Tusassip pisortaanerup tulliusimasoq pisortaanertut toqqaraa

Jonas Hasselriis Toke Binzerip soraarnerata kingorna qaammatialuit qaangiuttut pisortaanertut toqqarneqarpoq. Jonas 2025-mi novembarimili pisortaanerugallalerpoq.

Sulisussarsiornermi siullermi 50-it missaanniittut qinnuteqarsimapput, taakkunanngalu aqqaneq-marluk toqqarneqarsimapput, Tusass ilisimatitsivoq.

- Sulilersitsisartut avataaneersut isumasioqatigalugit, inissiisinnaanermut atatillugu peqqissaartumik tamakkiisumillu suliniuteqarsimavugut. Pingaartitarisimavarpullu attaveqaatitigut, qutsissumik aqutsinermi, attaveqaatinik inuiaqatigiinnut pisarialinnik suliaqarnermi, soqutiginnittunik suleqateqartarnermi aammalu suliniutinik annertuunik suliaqarsinnaanermik misilittagaqartuusinnaanissaa. Tamannalu tunuliaqutaralugu suleqatigiisitsilertartuni ataatsimiisitaliami tamakkiisumik isumaqatigiinnikkut Jonas Hasselriis siulersuisunut innersuussimavaat, Tusassimi siulittaasoq Bodil Marie Damgaard oqarpoq.

Suliffeqarfimmi ukiuni qulikkuutaani misilittagalik

Jonas Hasselriis ukiuni 20-ni Tusassimi suliniutinut ingeniøritut misilittagaqarluarpoq. Taanna 2015-imiilli teknikkimut pisortaasimallunilu kingusinnerusukkut pisortap tulliatut atorfeqarsimavoq.

- Tusass piffissami pingaarutilimmiippoq, annertuumik allannguuteqartoq suliassarpassuaqarlunilu. Siulittaasoq siulersuisullu tamaasa qutsavigerusuppakka suliffeqarfimmik ukiuni 20-ni suleqatigisimasatsinnik Tusassimik aqutsinissamik suliassiimmata.

- Tusass maannarpiaq piffimmi pingaarutilimmi inissisimavoq, allannguutit aammalu suliassat annertuut saatsinniipput. Nunatta inuiaqatigiinnilu ineriartortitsinermut qitiusumik pingaarutilittullu inissisimaveqarpugut, ukiunilu tulliuttuni nunatta pingaarutilittut attaveqaasersorneranut isumannaallisaanermut, atuisutsinnullu atugassarititaasunik pitsanngorsaanermut tunngatillugu aningaasalersuinerit annertuut pissapput. Suliassarlu tamanna tunniusimallunga, suliffeqarfimmi suleqatit pikkorissorsuit ilagalugit naammassiniarumaarlugu, pisortaaninngortoq Jonas Hasselriis Tusassip tusagassiutitigut nalunaarutaani oqarpoq.

Tusass Jonas Hasselriisip pisortaaninngorneranut atatillugu pisortaanermut tullersortissamik suli toqqaasimanngilaq.