Akunnittarfiit 2025-mi siuariartupiloortut
Tikeraartut unnuinerillu 2025-p ingerlanerani amerlisimasut Naatsorsueqqissaartarfiup maanna saqqummiussinnaavaa. Siuariaatit 15,4 aamma 14,6 procentiupput.
Akunnittarfinni unnuisartut pingaartumik illoqarfiit pingaarnersaanni amerliartorput — soorlu illoqarfimmi akunnittarfiit annersaanni, Hotel Hans Egedemi.
Toqqorsivimmit assi: Leiff Josefsen
Akunnittarfiit siorna tikeraartoqangaatsiarput, pingaartumik nunanit allaneersut siuariartuutaapput.
- Kalaallit Nunaanni akunnittarfinni najugaqarsimasut 2025-mi katillugit 169.366-iupput kiisalu akunnittarfinni vandrehjemini unnuisarfinnilu allani unnuinerit 396.846-ullutik, Naatsorsueqqissaartarfik paasissutissiivoq.
Kisitsisit misissoqqissaaraanni nunanit allaneersut aatsaat taama amerlatigisut erserpoq.
Nunanit allanit unnuisut 2024-mi 27.671-iniit 2025-mi 40.486-inut amerleriarsimapput, tassa 46,3 procentimik amerleriarsimallutik. Kalaallit Nunaannit tikeraat 22,2 procentimik amerleriarsimapput, Danmarkimiillu tikeraat unnuisimasut ikinnerusut nalunaarsorneqarsimapput. Tassani naatsorsueqqissaartarfiup 2,7 procentimik ikileriartoqarsimasoq nalunaarsorsimavaa.
Nunat immikkoorti marluk kinguariartut
Nunamili tamarmi nuannattoqanngilaq. Nunap immikkoortuini marlunni unnuisut ikileriarsimapput: Qeqqata Kommuniani aamma Kommuneqarfik Sermersuup kangiani.
Illoqarfiit pingaarnersaata kommuniani Sermersuumi Kitaami unnuisut amerliartupiloorsimasut tupaallannanngilaq, tassani akunnittarfinni unnuisimasut 49,7 procentimik amerleriarsimapput. Matumani Nuummi mittarfittaaq siuariarnermut qularnanngitsumik peqqutaavoq.
Avannaani unnuisarfinni aamma siuariartoqarluarpoq. Ilulissaniinnaq 17,7 procentimik siuariartoqarpoq. Avannaata Kommunia aamma Kommune Qeqertalik, Ilulissat ilanngullugit, 15 procentimik siuariarput.
Unnuisarfiit 46-t — nunami annerpaat — kisitsisinut tunngaviusut nalunaarummi allassimavoq, nalunaarnerillu kingusinaarneri pissutigalugit kisitsisit nalorninartorsiortitsisinnaapput.
