Tusagassiorfik: “Grønlands Hvide Guld”-ip Islandimi takutinneqarnissaanut Danmark akuliuppoq – kinguninngua taamaatinneqarpoq
Reykjavikimi ilisimatusartut marluk Islandimi Grønlands Hvide Guldip takutinneqarnissaanik taamaatitsinermut politikkikkut tatisisoqarnera pissutaasoq qularutiginngilaat. Journalisten allappoq.
Piviusulersaarut Orsugiak – Grønlands hvide guld Katuami Film.gl-ip filminut nersornaasiuttagaanik siorna tunineqarpoq.
Assi: Oline Inuusuttoq Olsen
Ivittuuni orsugiammik piiaaneq pillugu piviusulersaarusiaq suli eqqartorneqallattaavoq.
Tusagassiortunut atuagassiami, Journalistenimi, piviusulersaarutip Islandimi siorna maajimi takutinnissaa taamaatiinnarnernikuunera sisamanngornermi allaaserineqarpoq, tassani ilisimatusartut marluk taamaatitsineq qallunaat akuliunnerannik pissuteqartoq isumaqarput.
Grønlands Hvide Guld marsip 22-ani 2025-mi Nunat Avannarliit Illuanni Islandimi illoqarfiit pingaarnersaanni Reykjavikimi takuteqqaarneqartussaagaluarpoq, tassanilu qallunaat aallartitaqarfiat qaaqquneqarsimalluni. Tamatuma kinguninngua Nunat Avannarliit Illuanni pisortaq Sabina Westerholm Danmarkip Islandimut aallartitaanit Erik Vilstrup Lorenzenimit aamma Nunat Avannarliit Ministeriisa Siunnersuisoqatigiivisa generalsekretæriannit Karen Ellemannimit sianerfigineqarsimasoq, Journalisten allappoq.
Tusagassiortup paasissutissat pissarsiarisimasai allagaatinik takuneqarsinnaatitaanermik qinnuteqarneraninngaaanneerput, tassanilu Karen Ellemannip Sabina Westerholmimut "filmi pissutsit piviusut aallaavigalugit illuatungilersorneqanngitsumik oqaloqatigiissutigineqanngikkuni takutinneqarsinnaanngitsoq" oqarsimanera atuarneqarsinnaavoq.
Sólveig Ásta Sigurðardóttir, postdoc Islandip universitetiani nunasiaateqarneq pillugu ilisimatusartoq, suleqataalu Bryndís Björnsdóttir ph.d-nngorniartoq piviusulersaarummik Islandimi takutitsinissamik aaqqissuussisuusut Journalisten allappoq.
Taamaatitsiinnarneq politikkikkut tatineqarnermik pissuteqartoq isumaqarput, pisimasorlu Danmarkip nunasiaateqarsimasutut isigineqarneranik sakkortunerulersitsisoq.
Piviusulersaarut University of Icelandimi takutinneqaannarpoq, tassa Nunat Avannarliit illuanni taamaatinneqarluni. Karen Ellemann Nunat Avannarliit Illuanni takutitsinissaq pillugu oqaloqateqarsimanini isornartutut isiginagu Journalistenimut allappoq, tassami Nunat Avannarliit illuat Nunat Avannarliit Ministeriisa siunnersuisoqatigiivisa ataaniimmat.
