Isertuussat saqqummerput

Greenland Airports Nuummi Qeqertanut qullersaqarfiani sapaatip-akunnerani kingullermi tallimanngormat ullaap tungaani ataatsimeersuarmat ajortuliortut peqqissimisut kukkussutiminnik isertukkanik nassuerutiginnittarnerat assigalugu pisoq itsaq qinunikkut ataatsimiinnernut eqqaanarpoq.

Silataani aasarpalaarpoq, iluanili nuiarpassuit taartut katersorsimapput. Naalakkersuisut siulittaasuat Jens- Frederik Nielsen piginnittut, tassa Naalakkersuisut, sinnerlugit oqaaqqissaarepaluttumik oqaaseqarpoq.

- Kalaallit Nunaanni mittarfiit inuiaqatigiinni immikkut ittumik inissisimapput. Angallannermut qitiuginnanngillat. Inuppassuit inuunerannut pingaaruteqarput, pisariaqartitsiffiunerpaami pilersuinermik sukkasuumik ikiuinissamillu qulakkeerinnittuullutik – taamaammallu silaannakkut attaveqaasersuutit ingerlalluarnissaat immikkut pisussaaffigigaarput, Jens-Frederik Nielsen oqarpoq.

- Greenland Airportsip angusarisimasai naammaginngilluinnarput - maannalu ingerlatseqatigiiffiup ajornartorsiutit aaqqinniarlugit piumassuseqarnini takutittariaqarpaa.

Siulersuisut nutaat unamminiagassaqartut

Oqalugiaat taanna nalinginnaasumik, inussiarnersumik, nutaaliaasumik illoqarfimmiullu oqaasiinik ingerlanneqareersoq siulersuisuni siulittaasoq Jens Wittrup-Willumsen Danmarkimiit teamsikkut attaveqarluni oqalugiarpoq.

Siulittaasoq siullermeerluni ukiumoortumik nalunaarusiamik saqqummiivoq. Taanna Naalakkersuisut timmisartortitseqatigiiffimmik Nuummilu mittarfittaami ajornartorsiutinik naammaginnissinnaajunnaarmata siulersuisuni ilaasortani arfineq-marluusuni sisamat allat peqatigalugit siorna immikkut ittumik ataatsimeersuarnermi ilaasortanngortinneqarpoq.

Greenland Airports ukiup siuliani 208 millionit koruuninik amigartooruteqartoq 2025-mi 2,77 milliardit koruuninik amigartooruteqassasoq Jens Wittrup-Willumsenip ilisimatitsissutigaa. Aningaasat amerlassusaat tupannartut pingaarnertut naatsorsueriaatsimut tunngasunik nalikilliliinernik peqquteqarput, taakkulu katillugit 3,0 milliarder koruunit missaanniipput. Nalikilliliinerit mittarfissani pingasuusuni Ilulissani 1,77 milliardit koruunit missaannik naleqarput, Nuummi 824 millionit koruunit missaannik Qaqortumilu 326 millionit koruunit missaannik naleqarlutik.

Siulersuisut qinigaaqqammersut timmisartortitseqatigiiffiup pigisat sananeqarneranni akigititaasut pinnagit tunineqarnissaannut akigitinneqarsinnaasut nalingata piviusup naatsorsuutini ersersinnissaa pingaarnerpaamik qulakkeerpaat.

Tamanna naatsorsueqqissaarnermik pitsaasumik piffissamilu eqqortumi misissuinermik kinguneqarpoq, aammattaarli siulersuisunut qinigaaqqammersunut eqqissisimasumik sulinissamut qulakkeerutaavoq, taamaalillutillu siulersuisut siuliisa aningaasatigut ajornartorsiutaat piiarsinnaavaat. Siulersuisut taamatut iliornermikkut siornatigut ajortuliarineqarsimasut piiarlugit ingerlatseqatigiiffiup siunissami ineriartornissaanik suliaqarneq pingaarnerutissinnaalerpaat. Naatsumik oqaatigalugu killiliipput.

- Aammattaaq mittarfiit sananeqarlutillu akilerneqareermata nalikilliliinerit Greenland Airportsip aningaasaqarneranut sunniuteqassanngitsut erseqqissarneqassaaq, pisortaaneq Jens Lauridsen oqarpoq, taassumalu nalikilliliinerit naatsorsueqqissaarnermi nalimik nalimmassaarinerusut nunattalu karsiata aningaasaqarnera sunnernavianngikkaat aamma erseqqissarpaa.

