Tuluit Atlantikup avannaani sakkutuut umiarsuaannik timmisartunut mittarfittalinnik inissiiniarput

Tuluit Nunaata Atlantikup avannaani avannarpasinnerusumilu sakkutuut umiarsuaannik mittarfittaqartumik ukioq manna inissiissapput.

Tuluit Nunaata ministeriunera Keir Starmerip Münchenimi ukiumoortumik isumannaallisaanermut tunngasunik ataatsimeersuarnermi oqalugiarnermini taama oqartoq BBC allaaserisaqarpoq.

- Ullumi nalunaarutigisinnaavara Tuluit Nunaata sakkutuut umiarsuaataannik timmisartunut mittarfittalinnik Atlantikup avannaani avannarpasinnerusumilu angalasoqalissasoq, oqalugiarnermini oqarpoq.

USA, Canada Natomilu suleqataasut allat peqatigalugit suliniummik ingerlatsisoqassasoq, oqarpoq. Starmerilli oqaatigerusunngilaa nunat sorliit peqataassanersut.

Oqalugiaammini aamma oqarpoq Tuluit Nunaat Europap Atlantikullu akornanni isumannaatsuunissamut pimoorussineranut “ersarissumik peqataasoq”.

Sakkutooqatigiit taakku tassaapput Tuluit Nunaata sakkutuui nunanit assigiinngitsuneersut, tuluit sakkutuuisa imarsiornermi siuttuuffigisaat. Canada, Norge Spanialu siornatigut suleqataasarsimasut, sakkutuut imarsiortut nittartagaanni allassimavoq.

Starmerip nalunaarutaa pivoq nunat tamalaat nunatsinnik soqutiginninnerujussuisa nalaanni, USA-llu præsidentiata Donald Trumpip soqutiginninnini arlaleriarluni oqaatigisareeraalu.

Ministeriunerup Mette Frederiksenip (S) aamma Naalakkersuisut siulittaasuata Jens-Frederik Nielsenip Rubio tallimanngonermi ataatsimeeqatigaat, Frederiksenillu tamanna “angusaqarfiulluartutut” oqaatigaa.

Keir Starmer arfininngornermi oqalugiareermat aperineqarpoq nunarput ulorianartorsiorunnaarnersoq.

Starmer akivoq Kalaallit Nunaat pillugu oqaloqatigiinneq nuannaarutigalugu, erseqqissarlugulu Issittumi isumannaallisaanerup „tamanut pingaaruteqarnera“.

BBC taama allappoq.

Tuluit Nunaat Norgelu decembarimi illersornissamut isumaqatigiissuteqarput Atlantikup avannaani attaveqaatit pingaarutillit illersorniarlugit.

Isumaqatigiissut “Lunna House”-mik taaguuteqarpoq, sakkutuut umiarsuaannik 13-inik angalasoqartitsilerluni, siunertaralugulu attaveqaatit pingaarutillit soorlu immap naqqatigut kabelit aqqutaallu illersorneqarnissaat.

Nato-mut ilaasortaasut USA-mit tapersersorneqarlutik sisamanngornermi isumaqatigiissutigaat Issittumi isumannaallisaanissaq NATO-p suliniutaa Arctic Sentry aqqutigalugu isumagineqassasoq.

/ritzau/