Uummannami nutaamik innaallagissiorfeqalissasoq

Uummannami nukissiorfik, innaallagissiorfiusoq, ataasinngornermi ulloqeqqalersoq ikuallappoq. Taannalu ikuallattoq ima ajorsisimatigaaq allaat atorneqaqqissinnaajunnaarluni, Nukissiorfiit pisortaa, Johan Danielsen, Sermitsiamut oqarpoq.

- Piffissami atuinerup annerpaaffianni innaallagissiorfimmi tapitartuut, illoqarfimmi atorneqartartoq, tamarmi ikuallappoq. Atortut ikuallattut annertupput. Nalunaarfigineqarnerput malillugu tassani innaallagissiorfimmiittut tamarmik atorsinnaajunnaarput, Johan Danielsen oqarpoq.

Ikuallanneq qanoq ililluni aallartissimanersoq tamakkuninnga misissuisartut maanna misissoraat taanna aamma oqarpoq. 

- Massakkumut oqaatigineqarsinnaanngilaq suna peqqutaalluni ikuallanneq pilersimanersoq. Nalunaarusiortoqareerpat taavalu uagut nalunaarusiaq taanna tigoreerutsigu avammut saqqummiussinnaanissaa neriuutigaarput, pisortaq oqarpoq.

Atorsinnaanngitsoq alla

Innaallagissiorfiup ikuallattup eqqaaniippoq innaallagissiorfik tunngaviusumik innaallagissiutaasoq. Taannali aamma tamakkiisumik atorneqarsinnaanngilaq. 

- Qujanartumik sanianiittumik aamma peqarpugut. Taannali akornuteqarpoq, kingoraartissalli maanna utaqqivagut. Pissarsiarisimalerutsigit innaallagiamik pilersuutitut atulissuarput, Johan Danielsen oqarpoq.

Innaallagissiutit tamarmik atorsinnaanngimmata illoqarfinnit allanit tikiussat Uummannami innaallagiamik maanna pilersuisuupput. 

- Generatorit containerimiittut Ilulissanit Aasianniillu Uummannamut nassiunneqarnikut taakkua atorallassapput, Johan Danielsen oqarpoq.

Taakkua tunngaviusumik innaallagissiorfik pilersuisinnaalerpat atorunnaarlutik illoqarfimmi sillimmataaginnarnissaat naatsorsuutaavoq.

Nutaaq sananeqalereertoq

Uummannami innaallagissiorfiup ikuallannera sioqqullugu nutaamik innaallagissiorfeqalernissaq ingerlatseqatigiiffiup aalajangereersimavaa. Illutassaalu maanna KJ Greenland A/S-imit sanaartorneqarluni aallartinneqareerpoq. 

Innaallagissiorfissaq pilersaarutit malillugit ukiut marluk qaangiuppata atulissaaq.

- Uummannami innaallagissiorfik ukiorli sananeqarluni aallartereernikuuvoq. Naatsorsuutigaarput 2028-ip ingerlanerani atulissasoq. 

- Kisianni nalunartoqartuaannarpoq. Kinguaattoortoqariataarsinnaavoq, Johan Danielsen oqarpoq.

Innaallagissiorfiup sanaartorneqarnera atortussat tamaasa pisiarineqarnerat ilanngullugu suliffeqarfimmut akisussaaq. Pisortap sanaartorneq pilersitsinerlu 100 millionit koruunit sinnerlugit akeqarnissaa naatsorsuutigaa.

Aningaasarliortoq

Nukissiorfiit ukiumoortumik 2024-imut nalunaarutaat naapertorlugu suliffeqarfik ukiumi tassani 60,2 millionit koruuninik amigartooruteqarpoq. 

Nukissiorfiilli amigartorneriinnarmik ajornartorsiunngillat. Pigisaasami iluarsartuunnissaannut aningaasat 1,8 milliardit koruunit 2022-imi amigaataasut, suliffeqarfiup siusinnerusukkut nalunaarutiginikuuaa.