AATSITASSAT
Jameson Landimi uuliasiorluni qillerinerit pilersaarutaapput
White Flame Energy A/S, tassaasoq ingerlatseqatigiiffik tuluit nunaanni tunngaveqartoq aammalu uuliaqarsinnaaneranik misissueqqaarnissamut pingasunik akuersissutaateqartoq, Naalakkersuisunut nalunaaruteqarpoq, 2026-ip 2027-illu akornanni ukiumi uuliaqarsinnaaneranik misileraalluni marloriarluni qillerissamaarluni. Aatsitassanut Naalakkersuisoq Naaja H. Nathanielsen (IA), Inatsisartuni ilaasortamut Mette Arqe-Hammeken-imut (N) akissutaani tamanna ersersinneqarpoq.
Foto (arkiv): Uri Golman/Scanpix
Inatsisartut ilaasortaq, Mette Arqe-Hammeken (N) paasisaqarusuppoq Jameson landimi Ittoqqortoormiut eqqaaniittumi uuliasiortoqalissappat innuttaasunut suliffissat periarfissat suunersut.
Ilanngullugu paaserusuppaa Ittoqqortoormiuni mittarfittaassaq uuliasiortoqarnerani atorluarneqassappat sutigut iluaqutaasinnaanersoq.
White Flame Energy qinnguartaatigut anillappoq
Naalakkersuisut siuliisa IA siuttoralugu 2021-imi juulimi nalunaarutigaat, nutaanik uuliamik gasimillu ujarlernernut akuersissutinik tunniussisoqaqqissanngitsoq, taamaalillutillu Kalaallit Nunaanni siunissami uuliamik ujarlernerit unitsinneqassasut.
White Flame Energylli inerteqquteqalerneq taanna sioqqullugu pingasunik akuersissuteqarpoq sumiiffinni pingasuni Jameson Landimiittuni, allatut pisoqanngippat suliffeqarfiup akuersissutaatai 2028-mi atorunnaassapput.
2025-li tassaavoq ukioq Inatsisartunut qinersinermi allannguilluinnartoqarpoq. Demokraatit nuna tamakkerlugu partiit annersaattut IA-mut ajugaapput. Demokraatillu aamma ilisimaneqarput Inuit Ataqatigiinniit killilersuilluni inerteqquteqarnermik politikkeqarnerup illuatungililersuisuusimasoq, aatsitassarsiornermi kiisalu uuliamik gasimillu suliaqarnermi.
Naalakkersuisooqatigiilernissamut isumaqatigiissummi toqqaannartumik allassimanngilaq IA siuttoralugu qinersinermi kingullermi inerteqqutit atuutilersinneqarsimasut qanoq iliuuseqarfigineqassanersut.
Taamaakkaluartoq takussutissaqarpoq uuliasiornermik ingerlatseqatigiiffik pingasunik akuersissuteqartoq, mannalu tikillugu pilersaarutiminik taamaatitsiinnarsimannginneratigut, upperinnilersimasoq siunissami uuliasiornermut tunngatillugu suli ingerlatsisinnaassallutik.
Ingerlatseqatigiiffimmi avammut nalunaareerpoq Jameson Landimi uuliasiorluni qillerinissat marluk 2026-2027 ukiukkut pilersaarutigineqartut.
2026 ingerlatseqatigiiffimmut ulapaarfiussaaq
Qillerinissat taakku marluk sioqqullugit ingerlatseqatigiiffiup VVM aamma VSB-nassuiaasioqqaartussaavoq (pinngortitamut inuiaqatigiinnullu sunniutaasinnaasut nalilersuiffigalugit).
Nassuiaatit taakku marluk Naalakkersuisut tunniunneqarpata, aamma tamanut tusarniaassutigineqassapput, suliassat taakku piffissamik atuiffiulluartuupput, taamaattumik ingerlatseqatigiiffik ulapaartariaqassaaq, 2026/2027 ukiukkut uuliasiorluni qillerinissamut pilersaarutini piviusunngortinniarlugit.
Mette periarfissanik takusaqarpoq
Mette Arqe-Hammekenip aamma § 37 naapertorlugu apeqqutimini sammivaa Ittoqqortoormiini sumiiffimmi najugaqartut sulisinnaanermut periarfissaat Jameson Land-imi uuliasiornermut atatillugu suussanersut, tassungalu atatillugu Naalakkersuisut aperai sumiiffimmi sulisunut pikkorissartitsisoqassanersoq.
Naaja H. Nathanielsen akivoq tassunga atatillugu nassuiaat VSB tunngavigalugu paasinarsinerussasoq, qillerinissamut pilersaarutaasut sulisussanillu pisariaqartitsineq qanoq iluseqassanersut, kiisalu sumiiffimmi sulisussat tikisitatullu sulisussat agguataarneqarnerat qanoq ittuussanersoq.
- Uuliasiorluni misissuinermi qillerinernut atatillugu suliaqarnerup annertunerpaartaa qaffasissumik immikkut ilisimasalinnit ingerlanneqartussaavoq. Taamaattoq naatsorsuutigineqartariaqarpoq assassornermik tunuliaqutalinnik kiisalu kiffartuussilluni ingerlatsisunut, soorlu eqqiaanermut, nerisaqartitsinermut kiisalu maskiinani truck-inilu aquttunik sulisoqarnissaq pisariaqartinneqartussaasoq, aatsitassanut Naalakkersuisoq akivoq.
Sumiiffimmi sulisussanik pikkorissaasoqassanersoq pillugu apeqqummut, Naalakkersuisunut ilaasortaq naliliivoq, sumiiffimmi sulisut pikkorissaanernik ilinniartitaanernillu neqeroorfigineqarnissaat ilimanaateqartoq.