Isumannaallisaasut amigaataasut

Taamaakkaluartoq siunissami unammillernartorpassuaqarpoq.

Siullermik Nuummi mittarfimmi isumannaallisaanermi ajornartorsiuterpassuit. Suliassaq taanna naatsorsuutigisamit pisariunerusoq ataatsimeersuarnermi oqaatigineqarpoq.

Greenland Airports aallaqqaammut sulisunik 20-nik atorfinitsitsinissamik missingersuusiorsimavoq. Maanna 60-inik atorfinitsitsisoqartariaqartoq paasinarsivoq. Inuit taama amerlatigisut atorfinitsinnissaat, ilinniartinneqarnissaat isumannaallisaanermullu akuerisaanissaat piffissartornarpoq – Greenland Airportsilu maannamut suliassami tamatumani Københavnip mittarfiini isumannaallisaanermi sulisunit ikiorneqarpoq.

Isumannaallisaanermi ajornartorsiutit Nuummi timmisartunut inissiarsuup kukkusumik sananeqarneranik – allanngortinneqarsinnaanngitsumillu – pissuteqarnerarneqartut Greenland Airportsip pisortaanera ataatsimeersuarneq naammassimmat tusagassiortunik katersortitsinermi oqarpoq.

- Nunap immikkoortuani timmisartut nunanilu allaniit timmisartut tikittartut aallartartullu ataatsikkut aallariartortarfeqarnerisigut kukkuvugut. Illuli taama ilusilersorneqarneratigut tamanna allanngortinneqarsinnaanngilaq, Jens Lauridsen nassuiaavoq, kiisalu Qaqortumi Ilulissanilu isumannaallisaasunik pisariaqartitsineq – minnerunngitsumik mittarfinni taakkunani marlunni angallanneq annikinnerussammat, taamaalillunilu isumannaallisaasut angallattoqanngikkaangat suliassanik allanik suliaqarsinnaassammata - malunnartumik annikinnerussasoq oqaluttuarpoq.

Timmisartumik angallannermik aqutsisut pisariaqartinneqartut

Nuummi mittarfimmi unammillernartoq alla tassaavoq timmisartunik angallassinermi aqutsisut naatsorsuutigineqaratik Nuummi AFIS-imik atuisut atorfinitsinneqarsimaneri. Aaqqiissut tamanna timmisartortitseqatigiiffinnit minnerunngitsumillu Angallannermut Aqutsisoqarfimmit iluarinnginneqartoq paasinarsivoq.

Tamanna pissutigalugu angallassineq siorna killilersorneqarpoq, ilaatigut Tuukkap tikittarneri aallartarnerilu eqqarsaatigalugit Air Greenlandip timmisartuussisarneranut unammillernartorujussuulluni.

Timmisartut nakkutilliissutaat TMA-mik taaneqartartoq Naviair suleqatigalugu ukioq manna maajip 14-ianni atuutilersinneqarmat ajornartorsiutit aaqqinneqarput. Timmisartunik angallassinermi aqutsinermi timmisartut mikkiartortut aqunneqartarput, tamatumalu kingorna AFIS-operatørit mittarfimmi angallannermik siornatigutuulli ingerlatsisarput.

Ilulissani mittarfiliornermut atatillugu Angallannermut Aqutsisoqarfiup TMA-mik piumasaqaateqarnissaa Greenland Airportsip naatsorsuutigaa.

Nuummi ukiumi aallartiffiusumi timmisartunut Airbus-inut orsussaqarnissaq unammillernartuusimasoq, taamaattumillu orsiissut 30 m3-nik orsussaqarsinnaasoq pisiarineqartariaqarsimasoq ataatsimeersuarnermi aamma ilisimatitsissutigineqarpoq.

Mittarfinni nutaani unammilligassat saniatigut Greenland Airportsip 2025-mi aningaasaqarnera Kulusummi sannavimmi ikuallannermik uuliaarluernermullu atatillugu 8 millionit koruuninik ilimagineqareersutut akiligassineqarnermik sunnerneqarpoq.