Jane P. Lantz IA-miit WWF-imut nuuttoq

Jane P. Lantz aggustip 15-ianit aallartittumik WWF-ip Kalaallit Nunaanni pilersaarutaanut aqutsisunngorpoq. Taassuma Malene Lynge WWF-ip nunatsinni immikkoortortaqarfiani 2023-mili aqutsisuusoq taarserpaa.

Pinngortitaq pillugu nunarsuaq tamakkerlugu suliniaqatigiiffiup WWF-ip avatangiisinut tunngatillugu pisortaa, Agnete Schønau Winther, taama nalunaarpoq.

- Nuannaangaarluta Jane WWF-ip Kalaallit Nunaanni immikkoortortaqarfiani tulaavissaatut tikilluaqquarput. Inuiaqatigiinnik paasisimasaqartuunini, politikkikkut suliaqarnermik annertuumik misilittagaqarnini suleqateqarsinnaaninilu aamma pinngortitamut asanninnerujussuani nukittuffigai, Agnete Schønau Winther oqarpoq.

Jane P. Lantz Inuit Ataqatigiinni partiip allattaatut atorfimmiit WWF-imut nuuppoq. Taamaalilluni suliniaqatigiiffiup pinngortitamik illersuinissamik, uumassusillit assigiinngisitaarnerannut aamma atajuartitsinissamik suliniutaannut siuttuulersussanngorluni.

- WWF-imut ilanngunnissara qilanaaraara. Ullutsinni Kalaallit Nunaanni pinngortitaq assigiinngitsuniit assut artorsartinneqarpoq, taamaammallu qilanaaraara pinngortitamik illersuinissamut annertuumik anguniagaqarluni suliniuteqaqataanissaq. Suliat ingerlanneqartut suleqatinullu attaveqarnerit nukittoreersut ineriartorteqqinnissaat qilanaaraara, nunatsinnilu pinngortitamut inuinullu iluaqutaasussamik suli amerlanerusunik suleqateqalernissamik anguniagaqarnissaq aamma qilanaaralugu. Ataatsimoorlutami pitsaanerpaamik angusaqartaratta, Jane P. Lantz tusagassiorfinnut nalunaarummi taama allappoq.