Aallarnisaasup Greenland Airports naammagittaalliuutigigaa

- Greenland Airportsimiit unammillerneqalernissarput annilaangatigaara, aallarnisaasoq Mads Petersen oqarpoq. Taanna Arctic Unmanned suleqatigalugu Kangerlussuarmi droneneqarfimmik pilersitsisuuvoq. Greenland Airportsimiillu malersorneqartutut misigigami tunniutiinnanngujoorpoq.

Mads Petersenip Namminersorlutik Oqartussat suliffeqarfiutaat Ineqarnermut, Attaveqaqatigiinnermut Isorliunerusunullu Naalakkersuisumut Aqqaluaq B. Egedemut naammagittaalliutigaa.

Ajornartorsiutit Kangerlussuup mittarfiata akisussaaffikinnerulernissaanut pilersaarutinut atatillugu pilerput, tassalu timmisartumik angallannermik nakkutilliisut atorunnaarsinneqarlutik AFIS-init taarserneqarnissaannut – Kalaallit Nunaanni mittarfiit allat assigalugit - tunngatillugu.

- Kangerlussuarmi droninik misileraavik 2023-miilli pilersinniarnikuuarput. Tassunga atatillugu dronit timmisinnaaffissaat killilersuisoqarnissaa anguniarlugu Angallannermut Aqutsisoqarfik qanimut suleqatigisimavarput, Mads Petersen Sermitsiamut oqarpoq.

Droneqarfik kilometerinik arfineq-marlunnik ungasitsigisumiittoq Taanna mittarfimmiit kimmut kilometerinik arfineq-marlupajaanik ungasitsigisumiippoq, droninillu misileraaneq toqqissisimanarlunilu Kangerlussuarmi silaannakkut angallannermut sunniuteqassanngitsoq qulakkeerneqartussaavoq.

- Angallannermut Aqutsisoqarfik 2023-mi septembarip 15-iani ataatsimeeqatigaarput, ullullu pingasut qaangiummata angallavigeqqusaanngitsumut qinnuteqaat tunniupparput. Droneqarfik pillugu oqaloqatigiinnermut atatillugu 2024-mi januaarimi Isaviamut – Islandimi silaannakkut angallannermik nakkutilliisoqarfimmut Kangerlussuarmi silaannakkut angallannermik aqutsisumut – allakkatigut isumaqatigiissut nassiupparput, Mads Petersen nassuiaavoq.

Qinnuteqaat qaammatialunni suliarineqareerluni dronenik misileraasarfeqalernissaq akuerineqartoq tamanullu saqqummiunneqassasoq Angallannermut Aqutsisoqarfimmit Mads Petersenimut 2024-mi apriilip qulingani nalunaarutigineqarpoq.

- Greenland Airports aappaaguani AFIS-imut nuunnissamut pilersaarutinut atatillugu uppernarsaatinik amerlanerusunik piumasaqarpoq, taakkulu 2025-mi juulimi tunniunneqarput, aallarnisaasoq oqarpoq.

Akuersissut atorunnaarsinneqartoq

Mads Petersen 2025-mi septembarip 12-ani mailikkut Angallannermut Aqutsisoqarfimmiit AFIS-imut nuunnissamut atatillugu dronenik misileraavik 2025-mi novembarip 26-ani atorunnaarsinneqassasoq nalunaarfigineqarpoq.

- Tamanna pissusissamisoorpoq, kisianni Greenland Airportsimiit dronenut misileraavimmik pilersitsinissamik piareersaasoqartoq Angallannermut Aqutsisoqarfimmit maanna paasigakku tupaallaatigaara.

- Greenland Airports A/S-imiit akuersissutitsinnik atorunnaarsitseriarlutik namminneq misileraavissamik ingerlatsinialernerat Namminersorlutik Oqartussanit pigineqartutut inissisimaffimminnik atornerluisut isumaqarpunga. Sumiiffimmimi droninik misileraaveqarnissamik suleqatigissasoralugit paasissutissat tunniunnikuuakka.

