Arctic Circle Business nutaamik takornariaqarnermut pisortartaartoq

Paninnguaq Fleischer-Lyberth Qeqqata Kommuniani Arctic Circle Businessimi takornariaqarnermut pisortanngorpoq. UNESCO-p nunarsuarmi kingornussassatut toqqarsimasaani Aasivissuit – Nipisani pisortatut atorfeqarsimavoq.

Paninnguaq takornariaqarnermut pisortatut takornariartitsinermik misigisassarsiornermillu ineriartortitsinissamut, illoqarfimmi suliffeqarfinnik suliniutinillu tapersersuinissamut, nunap immikkoortuani tamarmi suleqatigiinnernik nutaanik ineriartortitsinissamut Qeqqatalu Kommuniata ornittakkap kajungernartunngortinnissaanut akisussaasuussaaq.

– Paninnguaq sulianut piginnaaneqarluarpoq pimoorussisinnaassuseqarluarluni kiisalu sumiiffimmi takornariaqarnermut tunngasunik suliaqartunik ilisimasaqarluni. Sumiiffimmi tunngaveqartumik ineriartortitsinermi suleqatigiinnermilu ukiuni arlalinni misilittagaqarpoq, aammalu piginnaasai atorluarlugit pisarsiaqarnerulernissamut periarfissat pillugit suleqataasinnaanera pillugu qilanaarpugut, Arctic Circle Business atorfinitsitsineq pillugu tusagassiutitigut nalunaarummi allappoq.

Takornariaqarnermi pisortanngortoq 2026-mi marsip aappaani atorfinissaaq.