Vance Kalaallit Nunaannut isumaqatigiissut pillugu: Pigeriikkatsinniik annermik pissaagut

USA-p præsidentiata tullia J.D. Vance Kalaallit Nunaat pillugu isumaqatigiissut nutaaq Amerikamiut siornatigut pissarsiarisimasaannit iluaqutaanerussasoq isumaqarpoq.

- Siornatigut pissarsiatsinniit annertunerusumik pinerput qularutigineqassanngilaq, J.D. Vance The Megyn Kelly Show-imi apersorneqarluni oqarpoq.

Vancelli USA qanoq pissarsisimanersoq itisilinngilaa.

USA-p præsidentiata Donald Trumpip Kalaallit Nunaat Issittorlu pillugit isumaqatigiissuteqarnissamut sinaakkutissa NATO-mi generalsekretærimut Mark Ruttemut isumaqatigiissutigisimallugu januaarimi nalunaarutigaa. Trumpip qeqertaq perusullugu sivitsortumik piumasaqareernerata kingorna tamanna pivoq.

Trumpilli Ruttellu isumaqatigiissutaat pillugu sukumiinerusumik paasissutissaqanngilaq.

- Pissutsit aaqqikkumaartut 

J.D. Vancep USA-mi nunanut allanut tunngasunut ministeri Marco Rubio, danskit nunanut allanut tunngasunut ministeriat Lars Løkke Rasmussen (M) aamma Kalaallit Nunaata nunanut allanut tunngasunut ministeria Vivian Motzfeldt januaarip qiteqqunnerani ataatsimeeqatiginerat oqaluttuaraa.

- Oqaloqatigiilluapugut. Tamannalu nuannerluinnarpoq, europamiummi inussiarnersuupput naaperiaanissamillu piumassuseqartupilussuullutik, taamaaleriarlutik amerikamiunik suleqateqarusunnginnerarlutik tamanut ammassumik saassuppaatigut. Ajuusaaraluarpunga, kisianni ilumuunngilaq, Vance The Megyn Kelly Showimi oqarpoq.

- Pissutsit aaqqikkumaartut tamatta nalunngilarput. Isumaqarpungalu Europamut pitsaasuusoq pingaarnerpaamillu USA-mut iluaqutaassasoq. Naaperiaasoqarsimannginneraanerli USA-mullu nassuerutiginnittoqarsimannginneraanera ilumuunngilaq, Vance ilassuteqarluni oqarpoq.

Trumpip Kalaallit Nunaannut immikkut aallartitaa Jeff Landry Danmarkip, Kalaallit Nunaata USA-llu akornanni pissutsinut aaqqiissutissatut sinaakkutissat pillugit isumaqatigiissuteqartoqarnera pillugu qanittukkut paasissutissiivoq.

- Pissarsissutigissavarput

Nunatsinnut tunngatillugu sinaakkutissatut isumaqatigiissut, USA-p Danmarkillu illersornissaq pillugu 1941-mi 1951-imilu isumaqatigiissutaannik tunngaveqartoq, Jeff Landryp Amerikamiut tusagassiorfiannut The New York Times-imut oqaluttuaraa.

Vancep Danmark "Natomi suleqatit pitsaanerpaat ilaattut" apersorneqarnermini taavaa, Danmarkilli isumannaallisaanermut aningaasaliissutai Ruslandimut Kinamullu sanilliullugit annikippallaartut, taanna isumaqarpoq.

Nunatsinnik piginnittuuneq eqqartorpaa aamma Ruslandip Kinalluunniit rakettinik igeriuttakkanik illersuuteqarneq sunnerunikku, USA-p annaassinissaa oqaluttuaralugu.

- Uagut pissarsissutiginavianngilarput. Tamanna naapertuilluanngitsuliorneruvoq. USA-p Kalaallit Nunaat piginngilaa uagullu iluaqutissartaanik pissarsinavianngilagut.

- Taamaattumik malittarisassat allanngulaartigit: USA-p rakettinik igeriuttakkanik illersuuteqarnermut aaqqissuussat nunarsuarmiittut tamarmik illersussappagit, illuatungaani aamma pissarsissutigisariaqarparput, Vance oqarpoq.

/ritzau/