Akikinnerulerlunilu sukkanerulissaaq

Ilulissani mittarfiup nutaap ammarnissaanut Air Greenland Københavnimut toqqaannartumik timmisartuussisarnissani maanna nittarsaatileruttorpaa.

Mittarfik nutaaq oktobarip 29-ani ammarneqassaaq, Københavnimiit Ilulissanut utimullu toqqaannartumik ullormilu tassani timmisartuussisoqaqqaassaaq.

Mittarfiup atoqqaarfissiorneqarnerani timmisartoq Tuukkaq 305-inik ilaasoqarsinnaasoq atorneqassaaq, pilersaarutaavorli timmisartoq Boeing 737-800 189-inik ilaasoqarsinnaasoq Jettimemit pingasunngornerit tamaasa apriilip tungaanut atorneqartassaaq, Air Greenalndip timmisartua nutaaq Airbus A320neo "Unaaq" atuutilernissaata tungaanut.

Jettime novembarip sisamaani timmisartuussineri aallartissapput.

Angallaffik nutaaq soqutigineqarluartoq

- Angallaffimmut nutaamut bilitsit annertuumik soqutigineqarput, Air Greenlandimi nittarsaassinermut attaveqaqatigiinnermullu pisortaq Katja Vahl oqarpoq.

- Soqutiginninneq marlunnik taaneqarsinnaavoq – Kalaallit Nunaannit Danmarkimut aamma Danmarkimiit Ilulissanut.

Ilulissat – København tikillugit bilitsi Air Greenlandip nittartagaatigut pisiarineqarsinnaavoq, akia 7.145 koruuniuvoq, akitsortinneqarnissaali mianersuutigineqassaaq, tassami Air Greenland akinik allanngorartunik atuivoq. Tassa imaappoq, bilitsit piumaneqarneruleraangata akigitinneqartut qaffakkiartortarput.

Air Greenlandip sapaatip akunneranut timmisartuussisarnini juullip ukiortaallu nalaani annertusissavaa, timmisartuussinerit ilassutaat ataasinngornermiussalluni. 1. marsimiit sapaatip akunneranut pingasoriarluni timmisartuussisoqartalissaaq, aasarlu naallugu Københavnip Ilulissallu akornanni sapaatip akunneranut arfinileriarluni toqqaannartumik timmisartuussisoqartalerpoq.

Ilulissat eqqaani illoqarfiit

Ilulissat Københavnillu akornanni toqqaannartumik timmisartuussineq illoqarfinnut Ilulissat avataanniittunut aamma pingaaruteqarluinnassaaq, tassami København aqqusaarlugu nunanut allanut angalanissaq ajornannginnerulissaaq.

Aasianniit Ilulissat Nuullu aqqusaarlugit Københavniliartoqarsinnaanngussaaq. Aasaanerani sapaatip-akunneranut arfinileriarluni ullormi tassani timmisartuussisoqassaaq.

Upernavimmut Uummannamullu toqqaannartumik timmisartuussisarnerit ukiuunerani ikinnerusassapput. Ilulissaniilli toqqaannartumik aqquteqarnerup taakkunannga kujammut angalaneq ajornannginnerulersillugulu akikinnerulersissavaa, Air Greenland erseqqissaavoq.

Timmisartoq GL707 Københavnimit nalunaaqutaq 9.45 aallarluni Ilulissanut nalunaaqutaq 11.45 tikittassaaq, timmisartorlu GL708 Ilulissanit nalunaaqutaq 13.15 aallarluni Københavnimut nalunaaqutaq 21.00 tikittassaaq.

Air Greenlandip timmisartorsua Airbus A320neo Unaaq nutaaq apriilimi atulerpagu, timmisartut normui allanngortinneqassapput . Københavnimiit aallartussat GL705-imik taaguuteqalissapput Ilulissanilu aallartut GL706-imik taaguuteqalissallutik.