- Namminersorlutik Oqartussat suliffeqarfiutaata namminersortut suliffeqarfiutaannut unammillernera peqatigiinniapilunnerusoq isumaqarpunga, tassami Greenland Airportsimiit UAS Denmark Test Center aamma suleqatigineqarpoq, taannalu Odensemi HCA Airportimit kommunimit pigineqarlunilu ingerlanneqarpoq. Suleqatigiinneq Arctic Unmanned assigalugu Kangerlussuarmi misileraaveqarnissamut tunngavoq – sumiiffimmilu tassaneqqissaaq Arctic Unmanned dronenik misileraaveqarpoq.

Malunnanngisaarluni unammillerneq

Mads Petersen Greenland Airportsimit malunnanngisaarluni unammillerneqartutut misigivoq, maannalu Ineqarnermut, Attaveqaasersuutinut Isorliunerusunullu Naalakkersuisumut Aqqaluaq B. Egedemut naammagittaalliorluni.

- Namminersorlutik Oqartussat namminersortunut unammillerneq akuerissappassuk, Issittumi dronenik misileraanissamut periarfissanik nutaanik pilersitsivissaraluarput Arctic Unmanned Kangerlussuarmilu suliagut matunerinik kinguneqassapput.

- Dronenik sanaartortartut arlallit Kangerlussuarmut droneminnik misileraajartorusuttut saaffiginnereernikuupput, taakkuli Arctic Unmannedip sumiiffimmik misileraaveqassanersoq nalornissutigileriasaarpaat. Dronenillu atortunik piareersimasunik, angallannermut aqutsisoqarfimmit immikkut akuersissummik pissarsiniariarutta, misilerarneqartussanik peqareerpugut. Dronemmi ilaat oqimaassusertik pissutigalugu immikkut akuersissuteqarfigineqartussaapput.

- Suliffeqarfiit pisortanit pigineqartut namminersortullu akornanni unammillerneq akerleraara, suliffeqarfimmi pisortanit pigineqartut aningaasarpassuarnik akileraartartunillu tapersersortissaqarput, suliffeqarfiilli namminersortut namminneq aningaasarsiortussaallutik.

- Greenland Airportsip timmisartunik qulimiguulimmik ingerlatsinermut suliaqarnini attatiinnaruniuk, droninillu suliaqarnermut akulerunnani, pitsaanerunnginnerpa?

Greenland Airportsimit qisuariarfigineqartoq

Mads Petersenip isumakuluutinit LinkedInimi aamma saqqummiuppaa, tamannalu Greenland Airportsimit qisuariarfigineqarpoq.

“Sumiiffiit aalajangersimasut killilerneqarnikut suliaqartumut ataasiinnarmut atugassiaanngillat, Angallannermulli Aqutsisoqarfimmiit qinnuteqaatiminnik akuerineqarsimasunik tamanik atorneqarsinnaapput.

Greenland Airportsip mittarfiit qanitaanni angallannerup isumannaatsumik naapertuilluartumillu ingerlanissaa akisussaaffigaa – aamma dronenut tunngatillugu. (…) Taamaattumik timmisartoqarfiit silaannakkut angallaffiusinnaasumik assigiimmik nassuiaatitalinnik pilersitsivugut, taamaalilluni dronenik ingerlatsisut tamarmik maanna atuuttutut atugassarititaasut ataanni ingerlaannarsinnaanissaat qulakkiissallugu – aamma novembarip kingorna. Taamaalillutik ingerlatsisut AFIS-imut nuunneq maluginavianngilaat”, Greenland Airports Mads Petersenimut LinkedInimi allappoq.

- Allannguutaanngilaq. Arctic Unmannedimiit dronenik misileraaffik tiguniarlugu aalajangersimanerannut uppernarsaataaginnarpoq. Arctic Unmanned mittarfimmit ungasissumiinnera pissutigalugu mittarfimmut isertitsissutaavallaannginnissaa aarleqqutigigaat isumaqarpunga. Sumiiffiup ungasissumiinniissaanut aalajangernikuunerput dronenik misileraanermi akornusersuisoqannginnissaa siunertarinikuuarput.

Mads Petersenip suliffeqarfiup Arctic Unmannedip saniatigut Dronepilot.gl aamma ingerlappaa, taannalu 2016-imiilli kalaallinik amerlasuunik dronimik aqussinnaanngortitsilluni ilinniartitsiviunikuuvoq. Mads Petersen AFIS-itut ilinniagaqarpoq, Maniitsullu mittarfiani pisortaanikuulluni.