Tusarniaaneq: Pinnersaalluni passussisarnerit nakkutigineqarnerulissapput
Pinnersartilluni passunneqarsinnaaneq – namminersortunit – inatsimmiilersinnagu periarfissaajunnaassaaq, Naalakkersuisut siunnersuutaanni passunneqartut isumannaatsumik suliarineqartarnissaat siunertaralugu tusarniaassutigineqartumi tamanna atuarneqarsinnaavoq.
Katsorsaariaatsit "isikkussamik allanngortitsinissaq pitsaanerulersitsinissaalluunniit pingaarnertut siunertaralugu“ namminersortunit suliarineqartartut inatsisitigut malittarisassiunneqassapput, nakorsaaneq Paneeraq Noahsen nassuiaavoq.
Assi toqqorsivimmiit: Leiff Josefsen
Botoximik
kapitinnerit,
akuutissartalinnik amerissartinnerit,
pilattaasarnerit assigiinngitsut laserimillu suliaritinnerit
namminersortunit suliarineqartartut Nunatsinni
Nakorsaaneqarfimmit siunissami malittarisassaqalissapput.
Pinnersaalluni
allatulluunniit periuseqarluni passussinerit inatsisitigut
malittarisassaqannginnerat passunneqartut isumannaatsuunissaannut
ulorianartorsiortitsisinnaavoq, inatsisissatut siunnersuummi nutaami
tusarniaassutigineqartutut nassuiarneqarpoq.
Passussisartunik
namminersortunik nakkutilliineq
-
Siunnersuut akuerineqarpat, Nunatsinni Nakorsaaneqarfiup suliani
pinnersaalluni passussinernut tunngasuni
nakkutilliisussanngortinneqarsinnaalernissaanut
aalajangiisartunngortinneqarsinnaalernissaanullu
tunngavissiisussaassaaq, tamanna inatsisissatut siunnersuutip, marsip
arfernani tusarniaassutigineqartup, oqaaseqaataani
atuarneqarsinnaavoq.
Akuersissutinik agguaassineq nakorsaaneqarfiup
isumagisassagaa, ilutigalugulu nakkutilliisuussasoq, tassani allassimavoq.
Inatsisissatut
siunnersuut pinnersaalluni allatulluunniit periuseqarluni
passussinernut, "isikkorisamik allanngortitsinissaq
pitsaanerulersitsinissarlu pingaarnertut siunertarineqartunut" tunngasoq nakorsaaneq Paneeraq Noahsen Sermitsiamut nassuiaavoq
Akiligassiisoqarsinnaavoq
-
Danskit inatsisaanni pinnersaalluni allatulluunniit periuseqarluni
passussineq, pilattaasarnertut imaluunniit allatut katsorsaataasutut,
isikkorissaanermut pissutaasumik, pingaarnertullu isikkorissinissaq
pitsanngorsaanerlu siunertarineqartoq nassuiarneqarpoq. Pilattaasarnerit amikkut ameraasakkulluunniit ammarneqarlutik
imaluunniit timip nalinginnaasumik ammarngatigut atortorissaarutinik
ikkussuinermik pineqartartut, nakorsaaneq ilisimatitsivoq
Inatsit
nutaaq naapertorlugu inatsisinik unioqqutitsisoq
akiligassinneqarsinnaavoq.
-
Malittarisassani nalunaarsuisussaatitaanermut il. il. tunngasunik
piumasaqaatitaqarsinnaapput unioqqutitsisoqarneranilu akiligassiineq
ingerlanneqarsinnaammat, siunnersuut inuussutissarsiornikkut
(namminersorlutik passussisartunut aaqq.) aningaasaqarnikkut
allaffissornikkullu annikinnerusumik sunniuteqarsinnaavoq,
tusarniaanerup imarisaani allassimavoq.
Nakorsaaneq
annertusaassaaq
Inatsisissatut
siunnersuut nutaaq naapertorlugu nakorsaaneqarfiup oqartussaaffii
amerlissapput, ukiumullu 600.000 koruunit missaannik naleqarnissaa
naatsorsuutigineqarpoq. Assersuutigalugu nakorsaaneqarfik
passussisartutut namminersortut akuersissutinik qinnuteqaatai nakkutilliinerillu suliarisalissavai.
"Tamatumani
aningaasartuutit ilaat akiliuteqartitsinikkut isertitanit
matussuserneqartassasut naatsorsuutigineqarpoq“,
ilisimatitsissutigineqarallarpoq.
