Arctic Importimi aatsaat taama sinneqartooruteqartoqaqqittoq

Kalaallit-qallunaallu suleffeqarfiutaat Arctic Import ingerlalluarpoq.Ataatsimeersuarnermut atatillugu ukiumut naatsorsuutaani tallimanngormat saqqummiunneqartuni tamanna takuneqarsinnaavoq.

2025-mi sinneqartoorutit 15,9 millionit koruuniupput, 2024-mi sinneqartoorutit 13,9 millionut koruuniusut. Suliffeqarfiup naatsorsuutaani nammineq aningaasaatit 50 millionit koruuniusut 2025-mi decembarip 31-ani takuneqarsinnaavoq.

Pisortaanerup Thomas Hjortip angusat naammagisimaarpai politikkikkullu eqqissiviilliorfiusumi pissutsinilu nutaani tamanna piviusunngorsimasoq erseqqissarlugulu. Taassumalu angusanut kusanartunut angusaqarnerminni suleqatini peqqutaaqataalluarnerpai.

- Sulisut pikkorissut suleqatiginngikkutsigit Arctic Import piujunnannngilaq. Sulisorpassuit ukiorpassuarni suleqatigaavut, Kalaallit Nunaannilu pissutsit maanna atuuttut eqqarsaatigalugit suliffeqarfittut suliffimmi toqqissisimaneq isumannaassuserlu akisussaaffiginerusariaqarivut erseqqippoq, Thomas Hjort oqarpoq.

- Kalaallit Nunaanni ukiut 50-ingajaat matuma siorna pilersinneqarpugut, naatsorsuutigaarpullu ukiuni 50-ini tulliuttuni tamaaniiginnarnissarput. Sullitavummi suleqativullu taama neriorsornikuuagut, neriorsuinerpullu attatiinnassavarput.

Ukioq ilungersunartoq

Thomas Hjort Arctic Importimi aningaasaqarnermut pisortamit Rikke Larsenimit isumaqatigineqarpoq.

- 2025-mi angusavut tulluusimaarutigisinnaavagut. Kalaallit Nunaannut sulisutsinnut, sullitatsinnut niuernermilu suleqatitsinnut ukioq assigiinngitsutigut ilungersunarpoq. Taakkua uagutsinnik tatiginninnerat siunissamilu qanorluunniit pisoqassagaluarpat Kalaallit Nunaanniinnitsinnik tatiginninnerat niuernitta tunngavigaa.

Iluanaarutit Kalaallit Nunaanni aningaasaliissutigineqassaput, Arctic Importip qullersaqarfissamini nutaami Nuummi Qeqertamumi aningaasaliinertik ingerlateqqissavaat. Qullersaqarfik nutaaq 2026-p naajartulernerani atoqqaarfissiortinneqassaaq, tassani suliffeqarfiup nunatsinnut pituttorsimanerata sunniuteqarluarnerulernissaa aammalu pitsaasumik kaaviiaartitsinikkut ineriartorluarnissaa sulissutigineqassasoq Thomas Hjort nassuiaateqarpoq.

- Qullersaqarfimmik pilersitsinermi quersuarmi inissaqartitsineq annertusineqassaaq, najukkami suliffiit ilinniarnermilu inissaqartitsinerit amerlanerusut pilersinneqassapput aamma Kalaallit Nunaata sinneranut assartuineq nukittorsarneqassaaq. Tamakku tamarmik Arctic Importip sullitaanik kiffartuussinissamut pitsaanerusumik sinaakkuteqalernissamik siunertaqarput, tamatumalu saniatigut suliffeqarfiup takornariaqarnerup ineriartornera tapersersorniarlugu suli pitsaanerusumik piareersimaffigissavaa.

Savalimmiuni annikillisaaneq

Arctic Importip Atlantikup avannaa tamaat niuerfigaa. Nuummi, Reykjavikimi Aalborgimilu sulisoqarluni. Savalimmiuni suliffeqarfik ukiuni 25-ni nunami tassani ingerlareerluni siorna tunineqarmat suliffiit ikilisinneqarput.

- Aalajangerneq oqitsuinnaanngilaq, isumaqarpugulli eqqortumik aalajangiilluta. Savalimmiuni siunissami suli niuerniartassaagut, pisiniarfitsinnili maanna tunineqareersumi atuisut nioqqutissaannik, illup iluani atortunik niueruteqarnissarput ukkataraarput, siunissamilu niuertarfinnut anginerusunut nerisassanik tuniniaasarnissaq salliutissavarput, Thomas Hjort oqarpoq.

Tamatuma saniatigut Arctic Importip Islandimi tunisassiorfia 2025-mi ineriartorpoq.

- Tamanna aningaasartuutinik aaqqissuussaanermillu pitsanngorsaanerit ilutigalugit isertitaqarnerulersitsivoq. Tamatuma saniatigut digitaliseerinissaq sulianillu pisariillisaaneq sulissutigineqarpoq. Taamaalilluni tunisassiorneq annertusivoq, aningaasartuutit patajaallisinneqarlutik ukiumullu angusanut malunnaatilimmik ilassuteqarluni, Thomas Hjort oqarpoq.