USA-p sinniisortaava Nuummut tikippoq
USA-p Kunngeqarfimmi sinniisortaava Ken Howery Kalaallit Nunaata, USA-p Danmarkillu ataatsimiinnerinut peqataajartorluni Nuummut tikippoq.
USA-p sinniisuata Vivian Motzfeldt (S) Nuummi naapipippaa. Motzfeldtip ukiup qaangiuttup unammillernartuunera, Naalakkersuisut killiffiup nalilersornissaa soqutigisaqaqatigiinnermillu USA-mik suleqateqarnerup qanoq ineriartortinneqarsinnaaneranik oqaloqatigiinnissaq qilanaanaarineqartoq ataatsimiinnissaq ataasinngornermi marlunngornermilu sioqqullugu oqaatigaa.
Assi: Oscar Scott Carl
OBS: Naalakkersuisoq Vivian Motzfeldt USA-llu aallartitaa Ken Howery Hans Egedep Illuani ataasinngornermi ullaap tungaani tusagassiortunik nal. 09 katersortitsissapput. Tusagassiortunik katersortitsineq maana malinnaaffigisinnaavat.
Joint Committeep aamma Permanent Committeep ukiumoortumik ataatsimiinnerat Nuummi ataasinngornermi marlunngornermilu ingerlanneqassaaq, USA-llu Kunngeqarfimmi sinniisuutitaa Ken Howery peqataassaaq.
Amerikamiut Nuummi sinniisoqarfia Facebookimi quppernermini taamatut paasissutissiivoq.
Sinniisunngorlaaq ataatsimiinnernut peqataaniarluni Kalaallit Nunaannut siullerpaamik tikeraartoq, nalunaarummi atuarneqarsinnaavoq.
Ken Howery oktobarimi aallartitatut akuerineqarpoq, aallartitaqarfiullu saqqummiussaata assitaani tikeqqammerluni nunanut allanut tunngasunut naalakkersuisoq Vivian Motzfeldt (S) ataatsimeeqatigigaa takuneqarsinnaavoq.
Ataatsimiititaliani taakkunani marlunni ataatsimiinnerit Kalaallit Nunaata, USA-p Danmarkillu suleqatigiinnerannut oqaloqatigiiffiupput. Amerikami præsidentip Donald Trumpip Kalaallit Nunaata amerikamiunit pigineqalernissaanik aqulernissaanillu oqariartuuteqartarnera pissutigalugu ukioq manna ataatsimiinnerit immikkut maluginiarneqarput.
Naalakkersuisut ataatsimiinnissat pillugit pisortatigoortumik weekendimi paasissutissiipput. Naalakkersuisut oqaloqatigiinnissat qilanaarigaat, aammali ukioq unammillernartuusimasoq, Vivian Motzfeldt tusagassiuutitigut nalunaarummi ilisimatitsivoq:
- Suleqatigiinnerni suniluunniit tatigeqatigiinneq ataqqeqatigiinnerlu toqqammaviupput, taamaammallu ukiut qaangiuttut ilungersunartuusimanerat isertuunneqassanngilaq. Taamaammallu killiffissiuinissaq qanorlu qanittumik iligiittut immikkoortuni ataatsimut soqutigisatsinni suleqatigiinnermik ineriartortitsisinnaanitta oqaloqatigiissutiginissaa Naalakkersuisut qilanaaraat.
Sinniisup tikeraarnera pillugu sinniisoqarfimmiit saqqummiussaq ataani atuarsinnaavat:
