Uummannap annersaa innaallagiaqaqqilerpoq – teknikkikkut aaqqitassat kingulliit aaqqinniarneqarput

Nukissiorfimmi sulisut Uummannami innaallagissamik pilersuisoqaqqilernissaa anguniarlugu unnuaq naallugu sulisimasut, innaallagissiorfik pingasunngornermi ullaakkut nalunaaruteqarpoq.

- Suliaq pitsaasumik ingerlavoq, illoqarfiullu immikkoortortaasa pingajorarterutaasa sisamaasa missaat (3/4) maanna innaallagissamik pilersorneqaqqilersimallutik.. Atortut ilaannut atatillugu teknikkikkut unammillernartut kingulliit suli aaqqiivigineqarput, kiisalu illoqarfiup sinnerani pilersuinerup patajaatsuunissaa sulissutigineqarluni, Nukissiorfiit allapput.

Sumiiffiit ilaanni piffissami sivikitsumi suli qamittoortoqartarsinnaasoq aamma paasissutissiissutigineqarpoq. Sulisut pilersuinerup iluarsinissaa anguniarlugu sulipput.

Nukissiorfiit Uummannami innuttaasut naammaginnarnerannut paasinninnerannullu qutsavigai, aamma sulisut suleqataasullu illoqarfiup pilersorneqarlualeqqinneqarnissaa anguniarlugu ulloq unnuarlu sulisut qutsavigineqarlutik.

- Pisoq malinnaaffigaarput, nutaarsiassaqaqqilerutta paasissutissanik nutaanik saqqummiissaagut, Nukissiorfiit allapput.

Illoqarfiup innaallagissiorfia ataasinngormat ikuallappoq, assilisanilu ikuallannera ajoquseerujussuarsimasoq takuneqarsinnaavoq.

Taamaattumik Nukissiorfiit innaallagissamik pilersuisoqaqqilernissaa anguniarlugu Uummannamut umiarsuarmik sarfalersuisussamik aallartitsisariaqarsimapput, taannalu marlunngornermi unnukkut tikippoq.