Tusass aningaasaliissutinut to millionit koruuninik immikkoortitsisoq
Tusass aningaasaliissuteqartarnermut politikimik nutaamik saqqummiussivoq. 2 millionit koruunit ilinniartitaanermut, peqqissutsimut, inuiaqatigiinni akuutitsinermut kulturimullu tunngasunut aningaasaliissutigineqarsinnaalerput.
- Suliniutit isumassarsisitsisut, ataatsimoortitsisut neriuuteqalersitsisullu tapersersussallugit takorloorparput. Taamaammat suliassaqarfinnut sisamanut tunngatillugu suliaqartut tamarmik qinnuteqarnissaannik kaammattuerusungaarpunga, siulersuisuni siulittaasoq Bodil Marie Damgaard oqarpoq.
Assi: Leiff Josefsen
Namminersorlutik Oqartussat allakkerinermik attaveqaasersuutinillu ingerlatsiviat Tusass aningaasaliisarnerminnut politikimik allannguivoq, siunissamilu ukiumut 2 millionit koruuninik tapiissutigineqarsinnaanngussallutik.
Aningaasat 100.000 koruunit 1 millionit koruunillu akornanniittut qinnutigineqarsinnaapput, aamma siunissaq ungasinnerusoq eqqarsaatigalugu suleqatigiissuteqartoqarsinnaasoq, ingerlatseqatigiiffik tusagassiuutitigut nalunaarummi allappoq.
Siulersuisuni siulittaasoq Bodil Marie Damgaard oqarpoq:
- Suliffeqarfittut inuiaqatigiinnit pigineqartutut pitsaasumik ineriartornissamut tapersiinissarput akisussaaffigaarput. Taamaammat tapersiisarnermut politikkerput allanngortipparput, taamaalilluta allanngueqataasut nukittuumik suleqatigisinnaaniassagatsigit.
Qinnuteqartut suliniaqatigiiffiit aningaasarsiutiginagu suliaqartuussapput, politikkikkut sulialinnut attuumassuteqartuussanngillat, suliffeqarfiit imaluunniit pisortat immikkoortortai misilittagalittut aamma aningaasaqarnikkut ingerlalluartutut uppernarsarneqarsimassanngitsut, Tusassimik aalajangersarneqarpoq.
Ilinniartitaaneq, peqqissuseq, inuiaqatigiinnik peqataatitsineq kulturilu pillugit suliat tapiffigineqarsinnaassapput:
- Suliniutit isumassarsisitsisut, ataatsimoortitsisut neriuuteqalersitsisullu tapersersussallugit takorloorparput. Taamaammat suliassaqarfinnut sisamanut tunngatillugu suliaqartut tamarmik qinnuteqarnissaannik kaammattuerusungaarpunga, Bodil Marie Damgaard oqarpoq.
Qinnuteqaatit digitalimik Tusassip nittartagaatigut nassiunneqassapput.
