Arctic Primep Islandimiunit pigineqarnera Naleqqamit ernumanartinneqartorujussuusoq

- Arctic Prime suliffeqarfittut Islandimiut iluaquserniarlugit isertortukkut akunnermiliuttuusoq, Naalakkersuisut isumaqarpat?

Apeqqut akerleriissutaasoq tamanna, Jens Napaattuup Inatsisartuni partiip illuatungiliuttup Naleqqap aalisarnermut oqaaseqartartuata, Naalakkersuisunut ataasinngornermi januaarip 26-anni apeqquteqaatigaa.

Apeqqut taanna paragraf 37 naapertorlugu Naalakkersuisunut apeqquterpassuisa, katillugit quliusut ilagaat.

Taamaalilluni Naleqqap aalisarnermut oqaaseqartartuata Jens Napaattuup Nunatsinni aalisarnermik ingerlatseqatigiiffissuaq Arctic Prime Fisheries ApS suliffeqarfittut isertortukkut akunnermiliuttutut attuumassuteqarsinnaanerarpaa.

Naalakkersuisunut apeqqutiminut atatillugu erseqqissarpaa, ilisimaneqarluartoq Islandimiu inuussutissarsiornermik ingerlataqartoq pissaaneqartoq, Gudmundur Kristjánsson, Islandimi aalisakkanik tunisassiorfissuarmi Brim hf-imi piginneqataassuteqarnerpaasoq, Arctic Prime Fisheries ApS-imi (APF) 2014-imiilli sunniuteqartorujussuusimasoq.

Saarullinniarnermi pisassiissutaateqarluartut

APF-imut Tunup avataani saarullittassiissutigineqartartut 2021-miilli ukiumut 10.000 tonsit missaanniittarput. Aalisarnermik ingerlatseqatigiiffik Qaqortumi qullersaqarfeqartoq pingasunik ingerlatseqatigiiffiuteqarpoq, tassaasunik: Arctic Prime Fisheries ApS, Arctic Prime Coastal ApS aamma Arctic Prime Production ApS.

Jens Napãtôk’ paragraf 37 naapertorlugu Naalakkersuisunut apeqquteqaatiminut atatillugu allappoq, Arctic Prime Fisheries Kitaani avataasiorluni saarullittassiissutinik 1.400 tonsinik 2026-mi pisassinneqartoq.

APF Tunumi avataasiorluni saarullittassiissutinik annertuunik ukiorpassuarni aamma pissarsisartoq, oqaatigaa. 

Amigartooruteqartorujussuusoq

Naleqqami aalisarnermut oqaaseqartartoq, Naalakkersuisunut ilaatigut ima apeqquteqaateqarpoq: 

- Aalisarnermut inatsimmi paragraf 1-imi allassimasutut, inatsisip siunertaatigut, inuiaqatigiit aalisarnermit siunissamut ungasinnerusumut aningaasarsiornikkut sapinngisamik annerpaamik pissarsiaqarnissaat qulakkeerneqassaaq. Arctic Prime Fisheries ApS-ip ukiumut amigartoorujussuartarnera, taamaattumillu inuiaqatigiinnut Kalaallinut ingerlatseqatigiit akileraarutaannik akileraartannginnera, Naalakkersuisut qanoq isumaqarfigaat?

- Arctic Prime Coastal ApS-ip 2024-mi ukiumoortumik naatsorsuutai naapertorlugit ingerlatseqatigiiffiup nammineq pigisai 228 millionit koruuninik amigartooruteqarput. Naalakkersuisut isumaqarpat ingerlatseqatigiiffissuaq Arctic Prime tassaasoq, suliffeqarfittut Islandimiut iluaquserniarlugit isertortukkut akunnermiliuttuusoq?

- Naalakkersuisut naliliinerat malillugu Arctic Prime Fisheries ApS-ip ukiumut amigartoortuaannarnera, taamaattumillu inuiaqatigiinnut akileraartannginnerat peqqutigalugu siunissami pisassinneqartarnerannut sunniuteqartinneqartariaqarpa?

Napãtôk’: Kristjánsson sunniuteqartorujussuuvoq

Jens Napãtûp paragraf 37 naapertorlugu Naalakkersuisunut apeqquteqaatini ilaatigut ima tunngavilersorpai:

„Aallaqqaammut tunngavilersuutaavoq ingerlatseqatigiiffiup Kujataani nunami suliffissanik pilersitsinissaa. Naluneqanngilaq Islandimiu niuertoq pissaaneqartorujussuaq, Gudmundur Kristjánsson, Islandimiut aalisarnikkut ingerlatseqatigiiffissuanni Brim hf-imi piginneqataassutit amerlanersaannik pigisaqarmat, Arctic Prime Fisheries ApS-imut 2014-imili annertuumik sunniuteqartoq. Arctic Prime Fisheries ApS 100 procentimik Arctic Prime Coastal ApS-imit pigineqarpoq, tassanngalu pingajorarterummik piginneqataalluni Islandimiut ingerlatseqatigiiffiat Línuskip ehf. Línuskip ehf 100 procentimik Gudmundur Kristjánssonip pigisaraa. Den Centrale Virksomhedsregisterimit (CVR) oqaatigineqartut naapertorlugit Arctic Prime Fisheries ApS-ip ukiumoortumik naatsorsuutai 2014-imiilli amigartooruteqarujussuartuaannarput. Ingerlatseqatigiiffiup nammineq pigisai maannakkut 228 millionit koruuninik amigartooruteqarput”, Naaleqqap aalisarnermut oqaaseqartartua allappoq.

