Bundgarninut tillinniartarneq annertuumik ajornartorsiutaasoq

Kalaallit Nunaata Kitaani sinerissap qanittuanut 2026-mi saarulliit pisassiissutit katillugit 23.000 tonsit sinnilaarpai, taakkunanngalu 1.800 tonsit tapertaralugu aalisartartunut pisassiissutaapput.

Ukioq manna saarulleqarluarpoq tunisinermilu kiilumut akigitinneqartoq ukiut siuliinut naleqqiullugu qaffasinnerungaatsiarpoq. Tamakkulu ilaatigut peqqutigalugit aasaq manna sinerissap qanittuani saarullinniarneq annertuumik ingerlanneqartoq, sinerissami aalisartut piniartullu peqatigiiffiiniit arlalinniit Sermitsiamut oqaatigineqarpoq.

Aammali tapertaralugu aalisartartut bundgarninut serlersaaralutillu saarullinnik tillinniartarnerat sineriak tamakkerlugu annertuumik ajornartorsiutaasoq, Kalaallit Nunaanni Aalisartut Piniartullu Kattuffiannit, KNAPK-mit kiisalu aalisartut piniartullu peqatigiiffiisa ilaanniit oqaatigineqarpoq.

Tamannali eqqortuunngitsoq Tapertaralugu Piniartartut Aalisartartullu Kattuffiannit, TPAK-mit, oqaatigineqarpoq.

Ajornartorsiut annertusoq

Saarulleqarluarnera saarullinniat amerlanerulernerannik kinguneqarpoq aammali ukiuni kingullerni bundgarnersorluni saarullinniarneq atugaaneruleriartortoq, KNAPK-miit oqaatigineqarpoq. Aammali bundgarninik serlersaarisarneq, taakkulu imaannik saarullinnik tillinniartarneq sineriak tamaat annertuumik ajornartorsiutaasoq, KNAPK-p siulittaasuata tullia Jens Peter Kielsen Qaqortuminngaanneersoq, oqarpoq.

- Tapertaralugu aalisartartut bundgarnit iluini aalisarlutik saarullinnik tillinniartarnerat assorujussuaq atugaavoq, tamannalu sineriak tamakkerlugu ajornartorsiutaavoq.

- Bundgarnit iluini aalisartoqaraangat bundgarnit alinneqartarput, tamannalu pisanik annaasaqarnermik kinguneqartarpoq, taanna oqarpoq.

Bundgarnit angissusaat apeqqutaallutik 50.000 koruniniit 90.000 koruunit tungaanut akeqartarput. Bundgarnit 7 favninik angissusillit saarullinnik 30 tonsit tungaanut imaqarsinnaapput.

- Bundgarnit akisoorujussuupput innarlerneqarsimappatalu pisat aniasarput. Taamaattoqartillugu nunamut qaqillugit suliarineqartariaqartarput, tamannalu aalisartumut aningaasarpassuarnik annaasaqaataasarpoq.  

- Ajornartorsiut pillugu KNAPK-mut anngussisoqartarpoq, kisiannili amerlanertigut bundgarnersorneq avinngarusimasumi ingerlanneqartarmat uppernarsaatissanik pissarsiniarneq ajornakusoortarpoq, Jens Peter Kielsen oqarpoq.

Bundgarnersortut amerlasuut saarullinnut uumatitsiviit aamma atortarpaat. Saarulliit bundgarninik pisat uumatitsivinnut nuunneqartarput, uumatitsivinnilu aalisartarneq aamma ajortorsiutaasoq, KNAPK-p siulittaasuata tullia oqarpoq.

Nuummi aamma ajornartorsiutaasoq

Bundgarninut tillinniartarneq pillugu sinerissami aalisartut piniartullu peqatigiiffii arlallit Sermitsiamiit oqaloqatigineqarput.

Nuummi aalisartut piniartullu peqatigiiffianni Neqitami siulittaasup Karl Kristian Krusep oqarnera naapertorlugu, Nuup eqqaani bundgarnersorneq atugaalluarpoq. Taassuma bundgarninut tillinniartarneq pillugu peqatigiiffiup ilaasortai paasiniaaffigai.

Amerlanertigut saniatigooralugu aalisartartut bundgarninut tillinniartartuusut peqatigiiffiup ilaasortaanit ilimagineqartoq, Karl Kristian Kruse paasissutissiivoq.

Pasilliutit eqqortuunngitsut 

Sumiiffiit ilaanni tapertaralugu aalisartartut saarullinnik tunisisinnaatitaapput. Kisiannili tapertaralugu aalisartartut inuussutissarsiutigalugu aalisartut bundgarniinut tillinnianngisaannartut, Tapertaralugu Piniartut Aalisartullu Kattuffianni, TPAK-mi siulittaasup tullia Peter Davidsen oqarpoq.

Taanna aamma Nuummi Tapertaralugu Piniartut Aalisartullu Peqatigiiffianni, NTPAP-mi, siulittaasuuvoq.

-  Tapertaralugu aalisartartut bundgarninut tillinniartartutut pasillerneqartarnerat ajoraluartumik nutaajunngilaq, pasilliutilli ilisarisinnaanngilluinnarpagut.

- Pasilliutit taamak ittut uagutsinnut saatinnginnerini, inuussutissarsiutigalugu aalisartut imminnut qiviaqqaalaarsinnaapput. Nalunngilara iluminni namminneerlutik ajornartorsiuteqartartut allaammi bundgarninut ujaqqanik immiisartut ilisimavarput, taanna oqarpoq.

NTPAP 100-t tungaanut ilaasortaqarpoq, taakkulu amerlanerpaartaat ilitsoqqussaralugu aalisarneq piniarnerlu ilitsoqqussarigaat, taamaattumillu allat piniutaannik ataqqinnittuusut, Peter Davidsen erseqqissaavoq.

Kalaallit Nunaata Politiivisa paasissutissiinerat naapertorlugu, bundgarninut tillinniartoqartarnera pillugu ukiuni kingullerni suliassanngortitsisoqarsimanngilaq.