Vivian Motzfeldt: Nukissat tunniussasi nassarpagut

Nunanut allanut tunngasunut naalakkersuisuusimasup, Vivian Motzfeldtip (D), USA-p, Kalaallit Nunaata Danmarkillu qaammatini arlalinni ilungersunartumik inissisimareerlutik isumaqatigiissuteqarnialernerat maanna qisuariarfigaa.

Facebookimi allappoq piffissaq tamanna oqaluttuarisaanermi pingaaruteqartutut aamma USA-mit immikkut ittumik tatineqarnermik, ilaatigut Kalaallit Nunaannik tiguaanissamik kissaateqarnermik sakkutooqarnikkullu pissaaneqarnerup mattunneqannginneranik oqariartuutilik imaannaasimanngitsoq, nukittussusermilli takutitsisoq.

2026-mi januaarip 14-iani Danmarkimi nunanut allanut ministeria Lars Løkke Rasmussen (M) peqatigalugu USA-mi præsidentip tullia J. D. Vance aammalu USA-p nunanut allanut ministeria Marco Rubio ataatsimeeqatiginiarlugit, Kalaallit Nunaallu diplomati atorlugu illersorniarlugu ataatsimeeqateqassalluni Washingtonimiippoq.

Kalaallit Nunaata, Danmarkip USA-llu akornanni ataatsimiilivinnermi sekundit kingulliit ima eqqaamavai:

- Ataatsimiinnissaq ataaseq uagutsinnut periarfissiissutituaasoq sapinngisarput tamaat atorlugu ajunnginnerpaamik angusaqarfigissallugu, nalunaguli aamma qanorluunniit pineqarsinnaalluta.

- Ataaserli qularnaatsoq iseriartornitsinni ummammioraarput nukittoqqutigalugulu, tassa ilissi nukik uagutsinnut tunniussarsi - ajunngitsumik kissaassinersi tatiginninnerlu uagutsinnut tunniussarsi, allappoq.

Kalaallit Nunaat tusarnaarneqalersoq

Washingtonimi ataatsimiinnerup kingorna Vivian Motzfeldt oqaaseqarami kalaallit toqqaannartumik saaffigai:

- Asasakka nunaqqatikka, nalunngilara tamassi malinnaasusi. Ulloq una tamatsinnut pissanganarsimavoq, oqarsinnaavungali ataatsimiinneq ingerlalluarsimammat. Ataqqeqatigiinneq tunngavigalugu oqaoqatigiinnerit ingerlasimapput. Siunissami aqqutit siumut isigisumik ingerlanniarlugit isumaqatigiissimalluta, kalaallisut oqalulluni tusagassiutinut nunani allani arlalinneersunut toqqaannartumik aallakaatitsinermi oqarpoq.

Suleqatigiissitaq januaarimi pilersinneqartoq isumaqatigiissummik nunanit pingasuusunit taakkunannga tamanit akuerineqarsinnaasumik maanna piareersaasimasoq immikkut eqqaavaa.

Naalakkersuisuusimasoq oqarpoq isumaqatigiissut pingaarutilimmik alloriarnerusoq, aamma Kalaallit Nunaata siunissani pillugu aalajangiisoqartillugu peqataatinneqartariaqarnini ersersimmagu.

- Suliassalli tamaanga uninnavianngillat, ukiorpassuarni nunatta tusaaneqarusulluni naapertuilluartumillu pineqarusulluni tamaviaaruteqartuarsimanera nunarsuarmioqatigiinnit tusaaneqarpoq, nunatta takutippaa qanoq nukittutiginini nunatta takutippaa pineqartilluta tamatigut peqataasassasugut peqataagaangattalu pitsaasunik angusaqartitsillutalu angusaqartartugut, Vivian Motzfeldt allappoq.

Nunatsinni atorfilittat innuttaasullu tapersersuiuarsimasut immikkut aamma qujaniarfigai.

Isumaqatigiissut sapaatip akunnerata tulliani atsiorneqassasoq naatsorsuutigineqarpoq.