Ulloq unnuarlu nalunaarusiaq: Biilinik ajutoornerit marluk, imigassartorsimallutik biilertut marluk imminullu toqunnissamik siorasaarisut arlaqartut
Politiit innuttaasunut sakkortuumik kaammattuipput imigassartorsimatilluni biilertoqartannginnissaannik. Tamassuma saniatigut politiit eqqaasitsipput pisariaqartitsinermi ikiuisussanik piareersimasoqartuaannartoq, taamatuttaarlu Tusaannga attavissatut ammajuartoq.
Grønlands Politi
Tallimanngornermi ullup qeqqata missaani Kalaallit Nunaanni Politiit nalunaarfigineqarput Nuummi biilit ajutoorsimasut, taakkulu RAL-ip Starkillu akornatigut imaanut nakkarsimasut. Nalunaarut tallimanngornermi nal. 11.43 tiguneqarpoq.
- Qujanartumik aquttuusoq biilit kivinnginnerini niusinnaasimavoq nunamullu qaqilluni. Ajutoornermi inunnik ajoqusertoqanngilaq, pigaartut pisortaat Aputsiaq Hansen Sermitsiamut oqarpoq.
Taassuma aamma ilisimatitsissutigaa biilit ullup ingerlanerani imaanit qaqinneqaqqittoq.
Imigassartorsimatillutik biilertut arlallit
Arfininngornerup ullaassaani ajutoortoqaqqippoq. Tamatumuuna Uummannami biilit ajutoorput. Ajutoortoqarneranik nalunaarut 04.34 tiguneqarpoq.
- Tassani biilertoq pasineqarpoq imigassartorsimatilluni biilinik ingerlatsisimasutut. Ajutoornermi inunnik ajoqusertoqanngilaq, Aputsiaq Hansen oqarpoq nangillunilu:
Tusaannga
Meeqqat, inuusuttut, inersimasullu tamarmik oqaloqateqarnissamik, allaqateqarnissamilluunniit pisariaqartitsisut Tusaannga attavigisinnaavaat. Ajornartorsiutit annikikkaluarunik annertuppataluunniit siunnersuisartut ikiuinissamut piareersimapput. Kinaluunniit ajornartorsiutiminik kisimiilluni nammassissanngilaq.
Tusaannga ulloq unnuarlu, sapaatip akunnerata ulluini tamani ammasarpoq.
Tusaannga - oqarasuaat 801180
SMS 1899
- Politiinit sakkortuumik kaammattuutigaarput inuit imigassartorsimatillunik biilinik ingerlatsisaqqunagit. Ajutoornermi biilertoq kisimi navianartorsiortinneqanngilaq, aammali allanik navianartorsiortitsisinnaasarluni. Imigassartorsimatillutit biilimik ingerlatsinak, biiliutsigit taxarilluunniit, nammineq allallu navianartorsiortinnagit, pigaartut pisortaat oqarpoq.
Biilertartut allat marluk aamma unitsinneqarput, imigassartorsimallutik biilersimasutut pasineqarlutik. Taakku marluk tamarmik Nuummiipput.
Imminut toqunnissamik siorasaarisut amerlanerusut
Politiit nalinginnaasumik suliassaasa saniatigut Kalaallit Nunaanni Politiit imminut toqunnissamik siorasaarisunik arlalinnik aamma attavigineqarsimapput.
Kalaallit Nunaanni Politiit pigaartuisa pisortaat innuttaasunut kaammattuuteqarumavoq.
- Politiit soorunami ikiuutissapput, toqqissisimanngittoqartillugu ikiuuttussaangatta. Aammali kaammattuutigiumavara misigissutsitigut ilerasunnermi ilungersornermiluunniit Tusaanngamut saaffiginnittarnissaq. Tusaanngami aamma issiasoqarpoq, innuttaasunik attaveqartunik ikiuunnissamut piareersimasunik, Aputsiaq Hansen oqarpoq.
