Dr. Phil Kalaallit Nunaanni uuliasiorneq pillugu tv-mi aallakaatitassialiussasoq

Uuliasioqatigiiffik Greenland Energy Company, Jamesonlandimi uuliamik ujaasinissamut akuersissut pillugu 80 Mile-mik suleqateqartoq, Envoy Media-mik, Dr. Phil McGrawimit, oqaloqatigiinnermik aallakaatitassiamini „Dr. Phil“-imi ilisimaneqartumit, pilersinneqarlunilu pigineqartumik, annertuumik suleqateqalernissamik nalunaaruteqarpoq.

Greenland Energy Company immikkoortut arfinillit sapaatip akunnikkaartumik aallakaatinneqartillu nalunaaquttap-akunneranik ataatsimik sivisussuseqartussat, ingerlatseqatigiiffiup Jamesonlandimi issittumi unammilligassai pillugit sammisaqarfiusut, suliarineqassasut tusagassiutitigut nalunaarummi allappoq.

„Kalaallit Nunaanni erlinnartuutinik ujaasineq nutaaliaasoq aqqutigalugu isiginnaartut paasissutissiivigineqarlutillu, ilinniartinneqarlutillu aliikkusersorneqassapput,“ Greenland Energy Company allappoq.

Erlinnartuutinik ujaasineq pillugu piviusulersaarusiaq

Dr. Phil - imaluunniit Phillip Calvin McGraw - aallakaatitassiamut 2026-mi aasap naalernerani takuteqqaarneqartussamut immiussiartorluni juulimi Kalaallit Nunaannukassaaq.

Aallakaatitassiat assigiinngitsutigut siammarterneqassallutillu inoqutigiinnut 220 millioninit amerlanerusunut anngukkumaartut ilimagineqarpoq.

„Piviusulersaarutit taakku Issittumi nukissiuutinik akisussaassuseqarluni ineriartortitsineq pillugu oqaluttuamik sapiilluni takutitsinerupput,“ Larry Swets Greenland Energy Companymi siulersuisuni siulittaasoq oqarpoq.

Dr. Phil, piviusulersaarummi pingaarnertut inuttaasoq, piviusulersaarusiat nangeqattaartut taakkua aqqutigalugit „misigisassarsiornermik isiginnaarartut siornatigut takusimanngisaannik takutitsiniarluni“ nammineq oqarpoq.

Ilisimatooq: Inuunermut najoqqutassiortoq sukannersuullunilu unneqqarissoq

Stephen Joyce Aarhus Universitetimi lektoriuvoq, ilaatigllut Amerikamiut tusagassiivii politikkikkullu sunniiniarnerit pillugit ilisimasaqarluarluni.

- Dr. Phil Amerikami TV-kkut tusaamasaanerpaat ilagaat. Oqaloqateqarluni aallakaatitassiaasa ukiut 20-t sinnerlugit sapaatip akunneranut aallakaatinneqartarneri Oprah Winfreymit taamaallaat qaangerneqartarput, Stephen Joyce oqarpoq, Dr. Phililu ukiuni 20-ni taakkunani politikkimut akuliusimanngitsoq ilanngullugu oqaatigaa.

- Inuunermut tunngasunik siunnersuisartutut sukannersuunini unneqqarissuuninilu ilisarnaatigai, taamaalilluni Republikanerinut Demokraatinulluunniit ilaasortaanerminik ersersitsinianngisaannarpoq. Politikki aallakaatitassiamini aamma sammineq ajorpaa.

Dr. Phil Ukiunili kingullerni præsident Trumpimut MAGA-mullu, konservativinut ilanngutsitsinermi iluatsilluarsimasumut, ilanngukkiartuinnarsimavoq.

- Taamaaliornermut tunngatillugu tusaamaneqarnerpaaq tassaavoq podcastimik aallakaatitsisartup Joe Roganip iliuusii, maannakkullu Dr. Philip, 2023-mi aallakaatitassiaminik unitsitsigami tusagassiuutinik talerperlernik suleqateqaqqilersup, iliuusia tamatumunnga assingusumik takussutissartaqarnera.

ICE sinnerlugu sunniiniutit

AAMMA ATUAKKIT

Jameson Landimi ujarlerneq ingerlavoq - amerikamiut selskabiat akuersissutinik nutaanik qinnuteqarpoq

Dr. Phil-ip aallakaatitassiani aallakaatinneqarunnaarmat filmiliortitseqatigiiffik Merit Street Media pilersippaa, taannalu 2025-mi akiliisinnaajunnaarpoq, tamatumanilu suliffeqarfiup USA-mi nunasisunut oqartussaasut ICE-p inerteqqutaasumik nunasisunik malersuinera pillugu aallakaatitassiorsimanerata Amerikamiut Trumpip aqutsisuinut sunniiniarnerusoq tupigusuutigalugu isornartorsiuingaalernerat, pissutaanerpaavoq.

– Tamanna Dr. Philimut ajornartorsiutaalluinnarpoq, tassami sooq ukiuni 20-ni politikkimut akuliunnaveersaareerluni taama partiimut attuumassuteqartigilersimanersoq inuit paasisinnaanngilaat, Stephen Joyce oqarpoq, taassumalu Dr. Phil-ip filmiliortarfimmik nutaamik Envoy Mediamik pilersitsinermini assersuutigalugu suliffeqarfimmik soorlu Greenland Energy Companymik suleqateqarnermigut aningaasanik pissarsinissani pingaartinnerusimagunaraa naliliutigaa.

Amerikamiunut sunniiniarneranut ilaasoq

Dr. Phil-ip Amerikamiut uuliasioqatigiiffiannut akuliunnera Amerikamiunut sunniiniarnermut, ilaatigut Drew Hornip aamma Tom Dansip peqataaffigisaannut, ilaasoq Stephen Joyce isumaqarpoq.

USA-p Kalaallit Nunaat tiguarniartariaqaraa isumaqalersinniarlugu Kalaallit Nunaata Danmarkillu avissaartuunnissaat siunertaralugu sunniiniarsarinermut tunngasoq.

- Dr. Philip tv-kkut aallakaatitassiat Amerikamiut nunarsuarmi misissuiffigineqanngitsumi erlinnartuutinik ujaasineratut, uuliasioqatigiiffinni pisortat misigisassarsiortutut ittut oqaluttuarai. Tamanna Kalaallit Nunaata naleqarluarnera pissutigalugu USA-p tiguartariaqagaanik sunniiniarnermut tulluarpoq. Dr. Phil-ilu Amerikami innuttaasuni suli tutsuigineqarluarmat tamanna ernumanartortaqarpoq, Stephen Joyce oqarpoq.

Qillerinermut atortussat Nunatsinnukaanneqartut

Umiarsuup qillerinermut atortussanik usillip Montrealimit aallarnissaa pilersaarutaasoq Greenland Energy Company qanittukkut nalunaarpoq, tamannalu qillerinernut pilersaarutinut pingaarutilimmik alloriarneruvoq.

Suliffeqarfiup Kalaallit Nunaanni nunami qillerineq siulleq, tassa Dr. Philimit uppernarsarneqartussaq, piareersarlugu Halliburton, Stampede Drilling aamma IPT Well Solutions suleqatigilerniarlugit aamma nalunaarutigisimavaa.

Uuliasioqatigiiffik atortussanik nunamut inissiinissaannit allamik iliuuseqassasoq Suli aatsitassanut naalakkersuisoqarfimmit akuerineqanngilaq. Taamaammat uuliamik qillerinerup aallartinnissaanut akuersissuteqanngillat.