Bent Salling: Royal Greenlandimik isumaqatiginninniarnerit isasoorput

Piffissami sivisuumi sukumiisumik nunatsinni aalisarnermik ingerlatsisut annerit marluk, Royal Greenlandip Polar Seafoodillu, akornanni isumaqatiginninniarnerit isasoorput.

Suliffeqarfissuit Aasianni Polar Seafoodip raajaleriffia aalisakkerivialu pillugu pissanganartorsiornermut aaqqiissutissarsisinnaasimanngillat.

Tamanna Polar Seafood Greenlandip piginnittuata pisortaaneratalu Bent Sallingip uppernarsarpaa.

- Piffissami sivikitsumi raajanut TAC-p appariarnera pineqaraluarpat, tamanna inooqataaffigisinnaassagaluarparput. Peqassutsilli siunissami qaninnermi pitsanngoriarnissaa upperinngilarput. Ilaatigullu Royal Greenland assiginagu aalisarnermut inatsisip aalisarnermi piginnittuunitsinnik annikilliliinissatsinnut pinngitsaalivaatigut.

- Taamaammallu illuatungeriinnut aaqqiissutissamik niuernikkut soqutiginartumik nassaarsinnaasimanngilagut, Bent Salling Sermitsiamut oqarpoq.

Pisortaaneq: - Naggatissaa tikillugu akiutissaagut

Taamaammallu Aasianni suliffissuaq aarlerinartorujussuarmi inisseqqavoq. Naalakkersuisut politikikkut aaqqiissutissamik nassaarsinnaanngippata, tamanna Bent Salling malillugu 2026-mi ukiap ingerlanerani illoqarfiup suliffeqarfiata annertup matuneranik kinguneqassaaq. Sulisartut 116-t suliffissaarutissapput.

- Aasianni sulisuvut suleqativullu suliffissuup iluatsittumik ingerlanneqarneranut naliitsuupput, suliffissuullu ingerlaannarnissaanut tunisassiassanik qulakkeerinninniarluta sorsuutiginninnerput nangissavarput.

- Sulisut suleqativullu siunissamut annertuumik qularuteqarnermik misigisimassapput. Sulisuvullu pillugit sapinngisamik piaarnerpaamik aalajangertoqartariaqarpoq.

- Periarfissanik tamanik nalilersuinissaq naggatissaalu tikillugu akiuunnissaq taakku illoqarfillu pillugit ingerlattariaqarparput. Politikikkut aaqqiissutissaqartoq qularinngilarput. Suliffissuup matuinnarneqarnissaata akuerineqarsinnaanera takorloorsinnaanngilarput, pisortaaneq oqarpoq.

Namminersorlutik oqartussat appisaluukkai

Polar Seafoodip Royal Greenlandimik isumaqatiginninniarnerminik unitsitsinerata kingorna Bent Sallingip Naalakkersuisut appisaluuppai:

- Tasiilami tunisassiorfimmik ikittuinnarnik sulisulimmik sanaartornissamut Royal Greenlandip 5.000 tonsinik tunineqarnera, Aasiannilu ajornartorsiutit aaqqinneqarnissaat pillugu iliuuseqartoqarumannginnera tupigusuutigaarput.

Polar Seafood A/S-p nunatsinneersoq Polar Seafood A/S-ilu Danmarkimeersoq Polar Raajani, aalisakkanik tunisassiorfissuarmik piginnittuullunilu ingerlatsisumi piginneqatigiissutinik 57 procentimik 43 procentimillu pigisaqarput.

Namminersorlutik Oqartussat erseqqissumik nalunaarfigineqartut

Polar Seafoodimi qullersat raajaleriffik aalisarnermut inatsit nutaaq atortillugu matuneqarnissamik aarlerinartorsiorneranik ajornartorsiummik Naalakkersuisuni Inatsisartunilu politikerinik ukiuni arlalinni erseqqissaateqartarput.

Paasissutissat Sermitsiap pigisai naapertorlugit Polar Seafood Namminersorlutik oqartussani atorfilittanut pissutsit qanoq ilungersunartiginerannik ilisimatitsivoq. Tassa Royal Greenlandimik isumaqatiginninniarnerit ingerlatiinnarnerisa iluaqutaannginnerannik. Ajornartorsiut niuernikkut aaqqiissutissaqanngilaq. Ajornartorsiut politikikkut ajornartorsiutaasoq Polar Seafood oqariartorpoq.

Taamaalilluni Aasianni tunisassiorfiup annaanneqarnissaanut aaqqiissutissamik nassaarnissaq Polar Seafoodip Naalakkersuisunut isaateqqippaa. Tassa suliap qanoq aaqqinneqartariaqarneranik Polar Seafoodip oqariartuutigiuagaatut.

- Aalisarnermut inatsisitaap siullermeerluni tusarniaassutigineqarneranilli tunisassiorfiup ingerlaannarsinnaaneranut aarlerinaat tikkuartortuarparput. 

