Australiamiut suliffeqarfiutaat Ironbark Zinc, Tunup Avannaani Citronen Fjordimi zinkimik piiaanissamut 2016-imiilli akuersissutaateqartoq, piiaanissamut akuersissutaatiminik utertitsinissaminik suliniuteqaleruttorpoq.
Tamanna Ironbarkip, 2025-mi Skylark Mineralsimik taaguuteqalersup, børsimut nalunaarutaani atuarneqarsinnaavoq.
Australiamiut suliffeqarfiutaat Ironbark Zinc, Tunup Avannaani Citronen Fjordimi zinkimik piiaanissamut 2016-imiilli akuersissutaateqartoq, piiaanissamut akuersissutaatiminik utertitsinissaminik suliniuteqaleruttorpoq.
Tamanna Ironbarkip, 2025-mi Skylark Mineralsimik taaguuteqalersup, børsimut nalunaarutaani atuarneqarsinnaavoq.
Aatsitassarsiornermut naalakkersuisup Naaja H. Nathanielsenip (IA) akuersissut utertinniarneqartoq Sermitsiamut uppernarsarpaa.
Matusinissaq saliinissarlu
Tullinnguullugu suliassatut matusinissamut pilersaarusiortoqassaaq, eqqaalu salinneqassalluni, taamaalilluni piiaanissamik kissaateqartumut nutaamik neqeroorutigineqarsinnaaqqullugu.
– Ironbarkip Citronen Fjordimi piiaaniarnera ajornartorsiorfiusoq piffissami sivisuumi ilisimavarput. Kingullermillu akuersissutaatertik utertinniarlugu qinnuteqarsimallutik, maannalu tamanna suliarileruttorparput. Matusinissamut pilersaarutip atuutilersinnissaa sumiiffimmilu qanoq saliisoqarnissaanik paasiniaanissaq, maanna suliassaraarput. Tamanna naammassippat piiaaffissaq neqeroorutigineqaqqissinnaanersoq misissussavarput, aatsitassanut naalakkersuisoq Naaja H. Nathanielsen oqarpoq.
Annertoorujussuarmik zinkeqartoq
Ironbark Zinc Citronen Fjordip eqqaani zinkimik piiaanissaminut 2016-imi decembarimi akuerineqarpoq. Niuernermut pilersaarut naapertorlugu ukiumut akuiagassamik 3,3 millionit tonsimik piiaanissamut aamma akuiakkanik 380.000 tonsinik assartuinissamut naammattumik saffiugassaqarpoq. Piiaaffimmi ukiuni 14-ini piiasoqarsinnaanissaa naatsorsuutigineqarpoq sivitsorneqarsinnaanissaanullu periarfissaqassalluni, aamma 500-t missaanniittunik sulisoqarnissaq naatsorsuutigineqarluni.
Ingerlatsiviulli Nunatta avannaarpiarsuani attaveqaasersuutit ingerlaannartumik ajornartorsiutigilerpai, tamaanimi ukiumut qaammammi ataasiinnarmi marlunniluunniit umiarsuarmik angalasoqarsinnaammat, assartuinissaq ajornartorsiutigileramiuk.
Ironbarkip umiarsuaq Nunavik akuersissummik pigisaqarfigisaminut angalatinniarlugu 2018-imi attartorpaa, pilersaarutigineqartutulli kangerluk suli tikitsinnagu utiinnartariaqarluni, taamalu pilersaarutigineqaraluartutut orsussanik atortussanillu usingiarsinnaasimanani.
Assi: Alexis Dorais/Fednav Limited
Angallannerup iluatsinnginnera
Ingerlatseqatigiiffiup suliniut piviusunngortinneqarsinnaasoq takutinniarlugu, umiarsuaq assartuut Nunavik attartorlugu akuersissuteqarfigisaminut orsussamik atortussanillu usitillugu 2018-imi aallartippaa, taamaalilluni aningaasaliisinnaasunut suliniutip piviusunngortinneqarsinnaanera takutinniarlugu.
Taamanili umiarsuup sumiinneranik nalunaarsukkat tunngavigalugit Sermitsiap paasivaa, umiarsuaq kangerluup Frederick E. Hydes Fjordip paavanut taamaallaat killissimasoq tamatumalu kingorna sikuuallaarnera pissutigalugu utiinnarluni.
Zinkimik piiaaffissatut pilersaarut Nunatta avannaarpiarsuaniimmat, tamaani sikuuallaartarnerata kinguneranik assartuinissaq ajornakusoortorujussuuvoq.
Titartagaq: Ironbark Zinc
Sikunik ajornartorsiuteqartoq
Aatsitassanut atortunullu ilisimasaqarfimmi pisortaasimasoq Per Kalvig Sermitsiamut 2018-imi oqarpoq, piiaaffiginiarneqartup sumiiffia attaveqaasersuutillu suliniummi unammillernarnerpaajuaannarsimasut.
Naaja H. Nathanielsen aamma taama isummerpoq.
– Avannaani aatsitassarsiornissamut pilersaarutit ataatsimut isigalugit ernumaginngilakka. Citronen Fjordilli inissisimaffia immikkut unammillernartoqarluni sikuusarnera patsisigalugu. Taamaattumik piiaasinnaanissamut periarfissaqarluarnera aamma aalajaatsumik tuniniaavissaqarnera kisimik pisariaqartinneqaratik, kisianni aamma assartuinermut tunngasut annertuut pisariaqartinneqarput. Suliniummilu tamatuma ilungersunartuusinnaanera ersarippoq. Isumaqarpunga Ironbark suliniutertik pillugu ilungersuuteqarluarsimasut. Avannarpiaanili aatsitassarsiornissamut pilersaarutit soorlu Kujataaniit allaanerulluinnarput.
