Inu:It ukiuni 30-nngortorsiortoq

Inu:It A/S 1996-imi juulip 11-ani Nuummi aallarnisaasumit Martin Gjødvadimit pilersinneqarpoq. Atia Inu:It inuit qarasaasiallu imminnut attuumassuteqarnerannut ilisarnaataavoq.

- Suliffeqarfik pilersinneqaramili IT-mut tunngasunik siunnersuisartuunermiit IT-mut tunngasuni nutaaliaasumik suleqataasutut aaqqiissutissanik kiffartuussinernillu assigiinngitsorpassuarnik neqerooruteqartutut ineriartorsimavoq, suliffeqarfik tusagassiutitigut nalunaarummi allappoq.

Inu:It 2013-imi Danmarkimi immikkoortortaqarfeqalerpoq. Tamanna Thistedimi allaffittaarnikkut pivoq. Tamatuma kingorna suliat annertusiartorput, ullumikkullu Inu:It Thistedip saniatigut Aalborgimi Vejlemilu immikkoortortaqarfeqarpoq. Suliffeqarfiup qullersaqarfia suli Nuummiippoq, tassanilu suliffeqarfiup Kalaallit Nunaanni Danmarkimilu suliassai ataatsimut ingerlanneqartarput.

Ukiut 30-nngortorsiornera tallimanngornermi septembarip 18-iani atuisunut, suleqatinut, maannakkut sulisunut siornatigullu sulisimasunut ammasumik nalliuttorsiutigineqassaaq.

Tamanna qullersaqarfimmi Issortarfimmut 6-imi, Nuup ilaani Nuussuarmiittumi, nalunaaqutaq 11.00-mit 17.00-ip tungaanut pissaaq.

Millionilikkaanik sinneqartooruteqartoq

Ingerlatseqatigiiffik Ukiumi naatsorsuusiorfiusumi kingullermi 2024-25-mi, 2025-mi septembarip 30-ani naammassisumi, akileraarutit ilanngaatigereerlugit 30 millionit koruuninik sinneqartooruteqarpoq.

Inu:It A/S ukiup naatsorsuusiorfiusup naanerani 13 millionit koruuninik nammineq aningaasaateqarlunilu agguaqatigiissillugu 41-nik sulisoqarpoq.

Pilersitsisup kisiartaallunilu piginnittup Martin Gjødvadip pisortatut akisussaaffik Morten L. Olsenimut 2019-imi tunniuppaa. Taanna 2025-miilli ingerlatseqatigiiffimmi pisortaaneruvoq. Martin Gjødvad suli aningaasaqarnermut pisortaallunilu siulersuisuni ilaasortaavoq. – Sulisut suliffeqarfiup pigisaani pingaarnerpaapput, taakkoqanngippammi suliffeqarfik pappiaqqami kisitsisaannaassagaluarpoq, pisortaaneq Morten L. Olsen oqarpoq.

Imalu nangippoq:

- Taamaammat suliffeqarfiup aaqqissugaaneranik inunnillu sulisuusunik ukiuni kingullerni suliaqartorujussuuvugut. Immitsinnut paasilluarnerugatta erseqqissumillu aaqqissuussaaffeqaratta sulisut toqqissisimapput. Taamaalilluta sunniuteqarluartumik sulisarlutalu minnerunngitsumik sullitagut pitsaanerusumik misigisaqartissinnaavagut.

- Suli anguniagaq angunngilarput, kisianni angusat erseqqissut takusinnaalereerpagut, soorlu sullitatta naammagisimaarnerujartornerat.

Suliffeqarfiup siunnersortitut sullissinini ukiut ingerlaneranni ilaatigut internetimut attaveqarnermut, IP-telefonilerinermut, serverimik attartornermut, internetikkut isumannaallisaanermut qarasaasianillu aaqqiissutinut nutaaliaasunut nukimmik nuisarfimmik tunngavilimmut annertusisimavaa.

Inu:IT-mik pilersitsisoq inissianillu ineriartortitsisartoq Martin Gjødvad ukiuni 25-ni Kalaallit Nunaanni najugaqareerluni 2016-imi Jyllandip avannaani illoqarfimmut Aabybromut nuuppoq. Siornatigut allaasereriikkatsitut nuliani qitornanilu marluk ilagalugit atuarfitoqqami najugaqarpoq.

Gjødvad ukiualuit matuma siorna qalipaanermik sulialimmik suleqateqalermat illup qarmarsuisa ilaat kalaallit kangerluini iluliarsuarnik, umimmannik, qilannganik, RAL-ip umiarsuaanik qulimiguulimmillu S-61-imik assiliartalermagit Kalaallit Nunaannut attuumassuteqarnera atuarfitoqqami ersarippoq.