Vivianip oqaloqatigiinneq amigaataasoq ajuusaarutigaa utoqqatserlunilu

Nunanut allanut tunngasunut Naalakkersuisoq, Vivian Motzfeldt (S) Naalakkersuisuni ilaasortatut annertuumik tatisimaneqarpoq. Tamanna isertuutinngilaa. Kisianni tunuarnissaminik pilersaaruteqanngilaq.

- 2025 tamatigut ukiuuvoq sutigut tamatigut immikkut ittutut oqaatigineqartariaqartoq. Sorsuffimmiinngilagut, aammali eqqissisimaffimmiinngilagut, soorlu Statsiministeri oqarnikuusoq. Tamannalu malugivarput nunanut allanut, - sillimaniarnermut illersornissamullu tunngatillugu suliassaqarfinni. Nunanut allanut sillimaniarnermullu tunngatillugu arlalissuarnik annertuunillu uagutsinnut pingaarutilinnik isumaqatigiinnernik ingerlataqarsimavugut ineriartortitsillutalu, tamakkulu annertuumik nukinnik atuiffigisariaqarsimavagut sulilu atuiffigalugit, tamannalu isumaqarpoq angusaqarniarluta piffissap annersaani sukkasuumik sulinissarput ingerlattariaqarsimagipput, anguniarlugu inuiaqatigiinnut kalaallinut iluaqutaasussanik angusaqarnissaq, Vivian Motzfeldt oqarpoq nangillunilu:

- Suliassatta pingaarnersaraat inuiaqatigiinnut kalaallinut pitsaanerpaamik angusaqarniarnissarput, tassa nunatta inuisalu soqutigisai aallaavigalugit sulilluta sapinngisatsinnillu sunniiniartarluta, nunarsuarmimi eqqissiviilliorfiusumi nunat naleqqussartut assigalugit aamma uagut naleqqussarpugut. Misigisimavungalu tamanna maannamut angusaqarfigilluarsimagipput, aamma qujanartumik politikkikkut anguniakkat ersarissut nunanut allanut,- sillimaniarnermut illersornissamullu politikkikkut pilersaarusiatsinniittut tunngavigalugit, pilersaarummi taanna naalakkersuisooqatigiinnissamut isumaqatigiissummi nangittumik ingerlatissallutigu aalajangiunnikuuarput, qinigaaffiullu ingerlanerani nutartissamaarparput.

Ulloq unnuarlu sulineq 

Nunanut allanut sillimaniarnermullu ataatsimiititaliamit ilisimatinneqartarnissamik akuutinneqarnissamillu piumasaqaatigineqartunut tunngatillugu, Vivian Motzfeldt erseqqissaavoq suliassat amerliartuinnartut pissutigalugit nammineq naalakkersuisutut ataatsimiititaliamut paasissutissiinissamut oqaloqateqarnissamullu aammalu § 37 tunngavigalugu apeqqutinut piffissaq eqqorlugu malinnaasinnaajunnaarsimallutik.

- Nunanut allanut naalakkersuisoqarfik, naalakkersuisoqarfiit allat assigalugit sipaarniarnernik ukioq manna eqqugaasimavoq, nunatta aningaasaqarnikkut inissisimanerata nukittorsarneqarnissaanut anguniagaqarnitsinni. 

- Tamanna isumaqarpoq, allaffeqarfimmi sulisut ikittuinnaareersut, arlaleriarlutik ulloq unnuarlu sulisariaqartarsimasut, tamatumalu malitsigisaanik qaangiuttoornerpassuit malitsigisaannik sulinngikkallarnissamut (afspadsering) katersat amerlasoorujussuanngorsimapput, sulinngikkallarnissamulli periarfissaqarpianngillat, suliassanut angummanniarneq pissutaalluni.

Ajuusaarpoq utoqqatserlunilu

Vivian Motzfeldt erseqqissaavoq, ataatsimiititaliap apeqqutaanut akiniaaluusaartarnerit aammalu aalaakkaasumik ilisimatitseqatigiilluni oqaloqatiginnittannginnerit kiisalu § 37 tunngavigalugu apeqqutinut akissutit kinguaattooqqasimanerannut arlaannaatigulluunniit utoqqatsissutitut atornianngikkini, kisiannili naalakkersuisoqarfiup ulapinnerujussua takutinniaannarini.

- Inatsisartut aammalu ataatsimiititaliap kissaataannik piumasaqaataannillu soorunami naammassinnittussaavunga, taamaattumik assut ajuusaarpunga  tamakkiisumillu utoqqatserfigaakka, pingaartumik nunanut allanut sillimaniarnermullu ataatsimiititaliamut sumiginnaasutut misigititsisimagama. 

- Uanga nammineq neriorsussavara oqaloqatigiinneq annertunerusoq periarfissinniarlugu aammalu ataavarnerusumik tamanna ullorsiutini inissaqartissallugu sulissutigissavara, qanorluunniit uanga naalakkersuisoqarfigalu ulapitsigigaluarutta. 

§ 37-mut apeqqutit akissutissaannik amigaateqarnermut tunngatillugu Vivian Motzfeldt (S) oqarpoq maanna apeqqutit ikittuinnaat suli akineqanngitsut kiserngoruttut.

Tunuarnissaminik pilersaaruteqanngilaq

Inatsisartut nunanut allanut sillimaniarnermullu ataatsimiititaliaata Naalakkersuisuni ilaasortamik Vivian Motzfeldtimik (S) sakkortuumik isornartorsiornera tunngavigalugu naalakkersuisumut tunuarniuteqarnissamik eqqarsalersitsinngilaq:

- Soorunami ataatsimiititaliap isornartorsiuinera tusaatissatut tiguara, tatigeqatigiinnerullu pilerseqqinnissaa anguniarlugu sapinngisara tamaat iliuuseqarfigissavara, kisianni tunuarniarnissara pilersaarutiginngilara, paarlattuanilli  oqaatigeriikkattut, Inatsisartut, pingaartumik ataatsimiititaliaq tusarnaarnerussavakka, isornartorsiutigineqartullu iluarsiniarlugit iliuuseqassaanga,  nunanut allanut tunngasunut Naalakkersuisoq, Vivian Motzfeldt (S) naggasiivoq.