Aatsitassarsioqatigiiffik Kujataani suliffeqarfimmik piginneqataassutsinik pisisoq
Aatsitassarsioqatigiiffiup Critical Minerals Corp-ip 60° North Greenlandip piginneqataassutai pisiarai.
- Naleqarnerulersitsisarnerit, piginnaasanik suliffissanillu pilersitsinerit sapinngisamik annertunerpaamik Kalaallit Nunaanniiginnarnissaat peqataaffigissavarput – peqatigitillugulu aaqqissuussamik ilinniartitaanermut, pikkorissartitsinermut aamma siunissaq ungasinnerusoq eqqarsaatigalugu kalaallit sulisartut ineriartortinneqarnissaannut tunngaviusumik ingerlatsisinnaasumik ineriartortitsilluta, 60° North Greenlandimi pisortaaneq Malik Vahl Rasmussen oqarpoq.
Foto: Trine Juncher Jørgensen
Suliffeqarfik 60° North Greenland Qaqortumiittoq Australiami Amerikamilu aatsitassarsiornermik ingerlatsivik Critical Metals Corp. suliffeqarfimmi piginneqataassutsinik pisisimasoq nalunaarpoq.
Pisinermut atatillugu piginnittuusimasoq Rasmus Christian Rasmussen piginneqataajunnaarpoq, siunnersortitulli siulersuisunilu siulittaasutut ingerlaannassalluni.
Malik Vahl Rasmussen pisortaanertut suliinnassaaq.
Isumaqatigiissut ineriartornissamut tunngaviusumik nukittorsaasoq, aamma Critical Metals Corp.-imik suleqateqarnermi misissuinermut kiffartuussinerit, Tanbreezimi piiaaffimmik ineriartortitsineq siunissamilu Tanbreezimi piiaaffimmik ingerlatsineq pineqartut, 60° North Greenland ilisimatitsivoq.
Suliffeqarfiup paasissutissiineratut suliffiit 200-t tungaanut pilersinneqarsinnaapput. 60° North Greenland 2025-mi takornariarfiunerpaaffiani 69-inik sulisoqarpoq.
Sumiiffimmi ineriartortitsinissaq sulissutigineqartoq
Aatsitassarsiornerup ineriartortinnissaanut periarfissat pitsaasut pisortaanerup Malik Vahl Rasmussenip oqaatigaa:
- Isumaqatigiissut suliffeqarfitta ineriartortinnissaanut tunngaannarani Kalaallit Nunaannut tunngavoq.
- Ineriartornermi aatsitassarsiornerup inuussutissarsiortunut pioreersunut tapertaalluarsinnaalerneraniippugut, taamaalillunilu nunatsinni aningaasaqarnerup sisamaattut inississinnaalluni, 60° North Greenlandimi pisortaaneq Malik Vahl Rasmussen oqarpoq.
Sumiiffimmi ineriartortitsineq nunaqavissunit aallaaveqarnissaa pingaaruteqartoq oqarpoq:
- Naleqarnerulersitsisarnerit, piginnaasanik suliffissanillu pilersitsinerit sapinngisamik annertunerpaamik Kalaallit Nunaanniiginnarnissaat peqataaffigissavarput – peqatigitillugulu aaqqissuussamik ilinniartitaanermut, pikkorissartitsinermut aamma siunissaq ungasinnerusoq eqqarsaatigalugu kalaallit sulisartut ineriartortinneqarnissaannut tunngaviusumik ingerlatsisinnaasumik ineriartortitsilluta, pisortaaneq oqarpoq.
Niuerneq oqartussanit assigiinngitsunit akuerineqaqqaartariaqarpoq, akuersissutillu pissarsiarineqareerpata naammassineqarnissaa naatsorsuutigineqarpoq.
