Venezuelami politikkikkut illuatugiliuttoq Caracasimi aallarunneqartoq
Juan Pablo Guanipa Venezuelap illoqarfiisa pingaarnersaanni angutinit sakkulersorsimasunit aallarussaasoq illuatungiliuttut siuttuat Machado oqarpoq.
Politikeri illuatungiliuttuniittoq Juan Pablo Guanipa illuatungiliuttut siulittaasuata Maria Corina Machadop saniani Venezuelap illoqarfiisa pingaarnersaanni Caracasimi akerliussutsimik januaarip 9-anni 2025-mi takutitsisut. Taanna aallarussaasimasoq Machalo ataasinngornermi ullaakkut nalunaaruteqarpoq. (Toqqorsivimmit).
Assi: Pedro Mattey/Ritzau Scanpix
Venezuelami politikkikkut illuatungiliuttoq Juan Pablo Guanipa Venezuelap illoqarfiisa pingaarnersaanni Caracasimi aallarunneqarpoq.
Illuatungiliuttut siuttuat Maria Corina Machado nittartakkatigut inuit naapeqatigiittarfianni x-mi allappoq.
Angutit sakkullit inuinnartut atisalersorsimasut sisamanik biililerlutik Juan Pablo Guanipa pinngitsaalillugu aallarukkaat, Machado allappoq.
Los Chorrosimi aallarussineq pivoq.
- Piumasaraarput erngertumik iperagaassasoq, allappoq.
Aamma Guanipap ernera ataatami aallarunneqarnera nalunaarutigaa.
Nunami tassani nalunaaqutaq malillugu unnuap qeqqa sioqqullugu aallarussineq pisoq, Ramon Guanipa videoliami inuit nittartakkatigut attaveqaqatigiittarfiisigut siammarterneqartumi oqartoq, nutaarsiassaqartitsivik Reuters allappoq. Ataatani angutinit quliusunit kinaassusersineqanngitsunit sakkortuumik sakkulisartunit aallarunneqartoq oqarpoq.
Juan Pablo Guanipa qaammatit arfineq-pingasut sinnerlugit parnaarussaareerluni iperagaareersoq ilaqutaasa sapaatiummat nalunaarutigigaat, Reuters allappoq.
Venezuelami nunamut namminermut ministeri naapertorlugu siorna maajimi tigusarineqarpoq, "peqqarniisaarniarnermik aaqqissuussinermut“ siuttutut pasillerneqarluni.
Tigusarineqarnissi sioqqullugu toqqoqqasimasoq nutaarsiassaqartitsivik AFP allappoq, Machadolu præsidentimut Nicolas Maduromut akerliussutsimik takutitseqatigigaa 2025-mi januaarimi kingullermik takuneqarpoq.
Guanipa siornatigut inatsisartuni issiasimavoq Maria Corina Machadolu qaninnerpaamik suleqatigalugu, taanna siorna Nobels eqqissinermut nersornaasiuttagaanut nersornaaserneqartoq.
61-inik ukiulik Juan Pablo Guanipa iperagaavoq, oqartussaasut politikki pissutigalugu parnaarussaasunik iperaasaqattaalerneranniit qaammat qaangiuttorlu.
Tamanna pivoq Venezuelami inatsisartut siulittaasuata Jorge Rodriguezip nalunaarnerata kingorna, Maduromik januaarip aallartinnerani USA-mit pissaanermit arsaarneqarnerata kingunerisaanik, eqqissinermik ersersitsinermut atatillugu parnaarussat “amerlasuut” iperagaassasut.
700-t missaat iperagaanissamik utaqqisut inuit pisinnaatitaaffiinik illersuiniaqatigiit missingerpaat, AFP allappoq.
Juan Pablo Guanipap tigusaasimaneranik nalunaarutit pillugit Venezuelami naalakkersuisut suli oqaaseqanngillat.
/ritzau/
