Ukiumi unammillernarnerpaaq: Marloriaammik tatisimaneqarluni nunamik aqutsineq

Inatsisartunut qinersinerup unnuaani marlup qeqqa qimalaaraa partiit siuttui KNR-ip aallakaatitsivianiipput qinersinerullu inerneri takkuteqqammisut isummerfigissallugit.

Demokraatit qinersinerup siulianut sanilliullugu 21 procentinik siuariartut kisitsisit takutippaat.

Piffissap taamaalinerani Jens-Frederik Nielsenip nunarput aquttussanngorlugu paasiartulerpaa. Oqaasissaasuarpasilluni qeqqissimavoq, allaanngilarlu susoqarpiarnera suli iluamik paasisimanngikkaa. Nunarput tamakkerlugu isiginnaartoralugu oqaaseqaqqaarami “tupaallannarpoq” oqaatigeqqaagaanut ilaavoq. Nunarpummi nunarsuarmioqatigiinnit aatsaat taama ukkatarineqartigisoq siuttuuffigisussanngorpaa.

- 2025 politikkikkut allanngorfiuvoq. Patajaassuseq, akisussaassuseqarnissaq, ineriartornissarlu qinersisartut kissaatigigaat qineqqusaarnerup takutippaa, qineqqusaartutsinnillu – kommuninut aamma Inatsisartunut – tamanik qinersineq siunnerfimmut tassunga nukittuumik piginnaatitsilluni, Jens-Frederik Nielsen oqarpoq.

Nunatsinni innuttaasut nunap siuttortaavanut naatsorsuuteqarnerisa saniatigut nunarsuarmioqatigiit naatsorsuuteqaqalutik aamma utaqqipput. Jens-Frederik Nielsenilumi nunat allat siuttuinik arlalissuarnik nunatsinnut tikilluaqqusillunilu, nunarput sinnerlugu nunanut allanut ukioq manna angalalaavippoq.

- Kalaallit Nunaata avammut sunniuteqarnerata nukittorsarnissaa Naalakkersuisuni siulittaasortaatut aasaq, ukiarlu atorpakka. Nuna sinnerlugu oqaaseqartarneq qamuuna assut misigisaqarfiuvoq, nunarsuatsinnilu inissisimanitta annertusiartuinnarneranik erseqqissaataalluni.

Inatsisartut qinersinerup kingorna ukiup affaani ataatsimiissimanatik septembarimi ataatsimeerngaarput. Ukiaanerani ataatsimiinneq Naalakkersuisut Siulittaasuata immikkut eqqaamasaqarfigaa.

- Ukiakkut ataatsimiinneq pisut pingaarutillit aamma ilagaat. Aningaasaqarnermut, inuussutissarsiutinut, inuiaqatigiinnilu ineriartortitsinermut pingaarutilinnik alloriaateqarluta ataatsimiinneq pikkunartoq, kingunilik, siunnerfilillu naammassivarput. Taakkorpassuillu pinerini ilaquttat najornerat pisariaqartumik tapersersortaasimalluni, Jens-Frederik Nielsen oqarpoq.

Tatineqarluni nunamik aqutsineq

Nunarsuarmioqatigiit nunarput pillugu arajutsiunnaarfiata nalaani, nunatsinnilu anguniakkat annertusiartornerini nunap aqunnissaata katitigaanera unammillernarnerpaasimasoq 34-nik ukiullip Jens-Frederik Nielsenip oqaluttuaraa.

- Paasinarluassaagut, allanngujaassaagut, siumullu nalunanngeriissalluta – tamannalu ullut tamaasa politikkikkut ukkataqarfiusariaqarluni, taanna oqarpoq.

Inatsisartut ukiaanerani ataatsimiinnerat aningaasanullu inatsisissaq suliarujussuusutut aamma eqqaamavai.

- Naalakkersuisooqatigiittulli suleqatigiikkatta, periarfissaatillugulu illuatungiliuttut peqatigalugit aaqqiissutissanik nassaaqatigiikkatta iluatsippoq. Suleqatigiinneq pitsaanerpaamik aqqutissaasoq tamassuma takutippaa.