Jens Napãtôk’ aamma isumaqarpoq tamanna eqqumiiginartoq, Naalakkersuisummi nittartagaat naapertorlugu Arctic Prime Fisheries ApS 2020-mi 8.500 tonsinik pisassinneqarsimavoq, ukiullu tamaasa piffissami 2021-mit 2025-mut Tunumi avataasiorluni saarullinniarsinnaanermut 10.000 tonsit missaanniittunik pisassinneqartarsimalluni

Apeqqutit tulaassisarnermut tunngasut

Naleqqami politikerip Naalakkersuisut ilaatigut ima aamma apeqquteqarfigai:

- Arctic Prime Fisheries ApS-ip ukiuni 2020-mit 2025-mut avataasiorluni saarullittaminit ukiumut tonsit qassit Kujataani tunisassiorfinnut tulaattarsimavai?

- Aalisarnermut Piniarnermullu Nakkutilliisoqarfik (APN) 2020-mit 2025-mut ukiut tamaasa qanoq akulikitsigisumik Kujataani Arctic Prime Fisheries ApS-ip angallataannut avataasiorlutik saarullinniartunut nakkutilliiartortarpa?

- Arctic Prime Fisheries ApS Tunumi avataasiorluni saarullittaminik ukiualuit matuma siornagut 50 procentimik tulaassisussaatitaavoq. Ukiuni 2020-2025 Arctic Prime Fisheries ApS-ip tulaassisussaatitaanini naapertorlugu Tunumut saarullittaminik ukiumut qanoq annertutigisumik tunisisarpa?

Jens Napãtûp paragraf 37 naapertorlugu Naalakkersuisunut saaffiginnissummini Arctic Prime suliffeqarfittut Islandimiut soqutigisaannut akunnermiliuttuunerarpaa.

Nunani allamiut aningaasaliisartut annersaat

Danmarkimi suliffeqarfiit nalunaarsorsimaffianni, CVR-imi, aamma Islandimi ingerlatseqatigiiffiit marluk, Útgerdarfélag Reykjavíur hf.-ip aamma Brim hf.-ip nittartagaanni uku atuarneqarsinnaapput:

Gudmundur Kristjánssonip Lineskip hf. ingerlatseqatigiiffiillu allat pingasut, aamma Útgerdarfélag Reykjavíur hf.-imik (naalisarlugu ÚR-imik taaneqartartoq) tamakkiisumik pigisarai.

Taamaalilluni Gudmundur Kristjánssonip aalisarnermik suliffeqarfissuarmi Brim hf.-imi piginneqataassutit 43,96 procentii pigilerpai, taamaalillunilu suliffeqarfissuarmi piginnittut annerpaartaralugit.

Brim hf. S-13 Holding ApS aqqutigalugu niuernermik ingerlatseqatigiiffimmi Polar Seafood Denmark A/S-imi 50 procentinik piginneqataavoq. 

Aammattaaq Kristjánssonip ingerlatseqatigiiffini Línuskip ehf. aqqutigalugu Arctic Prime Coastal-imi piginneqataassutit pingajorarterutaat pigilerpai, APF-imilu pisortaq Hentzar Petersen sinneruttunik piginnittuulluni.

Gudmundur Kristjanssonip Línuskip aqqutigalugu Arctic Prime Production ApS, Nanortalimmi, Qaqortumi Kuummiunilu Arctic Prime Coastal ApS-imit ingerlanneqartunik aalisakkerivinnik ingerlatsisup 100 procentimik pigilerpai.”

Gudmundur Kristjánsson nunani allamiuni Nunatsinni aalisarnermik ingerlatsisuni taamaalilluni annerpaanngorpoq.  

Peter Borg: - Oqaaseqarfigissanngilara  

Sermitsiap Arctic Prime Fisheriesimi aqutsisut pisimasoq pillugu Jens Napãtôk-lu oqaaseqaatai pillugit oqaaseqaqqullugit qinnuigai:

- Oqaatigineqartut ilumuunnginneraannarsinnaavakka.

- Arctic Prime Kujataani ingerlatseqatigiiffiuvoq ukioq kaajallallugu 110-nit amerlanerusunik sulisulik siornalu kommuninut nunallu karsianut akissarsiatut aalisarnermillu akitsuutinik 127 millionit koruuninik akiliuteqarsimasoq.

- Kalaallit Nunaanni ingerlatseqatigiiffiit allat assigalugit aalisarnermullu inatsimmi allassimasutut APF-ip pingajorarterutaa ataallugu Islandimiumit Gudmundur Kristjanssonimit pigineqarpoq, pingajorarterutaallu marluk uanga nammineq pigisaralugit. Ingerlatseqatigiiffik Qaqortumi qullersaqarfeqarpoq, tassanilu aalajangigassat pingaarutillit aalajangiiffigineqartarlutik.

- APF Kuummiuni, Qaqortumi Nanortalimmilu suliffissuaqarnik pingasunik ingerlataqarmat ilumoorpoq. Suliffissuit taakku pingasut tamarmik nunaqavissuinnarnik sulisoqarput, suliartortitanik tikisitsisoqartarani.

APF-ip pisortaa Hentzar Petersen Sermitsiamut mailikkut taama allappoq.

Sermitsiap aamma Aalisarnermut, Piniarnermut Nunalerinermullu naalakkersuisoq Peter Borg, Demokraatit, tamanna pillugu qanoq isumaqarnersoq apeqquteqarfigaa.

- Peter Borg sinnerlugu nalunaarutigissavara, §37 naapertorlugu apeqqutit tigusimagivut, maannalu ullut suliffiusut qulit qaangiuppata akissuteqarfigisinnaassallugit. Piffissamilu matumani oqaaseqarfigisinnaanngikkallarai.

Peter Borgip naalakkersuisoqarfiani pisortaq Emanuel Rosing e-mailikkut taama allappoq.