Aningaaseriviup ukiup affaani sinneqartoorutini 97,4 million koruuninut qaffakkai

Akileraarutit sioqqullugu angusat 97,4 million koruuniupput siornalu 84,4 million koruuniullutik, aningaaserivik tusagassiuutinut nalunaarummi allappoq.

Ukiup affaanut nalunaarusiami allassimavoq angusat ilimagisamit ukiup aallartinnerani pitsaanerusut, tamannalu aningaaseriviup pisortaata Martin Kviesgaardip aamma naammagisimaarpaa:

– Inernerusut iluarisimaarpagut, siullertulli sullitatsinni ingerlatsinermik misigisatsinnik ersersitsimmata. Ilaqutariit illumik pisigaangata, suliffeqarfiit aningaasaliigaangata suliffissanillu pilersitsigaangata, amerlanerusullu aningaasaqarnerminnik uatsinni isumaginninnissartik toqqaraangassuk, siuariartornermik takutitsisuusarput, aningaaseriviup pisortaa oqarpoq.

Erniat akiliutillu ilanngaatigereerlugit ukiup affaani siullermi 218,8 millionit koruuninik iluanaaruteqarneq, niuernerup annertusiartorneranik pissuteqartoq aningaaserivik ilisimatitsivoq.

Aningaaseriviup aningaasartuutai nalikilliliinerit ilanngullugit 126,2 million koruuniupput, tassa ukiup siulianut naleqqiullugit appasinnerulaarlutik.

Aningaaseriviup naatsorsuutai naapertorlugit taarsigassarsiat qularnaveeqqusiinerillu nalikilliartornerat 3,9 million koruuniinnanngussaaq, ukiup affaani siullermi 14,5 million koruuniusimalluni.

- Sullitagut nalinginnaasumik aningaasaqarnikkut qajannaatsumik tunngaveqartarput. Tamanna akiitsut pitsaassusaanni naammagisimaarnartuni kiisalu taarsigassarsiarititani annaasaqaatigisani appasissuni ersersinneqarpoq Martin Kviesgaard oqarpoq.

Grønlandsbankenip julimi ukiumut akileraarutit ilanngaatigereerlugit, 195 mio. krouunit 220 mio. koruunilllu akornaniinnissaat naatsorsuutigaat, tamannalu maannamut attanneqarpoq.