Uummannami ikuallattoq qamisarneqarpoq: Qatserisartut ikiuiartorlutik aallarput

Qatserisartut Ilulissaneersut, innaallagassiorfiup ikuallattup qamisarnissaanut ikiuukkiartorlutik, Uummannamut maanna ingerlaarput. Avannaata Kommunia taama nalunaarsimasoq, namminersorlutik oqartussat tusagassiorfinnut nalunaaruteqarlutik ilisimatitsipput.

- Naalakkersuisunit tamanna ilungersunartutut isigineqarpoq ineriartornerlu malinnaaffigilluarneqarluni. Nukissiorfiit najukkamilu upalungaarsimanermi oqartussaasut pisut pitsaanerpaamik naammassiniarlugit, aammalu Uummannami innuttaasut pisariaqartinneqartunut pilersorneqarnissaannik pilertornerpaamik qulakkeeriniarlutik sulipput, Avatangiisinut, Pinngortitamut, Nukissiornermut Ilisimatusarnermullu Naalakkersuisoq Jørgen Rosbach oqarpoq.

Ataasinngornikkut ualikkut ikuallanneq suli qamisarneqartuarsinnarpoq. Ikuallanneq qanoq aallartissimanersoq sunalu pissutaanersoq suli paasineqanngitsoq, Naalakkersuisut tusagassiorfinnut nalunaaruteqarlutik allapput.

Kalaallit Nunaanni Politiit innuttaasunut ualisoq kaammattuipput matut igalaallu matoqqatinneqassasut, ikuallattoqarnerani peqqissutsimut ulorianarsinnaasumik pujuliortoqarnera pissutigalugu.

Attaveqaatinut sunniuteqartoq

Ikuallanneq pissutigalugu Uummannami innaallagiaqanngilaq. Nukissiorfiilli ualilluinnartoq ilisimatitsipput innaallagiaqalertitsiniarluni maanna sulisoqartoq.

Illoqarfimmi tv-kkut, radiokkut, mobilitigut internettikkullu attaveqaatit sunnerneqarsinnaapput. Attaveqaatilli Uummannamiinnaanngitsoq sunnerneqaratarsinnaaneri aamma eqqumaffigeqquneqarput:

- Sakkortusaaviit mobilikkut attavillit nødgeneratorimut sarfalersorneqanngillat. Battereerukkunik mobilikkut attaviit attaveerutissapput.

- Saattumut attaviinnut sakkortusaavik mobilikkut attavilimmut atavoq. Batteereerukkuni Saattup attavii aamma kipissapput. Nødgeneratori ingerlavoq, ilimaginngilarpulli qamissasoq. Qamissagaluaruni Uummannami attaviit aamma Uummannap akianut attaviit tamarmik attaveerutissapput, Tusass nittartakkamini allappoq.