- Ajornartorsiut manna inatsisiliornikkut politikikkullu ajornartorsiutitut isigaarput, aaqqiissutissarli taakkunanngaanneertariaqartoq isumaqarpugut, Bent Salling oqarpoq.

Aalisarnermut, Piniarnermut Imminullu pilersornermut Naalakkersuisoq Peter Borg aaqqiissutissanik nassaarnissaq pillugu februaarilli qaammataani Royal Greenlandimik Polar Seafoodimillu oqaloqatiginnippoq. Tamanna Aasianni tunisassiorfiup matusussanngornera pillugu Polar Seafoodip ukioq manna siusinnerusukkut oqariartornerata kingorna pivoq. Peqatigisaanik Polar Raajani pisortaq Jan Weinrich Polar Seafood Greenlandimilu siulersuisut siulittaasuat CEO-lu Bent Salling illuatungaanilu CEO Toke Binzer Royal Greenlandimeersoq isumaqatiginninniarnernik ingerlatsipput. Isumaqatiginninniarnerillu taakku maanna isasoorput.

Tunisassiorfik ukiaru matusussanngortoq

Aasianni tunisassiorfik ukiuni arlalinnit raajanik, qaleralinnik, saarullinnik, suannik saattuanillu tunisassiornermik ingerlatsiffiuvoq.

- Taamaammat politikikkut ataavartumik aaqqiissuteqartoqanngippat, tunisassiassat killeqarmata aningaasatigut ingerlatsilluarsinnaannginnatta, 2026-mi ukiakkut suliffissuaq ataavartumik matusariaqassavarput.

Taama Bent Salling, Polar Raajat siulittaasuat, Polar Raajani siulersuisut ataatsimiinnerisa kingorna ulloq 16. februar Sermitsiamut oqarpoq.

Qaammatini aqqaneq marlunni ingerlatsineq qulakkeerniarlugu tunisassiorfik minnerpaamik raajanik 10.000 tonsinik pisariaqartitsivoq. Taamaattoqanngilarli. Raajartassat appariarnerat pissutigalugu 2025-26-mi raajanik katillugu 4.000 tonsinik tunisassiorfik amigaateqarpoq.

Politikerit aaqqiissutissamik nassaarsinnaanngippata, tunisassiorfik ukiaru matussaaq, Bent Salling oqarpoq.

- Peqassutsip nikeriarsinnaanera inooqataaffigisinnaavarput. Tamanna passussinnaavarput naleqqussarlutalu. Ajornartorsiutilli politikikkut pilersinneqartut, Aasianni tunisassiorfiup matuneqarsinnaaneranik navianartorsiortitsisut matumatulli ittut, ajoraluartumik iliuuseqarfigisinnaanngilagut, taanna oqarpoq.

Royal Greenlandip pisortaanera Toke Binzer Polar Seafoodip raajanik pilersuinermi, nunatsinni tunisassiorfinnik tatisisumik suleqatiginnissinnaaneq ammaffigalugu Sermitsiami oqariartorpoq. Tamannali Aasianni tunisassiorfiup annaanneqarnissaa pillugu Polar Seafoodip siunnersuutigisaatut Royal Greenlandip Ilulissani tunisassiorfiata matuneratigut pinavianngilaq.

Polar Seafood: Qaleralittassat amerlineqarnerat tunisassiorfimmik annaassisinnaavoq

Naalakkersuisut februaarimi 2025-mi nunatta kitaani pisassiissutinik aalisartussarsiornermut ingerlatseqatigiiffiit aqqaneq marluk qinnuteqarput. Ingerlatseqatigiiffik angisooq ataaseq mikisulluunniit nutaat marluk avataasiortut qaleralittassanik 4.600 tonsinik, saarullittassanik 1.960 tonsinik nataarnartassanillu 167 tonsinillu pisassinneqassasut Naalakkersuisut siunniuppaat. Pisassiissutissalli suli agguaanneqanngillat.

Polar Seafood Greenland, ukiorpassuarni aalisarnermik ingerlatsisoq, Sermitsiap paasissutissat pigisai malillugit pisassiissutit ilaannik pissarsinissamik soqutiginnippoq, taamaalilluni aalisakkat Aasianni tunisassiorfimmut tunineqarsinnaaqqullugit. Tamanna tunisassiorfimmik matusinissamik pinngitsoortitsisinnaavoq.

- Aasianni raajanik tunisassiorneq qaleralinnik tunisassiornermik taarsersinnaagutsigu, suliffiit maannamut piusut pilerseqqissinnaavagut.

- Tamanna kikkut tamarmik iluanaarfigissagaat isumaqarpunga. Tamannali politikikkut piumassuseqarnermik pisariaqartitsiviuvoq, Bent Salling erseqqissaavoq.