Vancep qinersisoqarnissaa pingaarutilik sioqqullugu Orbán tapersersorniarlugu Ungarnimut angalasoq

USA-p vicepræsidentia J.D. Vancep ministeriuneq Viktor Orbán sapaatiuppat inatsisartunut qinersisoqarnissaa sioqqullugu ataatsimeeqatiginiarlugu ataasinngornermi Ungarnimukarpoq.

Tikeraarnera Ungarnimi talerperlernik siulersuisumik tapersersuinermut ersiutaavoq, tassami Orbánip pissaaneqarnerulernissani qinersinissaq qanilliartortillugu ajornakusoortippaa.

- USA-p Ungarnilu akornanni attaveqarnermut tunngasut arlallit eqqartussavagut, J.D. Vance USA-p illoqarfiisa pingaarnersaanni Washington D.C.-mi Andrews Air Force Basemiit aallarami tusagassiortunut oqarpoq.

- Soorunami Europa, Ukraine allallu pingaaruteqarluinnassangatinneqarput, USA-p vicepræsidentia nangilluni oqarpoq.

Vancep Orbán ataatsimeeqatiginissaa aamma USA-p Ungarnilu suleqatigiilluarnerat pillugu oqalugiarnissaa naatsorsuutigineqarpoq, vicepræsidentip allaffia ilisimatitsivoq.

Vance 41-nik ukiulik USA-mi naalakkersuisut akornanni Europami naalakkersuisunik siumukartuartunik akulerutsitsisunillu sakkortunerpaamik isornartorsiuisarpoq. Europami partiinik talerperliunik tapersersuilluarnerpaanut aamma ilaavoq.

Viktor Orbán Ungarnimi ukiuni 16-ini naalakkersuisuusimavoq. Misissuisartut naapertorlugit qinigaaqqinnissaminut periarfissaqarnerulerniarluni Ruslandimit isertortumik tapersersorneqarsimavoq.

Ungarnimili qinersisartut nutaamik misileerusuppasipput. Illuatungiliuttut partiiat Tisza, Europamut tapersersuisoq, Péter Magyarimit siulersorneqartoq, ajugaalluinnassasoq isumasiuisitsisarfiit attuumassuteqanngitsut isumasiuinerinit erserpoq.

Magyarip illuatungiliuttut Ungarnimi naalakkersuisup naalakkersuineranut unammillersinnaasut ukiut marluk ingerlanerinnaanni pilersippai.

Naalakkersuisunulli tapersersuisut Orbánip Fidesz-ip aamma KDNP-p naalakkersuisooqatigiivi ajugaajumaartut akerlianik siulittuipput.

USA-p præsidentia Donald Trumpip præsidentip illorsuanut uteqqinnerata kingorna naalakkersuisuisa nunani allani qinersinernut akuliukkusunnginnermik ileqqoq atorunnaarsimavaat.

Trumpilli naalakkersuisui siulersuisunik isumaliutersuutaannut diplomatiikkullu pingaarnersiuinerminnut naapertuuttumik ersarissumik tapersersuipput.

USA-p nunanut allanut ministeria Marco Rubio Orbán qinersinermi iluatsitsilluarnissaanik kissaallugu februaarip qiteqqunnerani Ungarnimi illoqarfiit pingaarnersaannut Budapestimut tikeraarpoq.

Orbánip pingaartumik nunasisut pillugit politikkimut tunngatillugu ukiut qulit matuma siorna Ungarnimi qimaasunik ajornartorsiortoqarnerani eqqartorneqarluartumut Trumpip naalakkersuinikkut aqutsinerat isumaqatigaa.

Trumpip Floridami Mar-a-Lago-mi najugaqarfia arlaleriarluni tiekraartarsimavaa.

J.D. Vancep nulia, Usha Vance, Ungarnimut aamma angalaqataassaaq.

/ritzau/AFP