Aalisarnermut inatsit allanngortinneqassanngitsoq

PNNP (Pisassiissutit Niuerutigineqarsinnaasut Nammineq Pigisat) naapertorlugu qaleralinniarluni aalisarnermi 75 procentimik atuinissamik pisussaaffeqarneq aalisarnermut inatsimmi maanna ukiumi ataatsimi atuutereersumi atuutilersinneqarpoq. Tassa imaappoq aalisartup ukiumut pisassiissutit minnerpaamik 75 procentii aalisartariaqarpai, ukiunilu pingasuni tulleriinni 75 procentiinik aalisarsimanngikkaanni inatsit naapertorlugu pisassiissutigineqartut nalimmassarneqassapput, taamaaliortoqanngikkunillu pisassiissutit atorneqarsinnaanngitsut Naalakkersuisunit tiguneqarlutik pisariaqartitsisunut neqeroorutigineqartassapput. 

Pisassaqarpallaartut pisassaminnik amigaatilinnut tuniniaasarnissaat, pisassiissutillu ukiut tamaasa sapinngisamik atorneqartarnissaat tassani siunertaavoq. 

Tamanna aalisartut piniartullu kattuffiisa marluk Kalaallit Nunaanni Aalisartut Piniartullu Kattuffiata KNAPK-p aamma Sinerissap Qanittuani Aalisartut Piniartullu Kattuffiata SQAPK-p, siorna ukioq naalersoq isornartorsiorpaat, inatsillu allanngortinneqartariaqartoq taakku isumaqarput. 

Inatsilli allanngortinnissaa maannakkut piffissaasorinanngitsoq Aalisarnermut, Piniarnermut, Nunalerinermut Imminullu Pilersornermut Naalakkersuisoq Peter Borg, Demokraatit, isornartorsiuinermut akissuteqarluni ilaatigut allappoq.

Allannguinissamut piffissaanngitsoq

Naalakkersuisut aalisarnermik kattuffinnut aalisarnermik inuussutissarsiuteqarneq pillugu ataavartumik eqqartueqateqartartut, pineqartorlu pillugu oqaloqatigiinnerit ingerlajuarnissaat naatsorsuutigilluinnarini Peter Borg oqarpoq.

- Pisassat pigisat 75 procentiinik atuisussaatitaaneq angunngitsooraanni, aatsaat ukiuni imminut malittuni pingasuni pisassat pigisat ilanngarneqartariaqalissammata erseqqissaatigineqartariaqarpoq.

- Aammattaaq immikkut peqquteqavissumik, soorlu assersuutigalugu angallammik atortunilluunniit ajutooqqasimaneq imaluunniit nappaammik assigisaanilluunniit eqqugaaneq peqqutigalugit, 75 procenti angusinngitsoorsimagaanni, pisassanik ilanngaasariaqarnermit eqqorneqannginnissamik immikkut akuerineqarnissamik qinnuteqarnissaq periarfissaammat ilanngullugu erseqqissaatigineqassaaq.

- Maannangaaq inatsisip allanngortinnialereernissaa Naalakkersuisunit piffissaasorineqanngilaq aalisarnermut inatsisip ukiumi ataasiinnarmi massakkumut atuussimalereernerani, taamaattorli ineriartorneq malinnaaffigaarput, Aalisarnermut Naalakkersuisoq oqarpoq.

Piffissalli ingerlanerani allannguuteqartitsisoqartariaqarsinnaanneranik pisariaqartitsiviulersunik takutitsisoqassappat Naalakkersuisut nalilersuijumaartut, Peter Borg erseqqissaavoq.

Pakatsisoq

Siorna aamma ukioq manna sinerissami sumiiffinni amerlasuuni saarullippassuaqarpoq, tunisinermilu akit ukiut siuliinut naleqqiullugit qaffasinnerunerat ilaatigut peqqutaalluni PNNP naapertorlugu qaleralinniarlutik aalisartut amerlasuut maanna saarullinniartut, KNAPK-p siulittaasuata Pele Blytmannip erseqqissaatigaa.

- Ukiuni tulliuttuni saarullinniarneq maannakkutut pitsaasumik ingerlaannassappat, qaleralinniarluni aalisarnermi pisassiissut nammineq pigisat 75 procentiinik aalisartussaatitaanermik pisussaaffeqarneq amerlasuut naammassisinnaanngilaat.

- Taamaattoqassappallu taakku pisassaatiminnik arsaarneqassapput, tamannalu akuersaarneqarsinnaanngilaq.

- Taamaattumik aalisarnermi inatsimmi immikkoortup uani pineqartup allanngortinneqarnissaanut Aalisarnermut Naalakkersuisup piffissaasorinngimmagu tamanna soorunami pakatsinarpoq, taanna oqarpoq.

PNNP naapertorlugu qaleralinniarluni aalisarnermi 75 procentimik atuinissamik pisussaaffeqarnermi piumasaqaatit allanngortinneqarnissaat pillugu, KNAPK Naalakkersuisunut siorna ukiup naajartornerani allagaqarsimasoq, sulili akissummik tigusaqarsimanatik Pele Blytmann erseqqissaavoq.