Ukiut 15-it ingerlaneranni qinersiartortut aatsaat taama amerlatigipput

Kalaallit Nunaanni Folketingimut qinersinermi qinersiartortartut ikippallaarnerat ikiliartuinnarnerallu ilisimaneqaatigaat.

Folketingimut qinersinermi taasiartortut 2022-mi ikileriarput, taamaallaat 47,8 procentit taasiartormata.

Qinersiartortut ikiliartuinnarsimanerat marlunngornermi allanngorpoq. Taamaasilluni qinersiartornerit siuariaateqarlutik.

Qinersisinnaatitaasut qinersiartortut 52,3 procentinik marlunngornermi amerlassuseqarput. Qinersinermi peqataasut 4,5 procentimik amerleriarput.

2011-mi Folketingimut qinersinermit amerlanerusut taasiartorsimapput.

Marlunngornermi qinersinermi 21.428-t taasisimapput, 2022-mi 19.733-t taasisimasut.

Nunarput "oqallisaangaatsiartoq“

Qineqqusaarnermi partiit arlallit oqaatigaat folketingimut qinersineq manna nunarsuarmi politikkikkut pissutsit eqqarsaatigalugit Kalaallit Nunaannut pingaaruteqarluinnartoq, USA-mi præsidentip Donald Trumpip nunarsuup soqutiginninnera Kalaallit Nunaannut saatsimmagu oqarluni USA-p nunarput pisariaqartikkaa USA-p nunatut isumannaatsuunissaa eqqarsaatigalugu.

Nunanit tamalaanit soqutigineqarnertik qinigassanngortittullu amerlassusaat pissutigalugit qinersiartortartut amerligaluttuinnartut, Anna Wangenheim Demokraatineersup qinersinerup unnuaani Sermitsiamit oqaloqatigineqarami naliliivoq:

- Siullermik, isumaqarpunga qinigassanngortittut amerlanerat pissutaasoq.

- Nunarsuarmilu pisartut tamaasa eqqarsaatigalugit. Kalaallit Nunaat nunatut politikkikkut pingaarutilimmik inissisimaffeqalersimavoq. Oqaatigineqareersutut oqallisaangaatsiarpoq. Tamannalu pissutigalugu inuit qinersinissamut soqutiginnilersimapput, takuneqarsinnaammat qinersinissaq pingaaruteqartoq. Ajornartorsiummi suli qaangiutinngilaq, tamannalu inunnut sunniuteqarpoq, Anne Wangenheim oqarpoq.