Jens-Frederiup suliai pinnagit inuttaanut tunngasut tikilaassagutsigit ilaquttaminut ulapinnerup nalaani piffissaalatsisarnini unammillernarnerpaatippaa.

- Oqimaaqatigiissitsinissara suli anguniarpara, Jens-Frederik Nielsen oqarpoq.

Aaqqissuusseqqinnerit innuttaasunullu attaveqarneq

Aaqqissuusseqqinnerit innuttaasut ulluinnaanik pitsaanerulersitsisussat angusaqarfiginerorusussimagaluarlugit Jens-Frederik Nielsenip oqaluttuaraa.

- Suliat ilaat misissueqqissaarnernit pitsaasunik, siammasissumillu isumaqatigiissutinit ineriartortinneqartussaagamik piffissartornartarput. Tunngavissarli inissereerpoq, sulinerlu 2026-mi ingerlaqqissalluni, taanna oqarpoq.

Innuttaasunut attaveqarnerup pingaaruteqarnera erseqqissarpaa.

- Innuttaasut amerlanerusut aamma angorusukkaluarakkit. Najukkami oqaloqatiginninnerit uanni aalajangiisuupput – siunnerfiliisarput, aalajangiinissanullu nukittunerulersitsisarlutillu piviusorsiorpalaartitsinerusarlutik.

- Innuttaasut amerlanerusut aamma naapikkusuppakka. Ulluinnarni kingunerit qanillugit inuusunik oqaloqateqarnermik politikki aallaaveqartillugu, Kalaallit Nunaat pitsaanerpaamik ineriartussaaq, Jens-Frederik Nielsen oqarpoq.

Ukiumi suna iluatsinnerpaasimasutut isigaajuk?

- Kalaallit Nunaat aalaakkaasunik, akisussaaffilimmik, siunissamullu ungasinnerusumut aaqqiissutissarsiorsinnaammat politikkikkut uppernarsaratsigu Iluatsinnerpaavoq. Inatsisartuni akerleriinnata suleqatigiinnissarput toqqarnikuugatsigu, Inatsisartuni aalajangigassanik pingaarutilinnik partiit akimorlugit aalajangiivugut. Tamassuma nuna nukittunerulersippaa.

2026-mi sorusuppa?

Naalakkersuisut Siulittaasuat ukioq manna ulapingaatsiareersoq qaammatini kingullerni ulapputissaqarnerulerpoq. Naalakkersuisunut ilaasortaatitai marluk tunuarput, Mads Pedersenillu akisussaaffigisimasai taartissaanik nassaarnissami tungaanut akisussaaffimmi annertuup saniatigut akisussaaffigigallarpai. Ukiumili nutaassami suut pingaarnertut ukkatarissallugit takusinnaalereerpaa.

- Aningaasaqarnerup patajaannissaanik, atugarissaarnerup annertusineqarnissaanik, inuussutissarsiutilinnullu pitsaanerusumik sinaakkuteqartitsinissamik qulakkeerissallutik aaqqissuusseqqinnissat nanginneqarnissaat aalajangiisuussaaq, Jens-Frederik Nielsen oqarpoq.

- Sulinerup imminut akilersinnaajuaannarnissaa eqqarsaatigalugu piumasaqaatit sakkortusereersimagatsigit nuannaarutigaara. Sulinissarlu suli pilerinarnerulissasoq ataavartumik ukkataraara. Siunnerfik aalajangiusimaannassavarput, pisariaqartumillu aalajangigassat aalajangerlutigit – aamma aalajangissallugit oqimaakkaluarpalluunniit.

Politikkullu anguniakkami saniatigut ukiumi nutaami pinngortitamiinnerorusuppoq.

- Pinngortitamiinnerusinnaanissaralu kissaatigilaarpara. Ukiumi ukkataqarfiusariaqartumi, ataqatigiiffiusariaqartumilu isiginnilersitsillunilu nukissanitsitsisarpoq, Naalakkersuisut Siulittaasuat taama naggasiivoq.