Bilitsit akikitsut piumaneqarluartut tuniniarneqarunnaartut

Aarhusimi angalatitsivik Ruby Rejser Aalborgimit Nuummut siumuinnaq bilitsi 1998 koruunilerlugu siorna aasakkut timmisartuussilermat tupaallaatigineqartorujussuuvoq.

Angalatitsiviup angallassivimmi siunertaa ersarippoq. Nuummi mittarfik Atlantiku qulaallugu timmisartuussinissamut ammarneqarmat eqimattakkaarlutik angalasut Kalaallit Nunaannut takornariarusuttut akikitsumik timmisartumik angallanneqarnissaat pisariaqartippaat. Ruby Rejserilli sapaatip-akunneranut marloriarlutik Aalborgimiit Nuummut timmisartuussisarneranni ilaasut naammanngillat – billetsillu sinneruttut akikitsumik tunineqarsinnaapput.

Suliniut iluatsilluarpoq. Sermitsiap Danmarkip Kalaallit Nunaatalu akornanni timmisartuussinerit akii siorna juulimi misissormagit, aqqut nutaaq angalanissamut periarfissatut akikinnersatut toqqarneqarpoq, tamatumalu saniatigut Jyllandimiit Norgellu kujataanit København aqqusaarlugu angalaneq ajornakusoortoq akisoorlu angallavigisariaaruppaat.

Ruby Rejserip billetsiutai akikitsuupput, tassalu billetsip allamik ilanagu akia. Nerillunilu nassataqarniaraanni qaavatigut akiliuteqartariaqarpoq — tamannalu amerlanerit paasisinnaavaat.

Aamma Air Greenlandip, Aalborgip Nuullu akornanni timmisartuussinissamik pilersaaruteqartup, periarfissat takusinnaagamigit Ruby Rejserimik suleqateqalerpoq. Namminersorlutik Oqartussat timmisartortitseqatigiiffiata nammineq billetsini Ruby-p timmisartuutaanut Boeing 737-mut akisunerulaartumik, nalinginnaasumilli kiffartuussineq ilanngullugu, tassani nerisassat nassatassallu billetsinut ilaatillugit tunisarpai.

Ruby Rejser naak ingerlalluaraluarluni timmisartuussisarunnaarniarluni aalajangersimavoq – ukioq mannalu Air Greenland illoqarfiit taakku marluk akornanni kisiartaalluni timmisartuussissaaq.

- Pikkoriffiginerpaasarput, tassa Kalaallit Nunaannut misigisassarsiorluni aaqqissuussamik angallassinernik tuniniaaniarluta ukioq manna aalajangerpugut, Morten Meyer, Ruby Rejser-imi pisortaq oqarpoq.

Ilikkagarpassuaqartut

- Ukioq siulleq Kalaallit Nunaanniinnitsinni ilikkagarpassuaqarpugut, misilittakkagullu ukiup aappaani atussavagut. Kalaallit Nunaanni tuniniaanissatsinnut qularnanngitsumik pikkorinnerulerpugut, Morten Meyer oqaluttuarpoq.

- AirSeven Air Greenlandilu suleqatigalugit Kalaallit Nunaannut timmisartuussisarnitsinni sila Nuummi minnermut aallarnermullu qanoq sunniuteqartigisoq nammineq misigisimavarput. Silali unammillernartuussasoq piareersimaffigaarput – Nuup qulaani kaaviiaartoqarnissaa pinngitsoortissallugu isumaqaratta Aalborgimit aallarnissaq arlaleriarluta kinguartipparput.

- Aalborgimiit Nuummut tikittussat tamarmik amerlanertigut piffissaq eqqorlugu apuuffissaminnut apuussinnaasimapput, kinguaattoortullu amerlanertigut paasinnittarput – amerlanersaasami timmisartut piareeqqasut, silali pissutaasoq takusinnaavaat.

- Timmisartuussisarunnaarniarluta aalajangernerput silatusaarneruvoq. Air Greenland qularnanngitsumik uagutsinnit timmisartumut billetsinik tuniniaallaqqinneruvoq. Uagut aaqqissuussamik angalatitsinerit pikkoriffigineruagut.

Qanimut suleqatigiinneq

- Air Greenlandimik suleqateqarneq ima ineriartortigisimavoq, taamaalilluni taamatut immikkoortitsineq pissusissamisoorluinnarluni, aaqqiissullu tamanna suleqatigiinnermik suli nukittorsaasoq oqaatigisinnaavara. Issittumi ukiuunerani ornittakkanut allanut soorlu Tromsømut Svalbardimullu tunngatillugu misilittakkatta atornissaannut periarfissaqarluta assersuutigalugu Air Greenland Kalaallit Nunaanni ukiuunerani – pingaartumik Ilulissani – takornariartitsinermut atatillugu qanimut suleqatigaarput.

- Ukiuunerani takornariartitsinerup ineriartortinneqarnissaanut isumalluarlutalu peqataasinnaagatta nuannaarutigeqaarput, Morten Meyer oqarpoq.

Ruby Rejsersip timmisartuussisarneri aamma Jyllandip avannaani inuussutissarsiortunut kajungernarput. Ullaaralaakkut aallartarput, taamaalillutik inuussutissarsiortut Jyllandip avannaaneersut tikikkaangamik ulloq naallugu Nuummi sulisinnaasarput. Jyllandip avannaani inuussutissarsiortuttaaq København aqqusaarlugu angalangaatsiartarunnaaramik sapaatip-akunneranut marloriarluni timmisartuussisarneq iluaraat.

Jyllandip avannaani inuussutissarsiortut Air Greenland juulimi Aalborgip Nuullu akornanni timmisartuussisalerpat periarfissat tamakkua annaassavaat.

Kingusissukkut aallartarneq

- Juunip 16-ianiit septembarip aallaqqaataanut sapaatip akunneranut ataasiarluta marlunngornermi AirSeven atorlugu timmisartuussisassaagut. Aalborgimit nal. 13.00 aallartarluni Nuummut nal. 14.40 tikittarnissaq pilersaarutaavoq. Uternermi Nuummit nal. 15.50 aallarutta Aalborgimut nal. 23.40 tikittartussaassaagut, Air Greenlandimi attaveqatigiinnermut pisortaq Paarnaq Hansen-Zeeb Sermitsiamut oqarpoq.

- Ruby Rejser, eqimattanik angallassinissamut issiaviit ilaannik pisisimasoq, suli qanimut suleqatigaarput. Angalaffissaq soqutigineqareersoq isumalluarfigaarput, taamaalillunimi Jyllandimiit toqqaannartumik Kalaallit Nunaannut timmisartumik angalaneq ajornannginnerulerpoq.

Angallassinermi billetsinut akit Air Greenlandip billetsiutai allat assigalugit nikerarput. Tassa imaappoq, billetsit akii piumaneqarnerulernerannut piffissamilu pisiffiusumi bilitsit pisiarineqarnerannut naapertuuttumik allanngorsinnaapput.

Sermitsiap periarfissaq akikinnerpaaq – Takuss-ip akigititai – Nuummiit Aalborgimut juunip 16-iani aqagulu uternissamut atugaa maajip aqqaneq-aappaanni misissorpaa. Tassani siumut utimullu angalaneq 5.391 koruuneqarpoq.

Eqqaaneqareersutut akit allanngorartuupput - allanngortuaannarsinnaallutillu.

AirSeven timmisartumik Boeing 737-800-mik 189-inik ilaasoqarsinnaasumik timmisartuussisarpoq.