Air Greenland IATA-mut ilaasortanngortoq

Air Greenland nunani tamalaani silaannakkut angallannermik suliaqartut kattuffianni, IATA-mi, ilaasortanngoqqammerpoq. Tuluttut International Air Transport Association.

Kattuffiup nunat tamalaat akornanni timmisartuussinermi najoqqutassiat aalajangersartarpai – ilaatigut timmisartortitseqatigiiffiit ilisarnaataat, soorlu Air Greenlandimut GL-iusoq – aamma mittarfinnut ilisarnaatit, soorlu Nuummut GHB.

- Ilaasortanngonerput timmisartortitseqatigiiffinnik allanik suleqateqarnissatsinnik ajornannginnerulersitsissaaq, assersuutigalugu nassatat pillugit, taamaattumik piffissaq ungasinnerusoq eqqarsaatigalugu angalasunut pitsaanerusumik sullissisinnaalissaagut, Air Greenlandimi niuernermut pisortaq, CCO, Chris Shern oqarpoq.

IATA aamma ilinniartitsinernik, uppernarsaatinik timmisartuutileqatigiiffiillu paasissutissaannik isumannaallisaanermut, sunniuteqarluarnerulernissamut aalajangiilluarnerulernissamullu iluaqutaasunik neqerooruteqarpoq.

Aammattaaq ilaasortaaneq timmisartortitseqatigiiffiup sullitaanut, oqartussanut suleqatigisanullu tutsuiginassusermut pitsaanerulissutaassalluni.

Pitsaanermik inissisimaffeqalerneq

- Iluaqutissaqanerulerlutalu pitsaanerusumik inissisimaffeqalerpugut. IATA-p timmisartuutileqatigiiffiit nunanit tamalaaneersut amerlasuut, USA pinnagu, angalatitsivinnut sinniisuuffigai. Ilaasortat aamma IATA-p akiligassanik aqutsisoqarfianut isersinnaapput, taamaalillutik timmisartortitseqatigiiffiit, angalatitsiviit suleqatillu allat akornanni akiliinerit pisariillisarneqartarlutik.

- IATA-mut ilaasortatut nittarsaassinermi timmisartuutileqatigiiffinnillu allanik suleqateqarnermi pitsaanerusumik inissisimaffeqalerpugut, Chris Shern oqarpoq.

Air Greenland, Grønlandsflytut 1960-imi pilersinneqartoq, maanna ukiuni 66-ingajanni timmisartuussisareerpoq.

Akuerisaaneq

- Maanna ilaasortanngornerput nalaatsornerinnaanngilaq. Kalaallit Nunaanni angalasunik nassiussanillu ukiorpassuarni timmisartuussisareerpugut, Air Greenlandili ukiuni kingullerni nunarsuarmi maluginiarneqalerpoq. Taamaattumik IATA-mut ilaasortanngorneq aamma timmisartortitseqatigiiffimmut nunat tamalaat akornanni akuerisaanermut uppernarsaataavoq.

IATA Cubami illoqarfiit pingaarnersaanni Havanami 1945-mi pilersinneqarpoq, maannalu Canadami Montrealimi qullersaqarfeqarluni. Air Greenland ilanngukkaanni kattuffik katillugit 377-inik ilaasortaqarpoq, nunarsuarmilu timmisartumik angalasunik assartuinermilu angallassinerit tamarmik 85 procentiinit amerlanerusut akisussaaffigillugit.

Nunani avannarlerni ilaasortat ilagaat SAS, Widerøe, Atlantic Airways, Jettime, DAT aamma Finnair. Norskit timmisartortitseqatigiiffiat Norwegian IATA-p avataaniippoq.