik tunisassiarineqanngitsumik, tunisaasssiornermit imermik orsussamillu imaqartut kangerliumanikkut ullut tamaasa assartorneqartarput.

/ritzau/