USA-mik oqaloqateqarnerup pitsaanerulernissaa ataatsimiititaliami ilaasortap neriuutigaa
USA-mit, Danmarkimit nunatsinnillu aallartitat suleqatigiissitami qanimut naapinnissaat, Nunanut Allanut Sillimaniarnermullu ataatsimiititaliami ilaasortap Nivi Rosingip (IA) neriuuteqarfigaa.
- Partiitut qalipaatigut tunukkallarlugit ataatsimoornerput assut nuannaarutigaara. Innuttaasorpassuittaaq tapersersuinerat suut tamarmik oqinnerunerannik misigititsivoq nukissamillu tuniseqaluni, Inatsisartuni Nunanut Allanut Sillimaniarnermullu Ataatsimiititaliami ilaasortaq Nivi Rosing taama oqarpoq.
Assiliisoq: OSCAR SCOTT CARL
Nivi Rosing tallimanngornermi makiaarpoq, Folketingimimi Nunanut Allanut Tunngasunut Ataatsimiititaliaq ullaaq tallimanut ataatsimiimmat peqataavoq.
Rosing Inatsisartuni Nunanut Allanut Sillimaniarnermullu Ataatsimiititaliami ilaasortaavoq. Nunarput pillugu ataatsimiittoqartillugu ataatsimiititaliaq ilaasortaaffigisaa Folketingimi Nunanut Allanut Ataatsimiititaliaq peqatigalugu ilisimatitsissuteqarfigineqartarpoq.
- Ataatsimiinnerni eqqartorneqartut isertuussaasarmata eqqartorneqartut pillugit oqaaseqarsinnaanngilanga. Kisianni oqaatigisinnaavara nunarput pineqartillugu ilisimatinneqartalernerput kiisami piviusunngormat.
- Paasissutissat assigiit pissarsiarisarnissaannik Pipaluk Lyngip piumasaqarnera iluaqutaavoq, ataatsimiititaliami ilaasortaq oqarpoq.
Inoqatinut attaveqatigiittarfitsigut oqallinneq eqqumiitsoq
Nunarput pillugu Washingtonimi sisamanngornermi ataatsimiittoqarsimasoq, nunanut allanut ministerip Lars Løkke Rasmussenip ataatsimiinnerup kingorna oqaatigaa.
Nunat taakkua pingasut akornanni pissutsit sapaatip-akunnerata matuma siorna killiffimmut utersimasut taassuma aamma oqaatigaa. Løkkemi nunanullu allanut naalakkersuisoq Vivian Motzfeldt USA-mi præsidentip tullersortaanik J.D. Vancemik USA-milu nunanut allanut ministerimik Marco Rubiomik sapaatip-akunnerata siuliani ataatsimeeqateqarput. Tassanilu suleqatigiissitamik pilersitsisoqassasoq isumaqatigiissutigineqarpoq.
Apeqqut: Trumpip sakkulersortoqarnissaanik siorasaarinini tunuartimmagu oqiliallappit?
- Isumaqarpunga ajunngitsuusoq, oqallinnermi eqqumiitsoq inoqatinut attaveqaatitigut ingerlanikuuvoq. Qanimut naapinneq iluaqutaavoq, Nivi Rosing oqarpoq nangillunilu:
- Senatorit USA-meersut sapaatip-akunnera kingulleq naapippagut, inoqatinut attaveqaatit aqqutigiunnaarlugit qanimut naapillugit oqaloqatigineri toqqissiallannarpoq. Qanoq maniguutsigineri ataqqeqatigiiffiusumillu oqaloqateqarusunneri malunnarpoq.
Nakkutiginnittoqarnerulissagunarpoq
Amerikamiunik oqaloqateqarneq pitsaanerulissasoq, russillu aamma kinamiut nunatta imartaaniinnerarlugit Trumpip oqaaseqarnera tunuartinneqassasoq Nivi Rosingip neriuutigaa:
- Nakkutiginninnerup annertunerulersinnaanera neriuppunga isumaqatigiissutigisinnaagipput. Neriuppungalu inoqarfiunngitsuni tamanna pissasoq.
- Imaassinnaasoq radariliisoqarsinnaasoq, taamaalilluni russinik kinamiunillu nunatta imartaaniinneranik oqaaseqaqattaarnera eqqunngitsuusoq uppernarsineqarniassammat. Taama eqqumiikkaluamik oqaaseqaqattaarnera eqqunngitsuummat uppernarsaaserneqartariaqarpoq. Tassa inuttut isumaga, Nivi Rosing oqarpoq.
Kalaallit Nunaata pisiassaannginnera Trumpip ataqqisariaqaleraa Nivi Rosing aamma isumaqarpoq:
- Kalaallit USA-mit nunamilluunniit allamit pisiarineqarnissarput kissaatiginngikkipput paasilissagaa neriuutigaara. Pisiassaanngilagummi.
Partiit akimorlugit ataatsimoorneq
Innuttaasorpassuit pisiarineqarusunnginnerat akerliussutsimik sapaatip-akunnerata naanerani takutitseqattaarnikkut takutinneqartoq Nivi Rosing aamma isumaqarpoq:
- Neriuutigaara pitsaasumik oqaloqatigiinnermik ataqqinninnermillu pilersitsissasoq.
Apeqqut: Politikeriugavit pisut qeqqanniipputit, qanoq ippa?
- Partiitut qalipaatigut tunukkallarlugit ataatsimoornerput assut nuannaarutigaara.
- Innuttaasorpassuittaaq tapersersuinerat suut tamarmik oqinnerunerannik misigititsivoq nukissamillu tuniseqaluni.
