Issittoq nunanit tamalaanit suli annertuumik sammineqarpoq. Norgemi Tromsømi issittoq pillugu ataatsimeersuarnermi Arctic Frontiers 2026-mi peqataasut 1.100-t sinnillit, nunani tamalaani politikerit siuttoralugit, sapaatip-akunnerani aggersumi katersuutissapput.
Ataatsimeersuarneq ataasinngornermi februaarip aappaaniit sisamanngornermut februaarip tallimaanut ingerlanneqassaaq. Ataatsimeersuarneq marlunngornermi februaarip pingajuanni ammaanersiorlugu oqallitsitsinermi Issittumi Pissutsit Qanoq Innerat (Arctic State of Affairs aaqq) sammineqassapput.
Issittoq nunanit tamalaanit suli annertuumik sammineqarpoq. Norgemi Tromsømi issittoq pillugu ataatsimeersuarnermi Arctic Frontiers 2026-mi peqataasut 1.100-t sinnillit, nunani tamalaani politikerit siuttoralugit, sapaatip-akunnerani aggersumi katersuutissapput.
Ataatsimeersuarneq ataasinngornermi februaarip aappaaniit sisamanngornermut februaarip tallimaanut ingerlanneqassaaq. Ataatsimeersuarneq marlunngornermi februaarip pingajuanni ammaanersiorlugu oqallitsitsinermi Issittumi Pissutsit Qanoq Innerat (Arctic State of Affairs aaqq) sammineqassapput.
Kalaallit Nunaanni politikikkut pisuni qitiusumik inissisimasoq nunanut allanut tunngasunut ilisimatusarnermullu naalakkersuisoq Vivian Motzfeldt, Norgemi nunanut allanut tunngasunut ministeri Espen Barth Eide, EU-p nunanut allanut tunngasunut pisortaa Kaja Kallas Canadamilu generalguvenøri, ICC-milu siornatigut siulittaasoq, Mary Simon pingaarnertut peqataasut ilagaat.
Tusagassiortut 120-t peqataanissat nalunaarutigineqartoq
Nunanit tamalaanit tusagassiortut soqutiginninnerat annertuvoq, tusagassiortullu 120-t sinnillit nunanit 17-ineersut Arctic Frontiersimut peqataanissamut akuerineqarput.
Tromsømi ataatsimeersuarnermi ministerit ilaatigut Tuluit Nunaannit, Savalimmiuniit Islandimillu aamma Finlandimi Sverigemilu inatsisartunut ilaasortat peqataassapput.
Ataatsimeersuarnermi naalakkersuisut siuttui, politikerit, diplomatit, inuussutissarsiortut, nunap inoqqaavinut sinniisut tusagassiortullu Tromsømi, issittup killeqarfiata avannaani 320 kilometerinik ungasitsigisumiittumi, Issittup siunissaa pillugu oqallinnissamut ataatsimeeqatigiinissamullu naapipput.
Vivian Motzfeldt USA-p præsidentiata Donald Trumpip Kalaallit Nunaat Kunngeqarfimmullu tatisinerata januaarimi sapaatip-akunnerini arlalinni pisup kingorna Tromsømi ataatsimeersuarnermut peqataavoq.
Akerleriinneq qasukkariartorpoq, ilaatigut USA-p Kalaallit Nunaatalu/Danmarkip Issittumi isumannaallisaanermut tunngatillugu isumaqatigiinniarnernut sinaakkutissat isumaqatigiissutigigamikkit.
Arctic Frontiersimit tusagassiuutitigut nalunaarummi ataatsimeersuarneq ima eqqaaneqarpoq: “Issittumi kianneruleriartornera pillugu ataatsimeersuarneq qaffasissumik inissisimaffilik.”
Vivian Motzfeldtip saniatigut nunanut allanut ilisimatusarnermullu naalakkersuisoqarfimmi pisortaq Inuuteq Holm Olsen aamma Folketingimi ilaasortaq Aaja Chemnitz peqataassapput.
Arctic Frontiers nunat tamalaat issittoq pillugu ataatsimeersuartoqartarneranni annersaat ilaraat. 2007-imi aallartinneqartoq ukiut tamaasa januaarimi/februaarimi Tromsømi ingerlanneqartarpoq.
