Tuukkaq uterpoq - Nuummiit Nuummullu timmisartuussinerit tamarmik ullup sinnerani unitsinneqarput

Atlantikoq qulaallugu timmisartoq Tuukkaq ullumi Nuummut minniaraluarpoq, iluatsinngitsumilli. Tuukkaq maanna Keflavikimut orsersorniarluni ingerlaarpoq, kingornalu Københavnimut utissalluni.

- Angalasunut kalluarneqartunut nutaanik pilersaarusiorpugut. Tamanna sivisusinnaavoq angalanissamut pilersaarutit tamarmik allanngortinneqartussaammata. Taamaattumik angalasut eqqugaasut paasissutissanik nutaanik utaqqisariaqarput. Ajoraluartumik kiffartuussivipput inissanik allanik nassaarniarnermi ikiuussinnaanngilaq, pilersaarutit nutaat inissitsinnagit, Air Greenland nittartakkamini allappoq.

Unnuiffissaqanngitsut

Nuummi akunnittarfinni inissaqanngilaq, taamaattumik angalasut Nuummiit ingerlaqqissinnaanngitsut Air Greenlandimit unnuiffissaqartinneqarsinnaanngillat.

- Ajoraluartumik maannakkut angalasunut Nuummiit aallarsinnaanngitsunut akunnittarfinni inissanik nassaarniarneq ilungersunarpoq. Taamaasilluni angalasunut kalluarneqartunut unnuiffissamik neqeroorsinnaanngilagut.

- Nuummi akunnittarfinni inissat killeqarnerat Air Greenlandimit aqussinnaanngilavut, mittarfinnilu sulisuvut periarfissat iluanni sapinngisaminnik ikiuupput, nalunaarutigineqarpoq.

Ilulissani unnuiffissat aamma ikittuinnaasut

Air Greenland ilisimatitsivoq Ilulissani akunnittarfinni inissaat killeqartut.

Ilulissani unnuiffiusinnaasut ajoraluartumik killilipilussuupput, taamaattumillu angalasunut nalaanneqartunut tamanut akunnittarfimmik pissarsisinnaanata. Taamaattumik qinnuigissavatsigit periarfissaqaruit nammineq unnuiffissarsioqqullutit, timmisartortitseqatigiiffik allappoq.

Air Greenland nittartakkamini allappoq angalasut Ilulissaniit ingerlaqqissinnaanngitsut Ilulissat mittarfiannut nerissutissanik allagartanik aallersinnaasut.