Inatsisartunut ilaasortaq Bentiaraq Ottosen, Atassut, Royal Arctic Line A/S-ip umiarsuarnik attartornermut isumaqatigiissutai pillugit, paragraf 37 naapertorlugu Naalakkersuisunut apeqquteqarpoq.
Aqqaluaq B. Egede, Inuit Ataqatigiit, Isumaginninnermut, Suliffeqarnermut, Ineqarnermut, Attaveqaqatigiinnermut Nunallu Immikkoortortaanut Naalakkersuisoq naapertorlugu RAL-ip umiarsuarnik containerinik assartuisartunik nunanit allaneersunit attartornermini ukiut tamaasa millionit marlussuit atortarpai.
Inatsisartunut ilaasortaq Bentiaraq Ottosen, Atassut, Royal Arctic Line A/S-ip umiarsuarnik attartornermut isumaqatigiissutai pillugit, paragraf 37 naapertorlugu Naalakkersuisunut apeqquteqarpoq.
Aqqaluaq B. Egede, Inuit Ataqatigiit, Isumaginninnermut, Suliffeqarnermut, Ineqarnermut, Attaveqaqatigiinnermut Nunallu Immikkoortortaanut Naalakkersuisoq naapertorlugu RAL-ip umiarsuarnik containerinik assartuisartunik nunanit allaneersunit attartornermini ukiut tamaasa millionit marlussuit atortarpai.
Isumaqatigiissutit sivisuumik atuuttut
Royal Arctic Lineq qulinik umiarsuaateqarpoq. Aqqaluaq B. Egede naapertorlugu RAL-i ilaannikkooriarluni umiarsuaatileqatigiinnit allanit attartortarpoq, aammali nammineq umiarsuaatini umiarsuaatileqatigiiffinnut allanut attartortittarpai.
Umiarsuaatileqatigiiffimmut Vessel Sharing Agreementimik (VSA) RAL isumaqatigiissuteqartoq ilisimatitsissutigineqarpoq, tassa umiarsuaatileqatigiiffiit marluk arlaqartulluunniit akornanni isumaqatigiissut, angallannermi aalajangersimasumi umiarsuit imminnut attartortarput, umiarsuaatimillu talinngaffiinik paarlagiiaattarlutik. Islandimiunik pigineqartoq Reykjavikimilu qullersaqarfilik Eimskib isumaqatigiissuteqarfigineqarpoq. Isumaqatigiissut aqqummi Reykjavik-Nuuk-Reykjavik atuuppoq.
- Suleqatigiinnermi umiarsuaq ataaseq RAL-imiit aamma Eimskip-imiit umiarsuit marluk atorneqarput, akuersissuteqarnerup kingunerisaanik RAL-ip angallavimmi Island-Grønland-Island usisinnaassuseq tamakkiisoq atorsinnaavaa, taamaattumillu teknikkimut tunngassuteqartut eqqarsaatigalugit Eimskip-ip umiarsuaatai marluk RAL-imit attartorneqarput, umiarsuaatileqatigiiffik paasissutissiivoq.
VSA-mik isumaqatigiissuteqarneq ukiut tallimat missiliorlugit atuutereerpoq. RAL-ip umiarsuaq containerinik assartuut Mary Arctica 2023-mi Eimskibimut tunivaa, maanna Silver Mary-mik ateqartoq.
- Taassuma saniatigut Silver Mary-p (siornatigut Mary Arctica) ukiumut minnerpaamik ulluni 180-ini attartorneqarnissaa pillugu isumaqatigiissuteqartoqarpoq. Umiarsuaq 2023-mili attartorneqartalerpoq. Tassalu RAL umiarsuarnik pingasunik piffissami sivisuumi isumaqatigiissuteqarfiusunik attartugaqarpoq, umiarsuaatileqatigiiffik Bentiaraq Ottosenimut paasissutissiivoq.
Isumaqatigiissutit sivikitsuinnaat
RAL-ip umiarsuaq containerinik assartuut Jonni Ritscher, Liberiskimi pigineqartoq, Tukuma Arctica amutsivimmiinnerani 2023-mi attartorpaa. Umiarsuaq Silver Arctica Maniitsumi talittarfiup nutarterneqarneranut atatillugu 2025-mi attartorneqarpoq. Taamaalilluni umiarsuaatileqatigiiffik piffissami sivikitsuinnarmi 2022-mit 2025-mut umiarsuarnik containerinik assartuisartunik marlunnik attartorsimavoq, RAL ilisimatitsivoq.
Aningaasartuutit millionillit
Containerinik assartuisartunik 2024-mi attartornermut aningaasartuutit erseqqissarneqarnissaat Bentiaraq Ottosenip kissaatigaa, tassunga atatillugu RAL ilisimatitsivoq ukioq taanna aningaasartuutit 40 millionit koruuniusut.
Piffissami 2022-mit 2025-mut ukiumut agguaqatigiissillugu 33 millionit koruuninik attartornermut aningaasartuutigineqarsimasut, umiarsuaatileqatigiiffik ilisimatitsivoq.
- Tassunga assersuutitut piffissami tassani Malik Arctica-mut (useqanngitsumut) ukiumut aningaasartuutaasimasut 36 mio. koruunit aamma 39 mio. koruunit akornanni amerlassuseqarsimapput, RAL paasissutissiivoq.
RAL-imi aningaasartuutit katillugit 2021-miit 2025-mut 1,1 milliardit koruunit sinnerlugit amerlassuseqarput, taamaalillunilu akunnermusianut aningaasartuutit agguaqatigiissillugu 2,8 procentiupput, akissummi allassimavoq.
Akuerineqarsinnaanngilaq
RAL-ip umiarsuarnik nutarterinissamut aningaasartuutit qulakkeerniarlugit assartuinermi akit 2024-miit 2026-mut qaffakkiartuaarnissaat Naalakkersuisunut isumaqatigiissutigaat, tassa umiarsuit amerlasuut pisoqaavallaalersimagamik. Akitsuutillu 2025-mi 3,1 procentinik qaffanneqarput, 2026-milu 2,2 procentinik qaffanneqassallutik.
Umiarsuaatileqatigiiffiup nunanit allaneersunik containerinik assartuisartunik ukiumut millionilinilikkaanik kisitsisitalinnik attartortarnera, Bentiaraq Ottosenip akuerineqarsinnaanngitsutut isigaa.
- RAL umiarsuaatileqatigiiffinniit allannit ikiorneqartariaqanngilaq, aningaasallu attaartortnermut atorneqartartut inuiaqatigiinnut atorneqarsinnaangaluarput, nunani allani umiarsuaatileqatigiiffinnuunngitsoq, oqarpoq.
Assi: Oscar Scott Carl
- RAL umiarsuaatileqatigiiffinniit allannit ikiorneqartariaqanngilaq, aningaasallu attaartortnermut atorneqartartut inuiaqatigiinnut atorneqarsinnaangaluarput, nunani allani umiarsuaatileqatigiiffinnuunngitsoq, oqarpoq.
Bentiaraq Ottosen Isumaginninnermut, Suliffeqarnermut, Nunamut Namminermut Avatangiisinullu Naalakkersuisutut siorna novembarimi tunuarpoq maannalu Folketingimut qinigassanngortilluni.
