Tusagassiortunik katersortitsineq: Siumut aningaasanut inatsisissamut isumaqatigiissummut peqataavoq – meeqqeriviit 2028-miit akeqarunnaassapput

Aningaasanut aappaagumut inatsisissaq pillugu, tusagassiortunik ataasinngornermi ualikkut katersortitsisoqassaaq.

Naalakkersuisut nalunaarummi naatsumi taama ilisimatitsipput.

Aningaasaqarnermut naalakkersuisup Aqqaluaq B. Egedep (IA) isumaqatigiissut nalunaaqutaq 14.30 saqqummiutissavaa.

Siumut isumaqatigiissummut peqataasoq

Illuatungiliuttut partiiat Siumut aningaasanut aappaagumut inatsisissatut ,isumaqatigiissummut peqataasoq, erserpoq. Tassa Demokraatit, Inuit Ataqatigiit, Atassut aamma Siumut isumaqatigiissummut peqataapput. Taamaalillutik partiit tamarmik Naleraq kisiat pinnagu aappaagumut missingersuutit taperserpaat.

– Naleqqamut qujarusuppunga, ullaaq manna tikillugu aningaasanut inatsisissaq pillugu isumaqatiginninniarnerni peqataasimammata. Ajoraluartumillu isumaqatigiissummi peqataaniaratik nalunaarput, Aqqaluaq B. Egede oqarpoq.

Naalakkersuisoqatigiinnut peqataanngikkaluarlutik isumaqatiginninniarnernut akisussaaffimmillu tigusisoqarnerani, Siumut qutsavigineqarpoq.

Soraarnerussutisiallit isertitaqarnerulersinnaalerput

– Ullumikkut innuttaasut tatineqarnerat annikillisinniarlugu sapinngisarput tamaat iliuuseqarusuppugut. Utoqqaat soraarninngornerminni atugarissaartariaqarput. Soraarnerussutisiaqalernermi saniatigut aningaasarsiortoqarsinnaasariaqarpoq. Sulinermi saniatigut suligaanni soraarnerussutisiat ikilisarneqartarneri atorunnaarsinneqarpoq, Aqqaluaq B. Egede oqarpoq.

Naalakkersuisut malittarisassat 2027-mi allanngortinniarpaat, inatsisillu 2028-mi atuutilernissaanut piareersarlutik.

Meeqqanut paaqqinnittarfiit nunap karsianit akilerneqassapput

Aqqaluaq B. Egede annertuumik allamik nutaarsiassarsialatsiaqarpoq.

Angajoqqaat meeqqaminnik paaqqinnittarfinnut akiliuteqartarunnaassapput.

– Nunatta Karsiata tamanna akilertussaavaa, aningaasarpassuarnillu akeqassaaq, kisianni angusaqarluarnertut isigaarput, Aqqaluaq B. Egede oqarpoq.

Naalakkersuisut naapertorlugit tamanna angajoqqaat mikisunik meerallit aningaasaqarnikkut ulluinnarni inuunerannut oqilisaataaqataassaaq.

Nunanut allanut tunngasunut immikkoortortaqarfik millionilinnik aningaasaliiffigineqarpoq

Nunanut allanut tunngasutigut oqartussaaffik annertuumik nukittorsarneqartoq, Naalakkersuisoq nangilluni oqarpoq:

– Aatsaat taama sakkortutigisumik pissutsit atorneqarput. Nunat angisuut Kalaallit Nunaannut tatisipput. Kunngeqarfimmi suliassarpassuaqarpoq. Aamma Kalaallit Nunaat soqutigineqarluarpoq aningaasatigullu soqutigineqarluni, taamaattumik nunanut allanut tunngasunut 42 millionit koruunit missaanniittut immikkoortinneqarnissaat siunnersuutigaarput.

Naalakkersuisoq erseqqissaavoq nunanik allanik suleqateqarneq Kalaallit Nunaannut aningaasaqarnikkut pingaaruteqartoq.

– Isumaqatigiissutip matuma angunissaanut nukippassuit, piffissarujussuaq nukissallu atorpavut, tamannalu pillugu partiit qutsavigissavakka, Aqqaluaq B. Egede oqarpoq, tamatumalu kingorna partiit assigiinngitsut isumaqatigiissummi peqataasut sinniisaat oqaaseqartippai.

Demokraatineersup Margrethe Thårup Andersenip siulliulluni oqaaseqarpoq.

Ilaatigut taassuma eqqaavaa Kujataani ilanngaaserisut amerlanerusut pisariaqartinneqarnerat, tamannalu aningaasanut inatsisissami pingaarnersiuiffigineqarpoq. Aamma taassuma oqaatigaa timersorneq partiimi qitiutinneqartoq. Timersorneq 5 million koruunit missaani aningaasaliiffigineqarpoq.

Meeqqat atuarfiini akeqanngitsumik atuartitsisoqartalernissaa IA-p nuannaarutigaa

Nunami maani amerlanerusut inuunissaat IA-mut pingaaruteqartoq, Ane Hansen IA-meersoq oqarpoq.

- Amerlanerusunik meeqqiorsinnaaneq pilerinartuusariaqarpoq, Ane Hansen oqarpoq.

Angajoqqaat meeqqerivinnut akiliuteqartarunnaarnissaat partiinit siornatigut suliniutigineqartartoq, taamaattumillu tamatuma piviusunngornissaa partiip qilanaarigaa, Ane Hansen oqarpoq.

Aqqalu C. Jeremiassen: Soraarnerussutisiaqalernissamut aaqqiissut nuannaarutigaarput

Atassutip siulittaasuata Aqqalu C. Jeremiassenip soraarnerussutisiaqalernissamut aaqqissuussineq nuannaarutigaa:

- Soraarnerussutisiaqalernissamut tunngatillugu kiisami aaqqiissutissarsisoqarpoq, soraarnerussutisiaqarluni ilanngartuutaanngitsumik sulisinnaaneq periarfissaalerpoq, partiimi siulittaasoq oqarpoq.

Aningaasanut inatsisissamut isumaqatigiissummi peqataanissaq nunallu aningaasaqarneranut akisussaaffeqalernissaq partiimut pingaaruteqartoq, Aqqalu C. Jeremiassenip aamma oqaatigaa.

Siumut: Kissaatigisavut tusarneqarput

Siumumeersup Erik Jensenip erseqqissarpaa aningaasanut inatsisissamut isumaqatigiissummut peqataanissaq partiimut pingaaruteqarsimasoq.

- Isumaqatigiissut taanna pingaarutilinnik itigartinneqarsinnaanngitsunik imaqarpoq, Erik Jensen oqarpoq.

Ilaatigut erseqqissarpaa kommunit tamakkiisumik iluarsaaqqinneqarnissaat aalajangiunneqartoq, aamma Siumup nuannaarutigaa umiarsualiviit talittarfiillu ilaat nutarternissaannut aningaasaliisoqarnera.

Erik Jensenip aamma eqqaavaa timersornermut, ilaatigut Arctic Circle Racemut, annertunerusumik aningaasaliisoqartoq.

Isumaqatigiissut atsiorneqarpoq

Partiit tamarmik isumaqatigiissummut sooq peqataanerminnut immikkut tunngavilersuereerlutik, atsioqatigiipput. Taamaasilluni aningaasaqarnermut inatsit 2027 politikkikkut taperserneqarnera qulakkeerneqarpoq.

Isumaqatigiissut tamakkiisoq uani atuarneqarsinnaavoq.