USA-p FN-imi aallartitaata Danmarkip Kalaallit Nunaanni iliuuserisimasai isornartorsiorai

Mike Waltz siullermik aperineqarpoq Kalaallit Nunaat pillugu aaqqiagiinnginneq pissutigalugu USA-p suleqataasa USA tatigiunnaarsinnaaneraat, præsident Donald Trumpip nuna taanna pigilerusummagu.

Trump pissutigalugu iligisat illersornissamut aningaasanik atuinerulernissaannik neriorsuuteqarmata, NATO nukittunerulersimasoq Waltz isumaqarpoq.

— Raketit Issittoq qulaallugu timmissapput

Rusland Issittumi sakkutooqarnikkut annertusaasoq, Kinalu atomimik sakkussiornerminik annertusaasoq kingorna erseqqissarpaa:

- Raketit taakkua tamarmik USA saassunneqalerpat Issittoq qulaallugu timmisussaapput. Præsident Trumpip saassunneqarnissaq utaqqiinnarnavianngilaa, Mike Waltz Fox Newsimut oqarpoq.

USA-p Finlandimit sorsuutinik sikumik aserorterutinik pisisussanngortoq erseqqissarpaa, Waltzilli oqaatigaa Danmark Canadalu "sikumik aserorterutinik oqimaatsunik“ peqanngitsut.

— Kalaallit Nunaat qatangiinnarneqartoq

- Danmarki assigiinngitsorpassuartigut iliulluarpoq, illersornissaqarnissarli eqqarsaatigalugu Kalaallit Nunaat qatangiinnarsimavaat, Waltz oqarpoq.

Nunatsinni nunap inoqqaavi aamma sumiginnarneqartartut aallartitap oqaatigaa, Waltzillu spiralilersuisimaneq sumiginnaanermik annertuumik taavaa, aamma oqarpoq Kalaallit Nunaanni kræfteqaleranni, tamanna "toqumut eqqartuunneqartut taaneqarsinnaasoq.

Mike Waltz isumaqarpoq Alaskami nunap inoqqaavi aningaasatigut atugarissaarnerusut.

USA-mit Danmarkimut ambassadøriusimasoq Carla Sands aamma Danmarkimut tunngatillugu taamatut isornartorsiuivoq.

Kalaallit Nunaanni kræftimik katsorsaaneq peqqinnissaqarfiup iluani suliarineqartartoq Danmarkip ukiuni aggersuni aningaasanik immikkoortitsivigaa, Kalaallit Nunaata peqqinnissaqarfiata pitsanngorsarnissaanik ikiuutissatut.