Tusagassiorfik: Canada Nuummi sapaatip-akunnerani matumani sinniisoqarfittaassasoq
Canada Nuummi sinniisoqarfittaava sapaatip-akunnerani matumani ammassasoq, Canadamiut aviisiat CBC News allappoq.
Assi: Carlos Osorio/Reuters/Ritzau Scanpix
Canadap nunanut allanut ministeria Anita Anand Nuummut sapaatip-akunnerani matumani tikeraassaaq. Tassani Kalaallit Nunaata Canadallu akornanni atteveqaat nutaaq ammassavaa, tassa sinniisoqarfik.
CBC News-imi allaaserineqarpoq.
Canadami Issittoq pillugu periusissiaq nutaaq siorna decembarimi saqqummiunneqarmat sinniisoqarfik pilersinneqassasoq nalunaarutigineqarpoq.
Tusagassiorfiup allaaserisaa naapertorlugu Canada ministerimik qaffasinnerusumik atuuffilimmik ukiorpassuarni Kalaallit Nunaannukartitsisimanngilaq.
Canadap issittumi aallartitariligaa Virginia Mearns angalaqataassasoq tusagassiorfik aamma allappoq. Nunanut allanut tunngasunut naalakkersuisoq Vivian Motzfeldt (S) aamma qallunaat nunanut allanut tunngasunut ministeriat Lars Løkke Rasmussen ataatsimeeqatigineqassasut aamma naatsorsuutigineqarpoq.
USA-p præsidentiata Donald Trumpip Canadamut soqutiginninnera Kalaallit Nunaanut assinguvoq.
USA-p præsidentiata nunat taakku marluk USA-mut ilanngunneqarnissaat kissaatigalugu oqariartuutigisarpaa.
Anita Anand Trumpip Kalaallit Nunaannut sioorasaarinera pillugu aperineqarami Canadap nunarsuaq tamakkerlugu suliassaqarfiit assigiinngitsut aqqutigalugit, ilaatigut Issittumi illersuineq isumannaallisaanerlu, suliniuteqartartoq akissutigigaa CBC allappoq:
- Canadap tatiginartuunera, nukittunera siunissamilu suleqataalluarumaarnera kalaallit nalunngilaat, oqarpoq.
