USA soqutiginninnerminik nalunaaruteqareersorlu EU-mi qullersap Kalaallit Nunaat tapersersorniarlugu neriorsorpaa
Nunap oqartussaassuseqarnera tunngaviuvoq pingaaruteqartoq, Amerikamiut Kalaallit Nunaannik soqutiginnileqqinneranni von der Leyen oqarpoq.
EU-kommissionip siulittaasua Ursula von der Leyen tallimanngornermi Bruxellesimi tusagassiortunik katersortitsinermi. USA-p Kalaallit Nunaannut immikkut aallartitamik ataasinngornermi toqqaanerata kingorna X-imut allappoq EU Danmarkimut Kalaallillu Nunaannullu tapersersuisoq. (Arkivfoto)
Assi: Stephanie Lecocq/Reuters
EU-p Danmark kalaallillu tapersersorpai.
EU-Kommissionip siulittaasua Ursula von der Leyen, Amerikamiut Kalaallit Nunaannut immikkut aallartitamik toqqaanerata kingorna taama oqarpoq.
- Nunap immikkoortuanik ataqqinninneq oqartussaassuseqarneralu nunat tamalaat akornanni tunngaviusumik inatsisaapput. Tunngaviit pingaaruteqartuupput, EU-p nunaaniinnaanngitsoq, nunarsuarmili nunat tamalaani tamarmi.
- Danmark kalaallillu inuiaat tapersersorpavut, von der Leyen X-imi allappoq.
Nangilluni oqarpoq issittumi isumannaatsuunissaq EU-p pingaarnerpaatikkaa, EU-llu tamassuma attatiinnarnissaanut iligiit suleqatigiillu suleqataaffigerusukkai.
USA-p præsidentiata Donald Trumpip politikeri Jeff Landry Kalaallit Nunaannut immikkut aallartitatut toqqarpaa.
Landryp nalunngilaa Kalaallit Nunaat USA-p isumannaallisaaneranut qanoq pingaaruteqartigisoq, toqqaanermini Trump oqarpoq.
Kalaallit Nunaat eqqartortillugu Trump siusinnerusukkut arlaleriarluni nunap sillimaniarnera eqqaasarpaa. USA-p Kalaallit Nunaat tiguassagaa oqartareerpoq, isumaqarami nunap isumannaatsuunissaanut pisariaqartoq.
Jeff Landryp, Louisianami guvernøriusup, Amerikamiut nunamik tiguaanissaa aamma tapersersorpaa.
- Præsident Donald J. Trump ilumoorluinnarpoq. Kalaallit Nunaata USA-mut ilaalernissaa qulakkeertariaqarparput. Taakkununnga nuannerluinnassaaq, uagullu aamma nuannaarutigissavarput. Taamaasiorniarta, X-imi januarimi allappoq.
Amerikamiut Kalaallit Nunaannik soqutiginnileqqilermata USA-p Danmarkimi aallartitaa Ken Howery nunanut allanut ministeriaqarfimmi oqaloqatigiumallugu Danmarkimit qaaqquneqarpoq.
Tamanna sioqqullugu nunanut allanut ministerip Lars Løkke Rasmussenip (M) Jeff Landryp toqqarneqarnera isornartorsiorpaa.
- Toqqaaneq pillugu aalassassimavunga, immikkullu toqqarneqartup oqaatigisai pingaartumik aalassaatigaakka, akuerineqarsinnaanngillallu, ataasinngornermi oqarpoq.
Statsminister Mette Frederiksen (Soc) aamma Kalaallit Nunaanni naalakkersuisut siulittaasuat Jens-Frederik Nielsen (D) aamma pisoq qisuariarfigaat.
- Nunat killeqarfii naalagaaffiillu oqartussaanerat nunat tamalaat inatsisaanni tunngavilerneqarsimapput. Nunat nunanit allanit tiguaannarneqarsinnaanngillat. Nunap isumannaatsuunissaa tunngavilersuutigigaluaraanniluunniit, taakku ataatsimoorlutik oqaaseqaateqarput.
/ritzau/
